ဟန်နွေ/People’s Spring
ကချင်ပြည်နယ် မံစီမြို့ရှိ စစ်ကောင်စီ လက်ကျန်တပ်ရင်း ၃ခုကို ယနေ့(ဇန်နဝါရီ ၈ရက်)တွင် ကချင်လွတ်လပ်ရေးတပ်မတော်(KIA)ပူးပေါင်းတပ်က အပြီးသတ်သိမ်းပိုက်ခဲ့ရာ သိမ်းရထားသည့် တပ်ရင်းများ၌ ကချင်အမျိုးသားအလံ လွှင့်ထူခဲ့သည်။
KIA ပူးပေါင်းတပ်သည် မံစီမြို့ရှိ စစ်ကောင်စီ၏ ခမရ(၆၀၁)၊ ခမရ(၃၁၉) နှင့်အမတ (၃၅၂) တပ်ရင်းများကို ယနေ့ နံနက်တွင် သိမ်းပိုက်ခဲ့ရာ စစ်သုံ့ပန်းနှင့်လက်နက်ခဲယမ်းများစွာ သိမ်းရခဲ့သည်ဟု စစ်ရေး သတင်းရင်းမြစ်က ပြောသည်။
ထို့ပြင် သိမ်းရထားသည့် စစ်ကောင်စီတပ်ရင်းနေရာများ၌ ကချင်အမျိုးသားအလံ လွှင့်ထူခဲ့ကြသည့် KIA ရဲဘော်များ၏ မှတ်တမ်းဓာတ်ပုံများကိုလည်း လူမှုကွန်ရက်၌ ဖော်ပြခဲ့ကြသည်။
Public Service Announcement
KIAပူးပေါင်းတပ်သည် မံစီနှင့် ဗန်းမော်မြို့သိမ်း စစ်ဆင်ရေးကို ၂၀၂၄ ဒီဇင်ဘာ ၄ရက်တွင် စတင်ခဲ့ခြင်းဖြစ်ပြီး ၁လကျော်အကြာတွင် မံစီမြို့ရှိ လက်ကျန်စခန်းအားလုံး သိမ်းပိုက်ကာ မြို့နယ်တစ်ခုလုံးကို သိမ်းပိုက်နိုင်ခဲ့ပြီဖြစ်သည်။
KIAနှင့် မဟာမိတ်များသည် ဗန်းမော်မြို့ကိုလည်း ထိုးစစ်အရှိန်မြှင့်ပြီး တိုက်ခိုက်နေသည်မှာ ဇန်နဝါရီ ၆ရက်နေ့မှ ဖြစ်ပြီး ၃ရက်ဆက် တိုက်ပွဲများရှိကာ စစ်ကောင်စီတပ်က လေကြောင်းပစ်ကူအများအပြားဖြင့် ခုံခံလျက်ရှိသည်။
