ဆိုင်းမင်း/People’s Spring
TNLA သိမ်းထားတဲ့ မိုးကုတ်မြို့ကို စစ်ကောင်စီက မနေ့ နိုဝင်ဘာလ ၁၁ ရက် ညအချိန် လေကြောင်းကနေ ဗုံးကြဲခဲ့တဲ့အတွက် ပြည်သူ ၆ဦးသေဆုံးပြီး လူနေအိမ်၁၀လုံးထက်မနည်းပျက်စီးခဲ့တယ်လို့ ဒေသခံတွေထံကနေသိရပါတယ်။
မိုးကုတ်မြို့အရှေ့ပိုင်းနဲ့အနောက်ပိုင်း လူနေရပ်ကွက်တွေမှာ မနေ့က နိုဝင်ဘာလ ၁၁ရက် ည၁၁နာရီခွဲဝန်းကျင် ဗုံးကြဲခံရတာပါ။
မိုးကုတ်အနောက်ခြမ်း လူးထရပ်ကွက်မှာ အမျိုးသမီး ၁ ဦးနဲ့ အမျိုးသား ၂ ဦး ၊ မြို့ အရှေ့ခြမ်း လယ်ဦးရပ်ကွက်မှာ အမျိုးသား ၃ဦးစုစုပေါင်း ၆ဦးသေဆုံးသွားတယ်လို့ သိရပါတယ်။
Public Service Announcement
ဒဏ်ရာရရှိသူတွေလည်းရှိနေပြီး အရေအတွက်အတိအကျမသိရသေးပါဘူး။
မိုးကုတ်မြို့ လယ်ဦးအထက်ရွာ၊ မင်္ဂလာမဂ္ဂင်ကျောင်း၊ဘုံခုနှစ်ဆင့်၊မြို့ဦးလွင်စတဲ့နေရာတဝိုက်မှာ တိုက်လေယာဥ်တွေနဲ့ ဗုံးကြဲခဲ့တဲ့အတွက် လူနေအိမ် ၁၀လုံးထက်မနည်း ပျက်စီးသွားတယ်လို့ သိရပါတယ်။
စစ်တပ်ဝါဒဖြန့် တယ်လီဂရမ် ချန်နယ်တွေမှာလည်း မိုးကုတ်မြို့ကို မနေ့ညပိုင်းက ဗုံးကြဲတိုက်ခိုက်ခဲ့တာကို ဖော်ပြနေကြပါတယ်။
ဒီမနက်ပိုင်းမှာ ထွက်ပေါ်လာတဲ့ ရုပ်သံမှတ်တမ်းအရ လေကြောင်း တိုက်ခိုက်မှုကြောင့် အခိုင်အမာဆောက်ထားတဲ့ တိုက်တာအဆောက်အဦးတွေ ဆိုးဆိုးရွားရွား ပျက်စီးသွားတာတွေ့ရပါတယ်။
နာမည်ကျော် ပတ္တမြားကျောက်မျက်ရတနာထွက်ရှိတာကြောင့် လူသိများတဲ့ မိုးကုတ်မြို့ကို ပြီးခဲ့တဲ့ ဇူလိုင်လအတွင်း TNLA ဦးဆောင်တဲ့ ပူးပေါင်းတပ်က သိမ်းယူခဲ့ပါတယ်။
မိုးကုတ်မြို့ကို လက်လွှတ်ရချိန်ကတည်းက လေကြောင်းကနေ အပြင်းအထန် ဗုံးကြဲတိုက်ခိုက်ဖို့ စစ်တပ်ဝါဒဖြန့် တယ်လီဂရမ် ချန်နယ်တွေက လှုံ့ဆော်ခဲ့ကြတာပါ။ လက်ရှိမှာ TNLA က မြို့ အုပ်ချုပ်ရေးယန္တရား ထူထောင်ပြီး အုပ်ချုပ်နေပါတယ်။
စစ်ကောင်စီတပ်ဟာ တိုက်ပွဲ မဖြစ်ဘဲ အရပ်ဘက် ပစ်မှတ်တွေကို လေကြောင်းကနေ တိုက်ခိုက်နေတဲ့ လုပ်ရပ်ကို တားမြစ်ပေးဖို့ TNLA ၊ MNDAA နဲ့ AA တို့က ပြီးခဲ့တဲ့ သြဂုတ်လအတွင်း တရုတ်အစိုးရ ကို စာထုတ်ပြီးတောင်းဆိုခဲ့ပါတယ်။
မနေ့ညပိုင်းက မိုးကုတ်မြို့ ဗုံးကြဲခံရတဲ့ဖြစ်စဉ်ကတော့ တရုတ်ခရီးစဉ်ကနေ စစ်ကောင်စီခေါင်းဆောင်ပြန်ရောက်ပြီး ရက်ပိုင်းအကြာမှာပဲ တိုက်ခိုက်တာဖြစ်ပါတယ်။
