ဇေအောင်/People’s Spring
သံဃာတော်များအပါအဝင် စစ်ရှောင်ပြည်သူ ၁၂ ဦးသေဆုံးခဲ့သည့် မတ္တရာမြို့နယ်၊ ဝေါစုကျေးရွာ စစ်ရှောင်စခန်း လေကြောင်းတိုက်ခိုက်မှုသည် စစ်ကောင်စီက စစ်ရာဇဝတ်မှုကို ပြောင်ပြောင်တင်းတင်း ကျူးလွန်ခြင်းဖြစ်ကြောင်း ပြည်သူ့ကာကွယ်ရေးတပ်မတော်(မန္တလေး)က သတင်းထုတ်ပြန်သည်။
ယနေ့ (အောက်တိုဘာ ၁၁ရက်) နေ့လယ် ၁ နာရီခွဲခန့်က မတ္တရာမြို့နယ် ၊ ဝေါစုကျေးရွာရှိ စစ်ရှောင်စခန်းအား စစ်ကောင်စီက အကြောင်းမဲ့ လေကြောင်းတိုက်ခိုက်ခဲ့ရာ သံဃာတော် သုံးပါးနှင့် ကလေးသူငယ်များအပါအဝင် စစ်ရှောင်ပြည်သူ၁၂ဦးသေဆုံးခဲ့ရပြီး ပြင်းထန်စွာ ထိခိုက်ဒဏ်ရာရရှိသူ များပြားကြောင်း ဒေသခံများက ပြောသည်။
Public Service Announcement
အဆိုပါ စစ်ရှောင်စခန်းအား စစ်ကောင်စီ၏ လေကြောင်းတိုက်ခိုက်မှုသည် စစ်ဆင်ရေးနှင့်လုံးဝမသက်ဆိုင်သော လုပ်ရပ်တစ်ခုဖြစ်ပြီး ဂုဏ်သိက္ခာအကင်းမဲ့ဆုံးသော စစ်ရာဇဝတ်မှုကို ပြောင်ပြောင်တင်းတင်း ကျူးလွန်နေခြင်းပင်ဖြစ်ကြောင်း မန္တလေး PDFက သတင်းထုတ်ပြန်သည်။
“စစ်ဆင်ရေးနဲ့ လုံးဝသက်ဆိုင်ခြင်းမရှိတဲ့ ပြည်သူကိုပစ်မှတ်ထားပြီးတော့ ကျူးလွန်တဲ့ စစ်ရာဇဝတ်မှုဖြစ်တယ်လို့ ကျွန်တော်တို့ပြောချင်ပါတယ်။”ဟု မန္တလေး PDF ၏ ပြောရေးဆိုခွင့်ရှိသူ ကိုအော်စမွန်က ပြောသည်။
“ပေါင်နှစ်ရာဗုံးသီးတစ်လုံးချတယ်။ ပြည်သူ ၉ ဦး၊ ဘုန်းကြီး ၃ ပါး၊ စုစုပေါင်း ၁၂ဦး သေဆုံးတယ်။ အထိအခိုက်လည်းများတယ်။”ဟု Wetlet Informational Network အဖွဲ့ဝင်တစ်ဦးက ပြောသည်။
ထို့အပြင် စစ်ရှောင်ပြည်သူ ၃၀ ဦးထက်မနည်း ထိခိုက်ဒဏ်ရာရရှိခဲ့ကြောင်း ဒေသခံများက ပြောသည်။
ပြီးခဲ့သည့် စက်တင်ဘာ ၂၁ရက်က မတ္တရာအနောက်ခြမ်း၌ တိုက်ပွဲဖြစ်ပွားပြီး PDF စခန်းယာယီဆုတ်ခွာခဲ့ရသည်။ ထိုတိုက်ပွဲ၌ မတ္တရာ သုံးဆယ်ပေးကျေးရွာတဝိုက်ကို စစ်တပ်က လက်နက်ကြီးဖြင့် ပစ်ခတ်ခဲ့ရာ ကလေးသူငယ်များ အပါအဝင် ပြည်သူ ၆ ဦးသေဆုံးခဲ့သည်။
လက်ရှိတွင် မတ္တရာမြို့နယ်အရှေ့ခြမ်း၌ စစ်ကောင်စီတပ်နှင့်ကာကွယ်ရေးပူးပေါင်းတပ်များ တိုက်ပွဲများဖြစ်ပွားနေသည်။
မေလမှ ဇူလိုင်လကုန်အထိ မတ္တရာမြို့နယ်အတွင်းရှိ စစ်ကောင်စီတပ်စခန်း ၃၅ ခုအား ပြည်သူ့ကာကွယ်ရေးတပ်မတော်(မန္တလေး)က သိမ်းပိုက်ရရှိထားသည်။
