ဇေအောင်/People’s Spring
ရန်ကုန် – မန္တလေး အမြန်လမ်းတွင် နွားထိုးကြီး PDFက ယာဉ်စစ်ဆေးမှုပြုလုပ်ပြီးနောက် စစ်ကောင်စီလက်အောက်ခံ Non CDMဝန်ထမ်းများအပါအဝင် စစ်တပ်နှင့်ပတ်သက်သူများမှာ အမြန်လမ်းအား ရှောင်ကွင်းသွားလာနေကြောင်း စုံစမ်းသိရသည်။
ပြီးခဲ့သည့်ဒီဇင်ဘာ ၂၃ ရက်က ရန်ကုန်-မန္တလေး အမြန်လမ်း၊ ဝမ်းတွင်းမြို့နယ်နှင့် နွားထိုးကြီးမြို့နယ်ကြား မိုင်တိုင်(၃၁၈)အနီးတွင် နွားထိုးကြီး PDF ရဲဘော်များက ခရီးသွားယာဥ်များအား စစ်ဆေးမှုပြုလုပ်ခဲ့သည်။
ထိုသို့ စစ်ဆေးမှုများပြုလုပ်ပြီးနောက် မန္တလေးမှ နေပြည်တော်နှင့် ရန်ကုန်မြို့၊ ရန်ကုန်မှ မန္တလေးမြို့သို့ ကူးသန်းသွားလာကြမည့် စစ်ကောင်စီလက်အောက်ခံ Non CDM ဝန်ထမ်းများသည် အမြန်လမ်းပေါ်သို့ မဖြတ်သန်းရဲတော့ဘဲ မန္တလေး-မိတ္ထီလာလမ်းကြောအား ရန်ကုန် – မန္တလေးလမ်းဟောင်းမှတဆင့် သွားလာနေကြောင်း ဝန်ထမ်းများနှင့် နီးစပ်သူအချို့က ပြောသည်။
Public Service Announcement
“ဝန်ထမ်းတွေက အဓိကက နေပြည်တော်သွားဖို့ကို လမ်းမှာ PDF တွေက စစ်လိုက်တော့ ရှောင်သွားကြတာ။ရန်မန်းလမ်းဟောင်းကလာပြီး မိတ္ထီလာရောက်မှ အမြန်လမ်းပေါ်တက်ကြတော့တာ။”ဟု မန္တလေးဝန်ထမ်းလောကနှင့် နီးစပ်သူတစ်ဦးက ပြောသည်။
ထို့အပြင် အမြန်လမ်း၌ တိုက်ပွဲဖြစ်ပေါ်လာမည်စိုးရိမ်၍ အခြားခရီးသွားများကလည်း ရန်ကုန် – မန္တလေးလမ်းဟောင်းအား ပြန်လည်အသုံးပြုခြင်းများရှိလာကြောင်း သိရသည်။
နွားထိုးကြီး PDF နယ်မြေစိုးမိုးရာ နွားထိုးကြီးမြို့နယ်အတွင်းရှိ အမြန်လမ်းပိုင်းနေရာများအား ရှောင်ကွင်းသွားလာနေခြင်းဟု ဆိုသည်။
“သီးကုန်း ၂၈၅ မိုင် ယာဉ်ရပ်နားစခန်းကနေ လမ်းဟောင်းအတိုင်းဆင်းပြီး မန္တလေးကို သွားလို့ရတယ်။ အဲလမ်းအသုံးပြုလို့ရတယ်”ဟု အဆိုပါလမ်းပိုင်းအား သိနားလည်သူတစ်ဦးက ပြောသည်။
အမြန်လမ်း၌ Natogyi People Defence Force မြင်းခြံခရိုင် အမှတ် (၄-၁၀)တပ်ရင်းက ယာဉ်များစစ်ဆေးခဲ့ခြင်းဖြစ်ပြီး အဆိုပါနေရာများတွင် မကြာမီတိုက်ပွဲများ ရှိလာတော့မည်ဖြစ်၍ ပြည်သူများ မလိုအပ်ဘဲ ခရီးမသွားကြရန်၊တိုက်ပွဲနှင့် တိုးလျှင် ရှေ့ဆက်မမောင်းဘဲ နီးစပ်ရာ လုံခြုံသည့် နေရာတွင် နေထိုင်ကြရန် ခရီးသွားပြည်သူများအား နွားထိုးကြီး PDF တာဝန်ရှိသူက ပြောကြားခဲ့သည်။
ပြီးခဲ့သည့် ဒီဇင်ဘာ ၁၂ ရက်ကလည်း ရန်ကုန် – မန္တလေး အမြန်လမ်း၊ မိုင်တိုင်(၃၁၉)အနီးရှီ စစ်ကောင်စီ စစ်ဆေးရေးဂိတ်ကို နွားထိုးကြီး PDFက တိုက်ခိုက်ခဲ့သေးသည်။
