ဟန်နွေ/People’s Spring
ရှမ်းပြည်နယ်မြောက်ပိုင်း လားရှိုးမြို့နယ် နမ့်ပေါင် ကျေးရွာကို စစ်ကောင်စီက ယနေ့ မွန်းလွဲပိုင်း၌ လေကြောင်း တိုက်ခိုက်ခဲ့ရာအရပ်သား တစ်ဦးဒဏ်ရာရရှိခဲ့ကြောင်း ကိုးကန့် တပ်မတော် (MNDAA)က အသိပေးထုတ်ပြန်သည်။
အောက်တိုဘာ ၁၂ ရက်နေ့ မွန်းလွဲ ၃ နာရီအချိန်ခန့်တွင် မင်းအောင်လှိုင်၏ အာဏာသိမ်းတပ်က နမ့်ပေါင်ရွာရှိ စာသင်ကျောင်းကို ဗုံးကြဲတိုက်ခိုက်ခဲ့ရာ အရပ်သား တစ်ဦးလက်မောင်းဒဏ်ရာရရှိခဲ့ကြောင်း၊ ပေါက်ကွဲမှုကြောင့်စာသင်ကျောင်း အဆောက်အဦးပြင်းထန်စွာ ပျက်စီးခဲ့ကြောင်း ဖော်ပြသည်။
Public Service Announcement
ထို့ပြင် ပေါက်ကွဲမှု ဖြစ်ပွားရာအနီးရှိ ဒေသခံများ၏ အိမ်မွေးတိရိစ္ဆာန်အချို့ ဗုံးစထိမှန် ဒဏ်ရာရရှိခဲ့သည်ဟု ဆိုသည်။
စစ်ကောင်စီတပ်သည် လွန်ခဲ့သည့် စက်တင်ဘာ ၁၃ရက်ကလည်း နမ့်ပေါင်ကျေးရွာကိုလေကြောင်း ဗုံးကြဲတိုက်ခိုက်ခဲ့ရာ အရပ်သား ၅ဦး သေဆုံးကာ ၈ဦးဒဏ်ရာရရှိခဲ့သည်။
စစ်ကောင်စီတပ်သည် လားရှိုးမြို့ပေါ်နှင့် လားရှိုးမြို့နယ်အတွင်း ကျေးရွာများ၊ သိန္နီမြို့နယ်၊ ကိုးကန့် လောက်ကိုင်မြို့ အပါအဝင် ကိုးကန့်တပ်မတော်(MNDAA) တိုက်ခိုက်သိမ်းပိုက်ထားသည့် မြို့ရွာများကို လေကြောင်း ဗုံးကြဲတိုက်ခိုက်မှုများ မကြာခဏပြုလုပ်လျက်ရှိရာ အရပ်သားသေဆုံးထိခိုက်မှုများစွာရှိခဲ့သည်။
MNDAA၏ ထုတ်ပြန်ချက်အရ ဇူလိုင်မှ ယခုအချိန်ထိ သုံးလကျော်အတွင်း စစ်ကောင်စီက ကိုးကန့်ဒေသအတွင်း တိုက်ပွဲဖြစ်ပွားမှုမရှိသည့် နေရာများကို လေကြောင်း ဗုံးကြဲတိုက်ခိုက်မှုများအတွင်း အရပ်သား ၃၀ ကျော်သေဆုံးကာ ၁၀၀ခန့် ထိခိုက်ဒဏ်ရာရရှိကာ နေအိမ်အဆောက်အဦးများစွာပျက်စီးခဲ့ရသည်။
