ဇေအောင်/People’s Spring
သီတင်းကျွတ်လပြည့်နေ့ည ရှမ်းပြည်နယ်မြောက်ပိုင်း နောင်ချိုမြို့ နှင့် စစ်ကိုင်းတိုင်း ဒီပဲယင်းမြို့တွင် စစ်ကောင်စီက လေကြောင်းတိုက်ခိုက်မှုများ ပြုလုပ်သွားကြောင်း မြို့ခံများက ပြောသည်။
ယမန်နေ့ ည ၉ နာရီ ၄၈မိနစ်တွင် နောင်ချိုမြို့အဝင်စစ်ဆေးရေးဂိတ်၊ ည ၁၀ နာရီ ၈ မိနစ်တွင် စာရင်းစစ်ရုံးနှင့် အထွေထွေအုပ်ချုပ်ရေးမှူးရုံးအနီး၊ ည၁၁ နာရီ ၃၂ မိနစ်တွင် ရဲစခန်းတို့အား လေကြောင်းတိုက်ခိုက်ခဲ့ကြောင်း နောင်ချိုမြို့ခံများက ပြောသည်။
Public Service Announcement
လေကြောင်းတိုက်ခိုက်မှုကြောင့် လူနေအိမ်များပျက်စီးခဲ့ကြောင်းလည်း ဒေသခံများက ပြောသည်။
“ည အစောပိုင်းမှာ ကြဲတယ်။ ၁နာရီမှာ လေးလုံးကြဲတယ်။ ညဦးပိုင်းတည်းက မနားတမ်းပျံဝဲနေတာ။ ရဲစခန်းနားက စာရင်းစစ်ရုံးမှာ အကြဲခံရတယ်။ ပထမက မြို့အပြင်ဘက် ကျတာ”ဟု နောင်ချိုမြို့ခံတစ်ဦးက ပြောသည်။
အလားတူ စစ်ကိုင်းတိုင်း၊ ဒီပဲယင်းမြို့ကိုလည်း ယမန်နေ့ည ၉ နာရီခွဲကျော်က လေကြောင်းတိုက်ခိုက်မှု ၂ ကြိမ် ပြုလုပ်သွားကြောင်း ဒေသခံများက ပြောသည်။
“အထိအခိုက် မရှိပါဘူးဗျာ။ သူတို့ဟာသူတို့ ပေါလို့လာပစ်တာ။”ဟု ဒေသကာကွယ်ရေးရဲဘော်တစ်ဦးက ပြောသည်။
စစ်ရှုံးနေသော စစ်ကောင်စီတပ်သည် သြဂုတ်မှစတင်၍ လေကြောင်းတိုက်ခိုက်မှုများ အရှိန်မြှင့်လုပ်ဆောင်နေပြီး ပြည်သူထိခိုက်သေဆုံးမှု အများအပြားရှိနေသည်။
