ဟန်နွေ/People’s Spring
ကရင်ပြည်နယ်၊ ဖာပွန်မြို့နှင့် ကမမောင်းမြို့အကြားရှိ စစ်ကောင်စီ၏ ကတိုင်တိတပ်စခန်းကို ကရင်အမျိုးသားလွတ်မြောက်ရေးတပ်မတော် (KNLA)နှင့် တော်လှန်ရေးပူးပေါင်းတပ်က စတင်တိုက်ခိုက်နေပြီဖြစ်ကြောင်း KNLA တပ်မဟာ(၅) ပြောရေးဆိုခွင့်ရှိသူ ဗိုလ်မှူးကြီးစောကလယ်ဒိုက ယနေ့ (ဒီဇင်ဘာ ၃၀ရက်) ညပိုင်းတွင် ပြောကြားသည်။
ကတိုင်တိတပ်စခန်းကို KNLAပူးပေါင်းတပ်က ဒီဇင်ဘာ ၂၉ရက်က စတင်တိုက်ခိုက်ခဲ့ရာ တော်လှန်ရေးပူးပေါင်းတပ်ဘက်က စစ်ကောင်စီ လက်အောက်ခံ နယ်ခြားစောင့်တပ် BGF (၁၀၁၃)တပ်ရင်းက ပါဝင်တိုက်ခိုက်နေကြောင်း ဒေသတွင်း သတင်းဌာနဖြစ်သော Salween Press က KNU သတင်းရင်းမြစ်ကို ကိုးကား ဖော်ပြထားသည်။
ယင်းနှင့်ပတ်သက်၍ ဗိုလ်မှူးကြီးစောကလယ်ဒိုက “ဖာပွန်ကမမောင်းကြားရှိကတိုင်တိ စကစတပ်စခန်းကိုတော်လှန်ရေးပူးပေါင်းတပ်ဘက်မှစတိုက်နေပြီဆိုတာတော့ဟုတ်တယ်။ဒါပေမဲ့BGF (၁၀၁၃)တပ်ရင်း ပူးပေါင်းပါဝင်မှုရှိ၊မရှိကိုတော့အတိအကျ အတီး မသိရဘူးနော်”ဟု ပြောသည်။
Public Service Announcement
KNLA ပူးပေါင်းတပ်သည် နိုဝင်ဘာလနှင့် ဒီဇင်ဘာလအတွင်း ဖာပွန်-ကတိုင်တိ- ကမမောင်းလမ်းရှိ စစ်ကောင်စီတပ်စခန်းများ ကို တစ်ခုပြီးတစ်ခု တိုက်ခိုက်သိမ်းပိုက်လျက်ရှိသည်။
မထောတပ်စခန်း၊ ကူးဆိပ်တပ် စခန်း၊ တောင်သုံးလုံးတပ်စခန်းများကို သိမ်းပိုက်ထားသည်။
ထို့ပြင် ဖာပွန်မြို့ကို တော်လှန်ရေးပူးပေါင်းတပ်က ထိန်းချုပ်ထားပြီး မြို့အနီး စစ်ကောင်စီ ဗျူဟာကို ဝိုင်းပတ်ပိတ်ဆို့ တိုက်ခိုက်လျက်ရှိသည်။
“ကတိုင်တိစခန်း ရရင်တော့ ဖာပွန်ဗျူဟာကုန်းသာ ကျန်ပြီး ဖာပွန်အောက်ဘက်မှာ ဆိုရင် စကစ စခန်းက ဒီ ကမမောင်းလောက်မှာပဲ ကျန်တော့မယ်ဆိုတော့ တော်လှန်ရေး လှုပ်ရှားမှု နယ်မြေအများကြီး ကျယ်လာတယ်”ဟု ဗိုလ်မှူးကြီး စောကလယ်ဒိုက ပြောသည်။
စစ်ကောင်စီဝါဒဖြန့် လူမှုကွန်ရက်အကောင့်အချို့ကလည်း ကတိုင်တိ ဗျူဟာကို KNU ပူးပေါင်းတပ်က တိုက်ခိုက်နေပြီး BGFက KNUထံ ဘက်ပြောင်းသွားသည်ဆိုသည့် ရေးသားမှုကိုလည်း တွေ့ရသည်။
ယခင် စစ်ကောင်စီလက်အောက်ခံ BGFသည် ယခုနှစ်ဆန်းတွင် ကရင်အမျိုးသားတပ်မတော် (KNA)အဖြစ် အမည်ပြောင်းထားခြင်း ဖြစ်သည်။
ကရင်နှစ်သစ်ကူးကာလတွင် ကရင် လက်နက်ကိုင်တပ်ဖြစ်သည့် BGFက KNU ပူးပေါင်းတပ်နှင့် အတူ စစ်ကောင်စီကို တိုက်ခိုက် သည်ဆိုသည့် သတင်းအပေါ် ကရင်အသိုင်းအဝိုင်းက ကြိုဆိုခဲ့ကြသည်ကိုလည်း တွေ့ရသည်။
” ဒါမျိုး ဖြစ်လာပါစေလို့ မျှော်လင့်နေတာ ကြာလှပြီပေါ့။ ကရင်တွေညီရင် ဘာမဆို ဖြစ်နိုင်တယ်”၊ “BGF ပြည်သူနဲ့ တကယ်ပူးပေါင်းရင် အရမ်းဝမ်းသာစရာပါ”ဟု လူမှုကွန်ရက်၌ ရေးသား ကြိုဆိုမှုကိုလည်း တွေ့ရသည်။
