ရဲခေါင်/People’s Spring
မန္တလေးတိုင်း၊ မလှိုင်မြို့နယ်တိုက်ပွဲအတွင်း စစ်ကောင်စီတပ်သား ခြောက်ဦးသေဆုံးပြီး တစ်ဦးအရှင်ဖမ်းမိကာ လက်နက်သုံးလက်လည်းရရှိခဲ့ကြောင်း မလှိုင်မြို့နယ်ပြည်သူ့ကာကွယ်ရေးအဖွဲ့(ပကဖ) တာဝန်ရှိသူက လူထုနွေဦးသို့ ပြောသည်။
မလှိုင်မြို့နယ်ရှိ သုံးတောင်ကျေးရွာနှင့် သရက်ကောင်းပင်ကျေးရွာများရှိ စစ်ကောင်စီ အထိုင်ချတပ်စွဲထားသောနေရာများကို ဇန်နဝါရီ ၂ရက် နံနက် ၁၀နာရီတွင် တော်လှန်ရေးတပ်ဖွဲ့များက တပြိုင်တည်းဝင်ရောက်တိုက်ခိုက်ခဲ့သည်ဟု ဆိုသည်။
“သုံးတောင်ရွာနဲ့ သရက်ကောင်းပင်ရွာက မလှိုင်မြို့နယ်နဲ့ နွားထိုးကြီးမြို့နယ် အစပ်မှာရှိကြတာပါ၊ ရန်သူတွေ တပ်စွဲနေထိုင်ကြတာကတော့ တနှစ်ကျော်လောက်ရှိပါပြီ၊ ဒီတိုက်ပွဲက မလှိုင်မြို့နယ်အတွင်းမှာ ရန်သူကို အရှင်ဖမ်းဆီးရမိတာနဲ့ လက်နက်ခဲယမ်းသိမ်းဆည်းရမိတဲ့ ပထမဆုံးတိုက်ပွဲလို့ပြောရမှာဖြစ်ပါတယ်”ဟု မလှိုင်မြို့နယ် ပကဖ တာဝန်ရှိသူက ပြောသည်။
Public Service Announcement
တိုက်ပွဲမှာ ၁နာရီခန့်ဖြစ်ပွားခဲ့ပြီး စစ်ကောင်စီတပ်မှ တပ်ကြပ်ကြီးတစ်ဦးကိုလည်း အရှင်ဖမ်းမိခဲ့သည့်အပြင် G-3 အမျိုးအစားသေနက် (၃)လက်နှင့် ခဲယမ်းများလည်းသိမ်းဆည်း ရခဲ့သည်ဟု ဆိုသည်။
ထို့အပြင် စစ်ကောင်စီတပ်သားခြောက်ဦး မျက်မြင်သေဆုံးကာ အများအပြားဒဏ်ရာရရှိခဲ့ကြောင်း လည်း မလှိုင်မြို့နယ် ပကဖက ထုတ်ပြန်ထားသည်။
အဆိုပါ တိုက်ခိုက်မှုကို မြင်းခြံခရိုင်တပ်ရင်းအမှတ်(၃)၊ အမှတ်(၄)၊ အမှတ်(၈)၊ အမှတ်(၁၀)တပ်ရင်းများ၊ မိတ္ထီလာခရိုင် အမှတ်(၂) တပ်ရင်း(MHLG – PDF)နှင့် နွားထိုးကြီးမြို့နယ် ပ.က.ဖ၊ မလှိုင်မြို့နယ် ပ.က.ဖတို့ ပူးပေါင်း တိုက်ခိုက်ခဲ့ခြင်းဟု ဆိုသည်။
