အရပ်သားများနှင့် ထိခိုက်လွယ်သော ရပ်ရွာလူမှုအသိုင်းအဝိုင်းများအပေါ် စစ်ကောင်စီ၏ အကြမ်းဖက်လုပ်ဆောင်မှုများကို ပြင်းထန်စွာရှုတ်ချကြောင်း အမေရိကန် နိုင်ငံတကာဖွံ့ဖြိုးရေးအေဂျင်စီ(USAID)က ထုတ်ပြန်သည်။
စစ်ကောင်စီအနေဖြင့် မြန်မာပြည်သူများ အထူးသဖြင့်ကျောင်းသူ/ကျောင်းသားများ၊ကျောင်းဆရာ/ဆရာမများ၏ လုံခြုံရေးအတွက် မြန်မာနိုင်ငံရှိစာသင်ကျောင်းများအား တိုက်ခိုက်မှုများကို ယခုချက်ချင်းရပ်တန့်ရမည် ဖြစ်ကြောင်း ဖော်ပြသည်။
မှတ်တမ်းပြုစုထားချက်များအရ လွန်ခဲ့သည့်နှစ်နှစ်အတွင်း စာသင်ကျောင်းပေါင်း (၁၇၄) ကျောင်းကို ပစ်မှတ်ထားတိုက်ခိုက်မှုများနှင့်အတူ မြန်မာနိုင်ငံရှိ အရပ်သားများနေထိုင်ရာဒေသများကို ပစ်မှတ်ထားတိုက်ခိုက်မှုများသည် အရပ်သားများကိုသေဆုံးစေခဲ့ပြီး ကလေးသူငယ်များနှင့် လူငယ်များသည်လည်း ၎င်းတို့၏ လုံခြုံစွာပညာသင်ကြားခွင့်ကို ငြင်းပယ်ခံခဲ့ရကြောင်း USAID က ဆိုသည်။
Public Service Announcement
အဆိုပါ ပစ်မှတ်ထားတိုက်ခိုက်မှုများသည် USAID မှ ပြည်တွင်းပညာရေးမိတ်ဖက်အဖွဲ့အစည်းများ၊ နိုင်ငံတကာအဖွဲ့အစည်းများနှင့် ပူးပေါင်းလုပ်ဆောင်လျက်ရှိသည့် မြန်မာနိုင်ငံရှိ ပဋိပက္ခဒဏ်ခံစားနေကြရသော ကလေးသူငယ်များနှင့် လူငယ် (၃၀၀,၀၀၀) ကျော်အတွက် လုံခြုံစိတ်ချရသောပညာသင်ကြားရေးနေရာများဖန်တီးထောက်ပံ့ပေးနိုင်ရေးလုပ်ငန်းကို ခြိမ်းခြောက်နေသည်ဟု ဖော်ပြသည်။
စစ်ကောင်စီသည် ရှမ်းပြည်နယ်နှင့် ကယားပြည်နယ်ရှိ စာသင်ကျောင်းများကို လေကြောင်းမှ တိုက်ခိုက်မှုများ ပြုလုပ်ခဲ့ကြောင်း ခိုင်လုံပြီး စိစစ်အတည်ပြုထားသော အစီရင်ခံစာများကို စက်တင်ဘာလအစောပိုင်းတွင် USAID က လက်ခံရရှိခဲ့သည်ဟု အသိပေးသည်။ ထိုတိုက်ခိုက်မှုများအတွင်း အသက် (၉) နှစ်မှ (၁၆)နှစ်ကြား ကလေးငယ်အများအပြား သေဆုံးခဲ့ကြရပြီး အခြားသူများလည်း ထိခိုက်ဒဏ်ရာများ ရရှိခဲ့ကြောင်း ဖော်ပြသည်။
ဆက်လက်ဖြစ်ပွားလျက်ရှိသည့် အကြမ်းဖက်လုပ်ဆောင်မှုများ၏ ခြိမ်းခြောက်မှုသည် အထောက်အပံ့များနှင့် မရှိမဖြစ်လိုအပ်သောဝန်ဆောင်မှုများ လိုအပ်နေသည့် ရပ်ရွာလူမှုအသိုင်းအဝိုင်းများထံသို့ လူသားချင်းစာနာထောက်ထားမှုဆိုင်ရာ မိတ်ဖက်အဖွဲ့အစည်းများ၏ လက်လှမ်းမှီရောက်ရှိနိုင်မှုကို ဆက်လက်ပိတ်ပင်တားဆီးလျက်ရှိကြောင်း USAID က ထုတ်ပြန်သည်။
