လူအေး/People’s Spring
ရခိုင်ပြည်နယ်၊ ကျောက်တော်မြို့ကို စစ်ကောင်စီက ယမန်နေ့(အောက်တိုဘာလ ၁၀ရက်)က လေကြောင်းမှ ဗုံးကြဲတိုက်ခိုက်မှုတွင် သေဆုံးသူဦးရေတိုးလာပြီး ယနေ့ နံနက်ပိုင်းအထိ ရရှိသော သတင်းများအရ သေဆုံးသူ ၈ ဦးရှိလာပြီး ၁၃ဦးသည် ဆေးကုသမှုခံယူနေရကြောင်းဒေသခံများကပြောသည်။
ကျောက်တော်မြိုမဈေး နှင့် အထက(၂)စာသင်ကျောင်းအနီးကို အောက်တိုဘာလ ၁၀ ရက် ညနေ ၄ နာရီ ၁၅ မိနစ်တွင် စစ်ကောင်စီကပေါင် ၅၀၀ ဗုံးနှစ်လုံး ကြဲချတိုက်ခိုက်ခြင်းဖြစ်သည်။
Public Service Announcement
“ညနေတုန်းက ဆုံးတာက ၆ယောက်ပါဗျ။ဆေးကုနေရင်း နှစ်ယောက်ထပ်ဆုံးတယ်။ ကလေးလည်းပါတယ် ဆုံးတာမှာ။စစ်မဖြစ်တော့ မရှောင်ဘူးလေ။ အခုလိုတွေ ပစ်ခတ်နေတော့ နေမတတ်အောင် ဖြစ်နေကြတယ်”ဟု ဒေသခံတစ်ဦးကပြောသည်။
ကုသနေဆဲ ဒဏ်ရာရလူနာ ၁၃ဦးသည် စိုးရိမ်စရာအခြေအနေကို ကျော်လွန်ခဲ့ပြီးဟု သိရပြီး သေဆုံးဒဏ်ရာရသူများ၏ အသေးစိတ်အချက်အလက်များကို ဒေသခံများက ပြောကြားလိုခြင်းမရှိကြခြေ။ နောက်ထပ်လေကြောင်းတိုက်ခိုက်ခံရမည်ကို ဒေသခံများက စိုးရိမ်နေကြသည်။
စစ်ကောင်စီသည် အောက်တိုဘာလဆန်းအတွင်း ရခိုင်ပြည်နယ်မှ တောင်ကုတ်မြို့နယ်၊ ပုဏ္ဍားကျွန်းနှင့် ပေါက်တောမြို့နယ်၊ ကျောက်တော်မြို့နယ်တို့မှ တိုက်ပွဲဖြစ်ပွားခြင်းမရှိသည့်ကျေးရွာများကို လေကြောင်းမှဗုံးကြဲခဲ့သည်။ တောင်ကုတ်မြို့နယ်ကို အောက်တိုဘာ ၄ရက်နှင့် ၇ရက်တွင် လေကြောင်းမှ သုံးကြိမ်ဗုံးကြဲခဲ့ရာ ဒေသခံပြည်သူ ၁၉ ဦးသေဆုံးခဲ့သည်။
စစ်ရှုံးနေသည့် စစ်ကောင်စီသည် စစ်ရေးပစ်မှတ်မဟုတ်သည့် အရပ်သားနေထိုင်ရာကျေးရွာများကို လေကြောင်းမှ ဗုံးကြဲတိုက်ခိုက်နေကြောင်း အာရက္ခတပ်တော်(AA)က သတင်းထုတ်ပြန်ထားသည်။ စစ်ကောင်စီလေကြောင်းအန္တရာယ်ကြောင့် လာမည့်သီတင်းကျွတ်ကာလတွင် လူစုလူဝေးပြုလုပ်၍ ပျော်ပွဲရွှေပွဲဆင်နွှဲခြင်း မပြုလုပ်ကြရန်လည်း AAက သတိပေးထားသည်။
