ဇော်ရမ်း/People’s Spring
မကွေးတိုင်း၊ ထီးလင်းမြို့တွင် အောက်တိုဘာ ၂၇ရက် ညကဖြစ်ပွားသော ပစ်ခတ်မှုအတွင်း စစ်ကောင်စီတပ်၏ လက်နက်ကြီးထိမှန်၍ အမျိုးသမီးတစ်ဦး သေဆုံးခဲ့သည်။
ထီးလင်းမြို့ပေါ်တွင် တပ်စွဲထားသည့် စစ်ကောင်စီတပ်ကို ပြည်သူ့ကာကွယ်ရေးတပ်ဖွဲ့များက တိုက်ခိုက်စဉ် စစ်ကောင်စီတပ်က လက်နက်ကြီးများဖြင့် ပြန်လည်ပစ်ခတ်ခြင်းဖြစ်သည်။
Public Service Announcement
” မြို့ပေါ်မှာ အပြန်အလှန်ချတယ်။ စစ်တပ်ဘက်က ပစ်တဲ့လက်နက်ကြီးက အမှတ်(၁) ရပ်ကွက်ထဲကျပြီး အမျိုးသမီးတစ်ဦး သေဆုံးတာပါ”ဟု မြို့ခံတစ်ဦးက ပြောသည်။
တော်လှန်ရေးတပ်ဖွဲ့များက စစ်ကောင်စီ၏ ပစ်မှတ်နေရာများကို ဒရုန်းဖြင့် ဗုံးကြဲတိုက်ခိုက်ခြင်းဖြစ်ပြီး ထိခိုက်မှုအခြေအနေကိုမသိရသေးကြောင်း ကာကွယ်ရေးရဲဘော်တစ်ဦးကပြောသည်။
ထီးလင်းမြို့ပေါ်တွင် ရွှေထီးခန်းမ၊ တရားရုံးနှင့် မြို့နယ်ထွေအုပ်ရုံးတို့တွင် စစ်ကောင်စီကတပ်စွဲထားပြီး ဘေးပတ်ဝန်းကျင်ကျေးရွာများကို စစ်ကြောင်းထိုးနေသည်။
အောက်တိုဘာ ၂၆ရက် နံနက်အစောပိုင်းက ကျားခဲကျေးရွာကို စစ်ကောင်စီက စီးနင်းဝင်ရောက်ပြီး အမျိုးသားလေးဦးကို မီးရှို့သတ်ဖြတ်သွားခဲ့သည်။
စစ်ကြောင်းရန်ကြောင့် ထွက်ပြေးသည့်ဒေသခံသုံးဦးသည် ယနေ့အထိ ပျောက်ဆုံးနေဆဲဖြစ်သည်။
ဒေသခံများကို မီးရှို့သတ်ဖြတ်သွားသည့်စစ်ကြောင်းအား ပြည်သူ့ကာကွယ်ရေးတပ်ဖွဲ့များက မိုင်းဆွဲတိုက်ခိုက်ရာ စစ်ကောင်စီဘက်မှ ဗိုလ်အဆင့်အရာရှိတစ်ဦးသေဆုံးပြီး သုံးဦးဒဏ်ရာရသွားခဲ့သည်ဟု ကာကွယ်ရေးရဲဘော်တဦးက ပြောသည်။
မကွေးတိုင်း၊ ယောဒေသမှ ထီးလင်းမြို့အပါအဝင် ဂန့် ဂေါခရိုင်အတွင်းမြို့နယ်များကို စစ်ကောင်စီက အောက်တိုဘာလဆန်းမှစ၍ စစ်ကြောင်းထိုးနေပြီး လေကြောင်းမှလည်းတိုက်ခိုက်နေသည်။
အောက်တိုဘာ ၂၂ရက်က ထီးလင်းမြို့နယ်၊အိုင်းမကျေးရွာနှင့် ချောင်းပေါက်လမ်းဆုံကို စစ်ကောင်စီက လေကြောင်းမှ တိုက်ခိုက်ခဲ့ရာဒေသခံတစ်ဦးသေဆုံးပြီး ခြောက်ဦးဒဏ်ရာရခဲ့သည်။
ဒေသတွင်း၌စစ်ရေးတင်းမာနေစဉ် ထီးလင်းမြို့ ရွှေထီးခန်းမတပ်စွဲထားသည့်စစ်ကောင်စီစစ်ကြောင်းမှ ပျူစောထီးတစ်ဦးသည် သေနတ် သုံးလက်နှင့် စစ်သုံးပစ္စည်းများယူ ထွက်ပြေးလာပြီး ပြည်သူ့ကာကွယ်ရေးတပ်ဖွဲ့ထံ အလင်းဝင်လာမှုရှိခဲ့သည်။
