ကဖေး/People’s Spring
ရခိုင်ပြည်နယ်ကို လေကြောင်းတိုက်ခိုက်မှုများဆက်တိုက်ပြုလုပ်လာသည့် စစ်ကောင်စီတပ်က ပေါက်တောမြို့နယ်ကိုလည်း ယနေ့ ထပ်မံ ဗုံးကြဲတိုက်ခိုက်ခဲ့ကြောင်း သတင်းရရှိသည်။
ပေါက်တောမြို့နယ်၊ တောင်ဦးမော်ကျေးရွာကို ယနေ့(ဇန်နဝါရီ ၁၂ ရက်)နံနက် ၁၁ နာရီ ၁၅မိနစ်ခန့်တွင် စစ်ကောင်စီက ဂျက်ဖိုက်တာဖြင့် လေကြောင်းမှ ဗုံးကြဲခြင်းဟု ပေါက်တောမြို့ခံစစ်ဘေးရှောင်တစ်ဦးက ပြောသည်။
” လူတွေရှိနေတဲ့ ကျေးရွာကိုပစ်သွားတာတဲ့။ ညီမတို့က အဝေးမှာရောက်နေတော့ သေချာတော့ မသိရသေးဘူး။ ဖိုက်တာ(ဂျက်ဖိုက်တာ)နဲ့ ချသွားတာလို့ သိရတယ်”ဟု ၎င်းစစ်ဘေးရှောင်က ပြောသည်။
Public Service Announcement
မြေပြင်အခြေအနေထိခိုက်မှုကို မသိရှိရသေးပေ။ စစ်ကောင်စီဝါဒဖြန့်ချိရေး တယ်လီဂရမ်ချန်နယ်များတွင် ပေါက်တောမြို့ကို လေကြောင်းတိုက်ခိုက်ခဲ့ကြောင်း ရေးသားနေကြသည်။
ပေါက်တောမြို့ကို ၂၀၂၄ ဇန်နဝါရီ ၁၉ရက်တွင် အာရက္ခတပ်တော်(AA)က သိမ်းယူထားခြင်းဖြစ်သည်။
စစ်ကောင်စီက မြို့ပေါ်ရပ်ကွက်များကို လေကြောင်းမှတိုက်ခိုက်ဖျက်ဆီးခဲ့သည်။
၂၀၂၄ ခုနှစ် စက်တင်ဘာ ၈ရက်တွင်ပေါက်တောမြို့နယ်ကို စစ်ကောင်စီကလေကြောင်းမှတိုက်ခိုက်စဉ် တိုက်ပွဲများအတွင်း AAဖမ်းဆီးထားသည့် စစ်သုံ့ပန်းများ သေဆုံးခဲ့ဖူးသည်။
ပေါက်တောမြို့နယ် ရှင်ရွာကျေးရွာရှိ စစ်သုံ့ပန်းများနှင့် အကျဉ်းသားများအား ဆေးကုသပေးနေသောနေရာကို စစ်ကောင်စီက လေကြောင်းမှဗုံးကြဲတိုက်ခိုက်ခြင်းဖြစ်သည်။ စစ်သုံ့ပန်းစစ်ကောင်စီအရာရှိအချို့အပါအဝင် ၁၇ဦး သေဆုံးပြီး ၁၀ဦး ဒဏ်ရာရကြောင်း အာရက္ခတပ်တော်(AA)က သတင်းထုတ်ပြန်ခဲ့သည်။
စစ်ကောင်စီသည် ရခိုင်ပြည်နယ်အတွင်း AAထိန်းချုပ်ထားသည့်မြို့နယ်များကို လေကြောင်းမှမကြာခဏ တိုက်ခိုက်နေသည်။
ပြိးခဲ့သည့် ဇန်နဝါရီ ၄ရက်က ဂွမြို့နယ်ကို လေကြောင်းမှတိုက်ခိုက်ရာ အရပ်သားတစ်ဦးသေဆုံးခဲ့သည်။ ဇန်နဝါရီ ၈ရက်တွင် ရမ်းဗြဲမြို့နယ် ကျောက်နီမော်ကျေးရွာကို ဗုံးကြဲတိုက်ခိုက်ရာ ဒေသခံ ၂၆ဦးသေဆုံးပြီး ၂၀ကျော်ဒဏ်ရာရခဲ့သည်။ ပျောက်ဆုံးနေသည်များလည်းရှိသည်ဟု AAက ထုတ်ပြန်ထားသည်။ ဇန်နဝါရီ ၁၀ရက်က ကျောက်တော်မြို့နယ်ကို ဗုံးကြဲတိုက်ခိုက်ရာ အရပ်သား ရှစ်ဦးထက်မနည်းသေဆုံးသည်ဟု သတင်းရရှိသည်။
စစ်ရှုံးနေသော စစ်ကောင်စီသည် ပြည်သူများအား ပစ်မှတ်ထားပြီး ဆေးရုံ၊ ဆေးခန်းများ၊ စာသင်ကျောင်းများ၊ ဘာသာရေးအဆောက်အအုံများ၊ ဈေးများ၊ လမ်းတံတားများနှင့်လူနေရပ်ကွက်များကို လေယာဉ်ဖြင့်ဗုံးကြဲတိုက်ခိုက်ခြင်း၊ လက်နက်ကြီးများဖြင့် ပစ်ခတ်တိုက်ခိုက်မှုများနေ့စဉ်ပြုလုပ်နေပြီး စစ်ရာဇဝတ်မှုများကျူးလွန်နေကြောင်းနှင့် ကျူးလွန်သူများကိုဖော်ထုတ်အရေးယူသွားမည်ဟု AA က ထုတ်ပြန်ထားသည်။
စစ်ကောင်စီ၏ လေကြောင်းတိုက်ခိုက်မှုများအတွက် အာဆီယံနှင့် ကုလသမဂ္ဂအဖွဲ့ဝင်နိုင်ငံများမှ နိုင်ငံတကာကုမ္ပဏီများအနေဖြင့် လေယာဉ်ဆီနှင့် ဆက်စပ်ပစ္စည်းများပံ့ပိုးပေးနေသည့်ကိစ္စရပ်များ ရပ်တန့်ပေးရန် သွေးစွန်းငွေဖြတ်တောက်ရေး လှုပ်ရှားမှုအဖွဲ့ (Blood Money Campaign – BMC) က ဇန်နဝါရီ ၁၀ရက်တွင် တောင်းဆိုထားသည်။
