ကဖေး/People’s Spring
တအာင်းတပ်မတော်(TNLA)ထိန်းချုပ်ထားသည့် ရှမ်းပြည်နယ်မြောက်ပိုင်း၊ကျောက်မဲမြို့မဈေးကို စစ်ကောင်စီက လေကြောင်းမှ ဗုံးကြဲတိုက်ခိုက်ခဲ့သည်။
ယနေ့(ဇန်နဝါရီ၂၅ရက်) နေ့လယ် ၁နာရီ၂၅ မိနစ်တွင် ဂျက်ဖိုက်တာဖြင့် ဗုံးကြဲသွားခြင်းဖြစ်သည်။
“လေကြောင်းကနေ နှစ်ကြိမ်ပစ်ချသွားတယ်။ ဈေးဆိုတော့ အထိအခိုက်များမယ်ထင်တယ်။ အခု ကျမတို့ ဗုံးကျင်းထဲ ဝင်နေကြရတယ်”ဟု ကျောက်မဲဒေသခံတစ်ဦးက ပြောသည်။
Public Service Announcement
ဇန်နဝါရီ ၁၃ရက်ကလည်း စစ်ကောင်စီက ကျောက်မဲမြို့ကို ဂျက်ဖိုက်တာဖြင့် ဗုံးကြဲခဲ့သေးသည်။
TNLAသည် ၁၀၂၇စစ်ဆင်ရေးတွင် ရှမ်းပြည်နယ်မြောက်ပိုင်းမှ ကျောက်မဲမြို့၊ သီပေါ၊နမ့်ဆန်၊ မိုင်းလုံ၊ မိုးမိတ်၊ မန်တုံ၊နမ္မတူ၊ ကွတ်ခိုင်၊ နောင်ချို၊နမ့်ခမ်း၊မိုင်းငေါ့မြို့နှင့် မန္တလေးတိုင်းမှ မိုးကုတ်မြို့ကို သိမ်းပိုက်ထားသည်။
ဒေသအနှံ့ရှိ တော်လှန်ရေးအင်အားစုများနှင့်လက်တွဲ၍ စစ်ကောင်စီကို အပြီးတိုင်ချေမှုန်းတော်လှန်သွားမည်ဟု TNLAက ဇန်နဝါရီ ၁၂ရက် တွင် ထုတ်ပြန်ထားသည်။
စစ်ကောင်စီသည် ယခု ဇန်နဝါရီအတွင်း TNLA ထိန်းချုပ်ဒေသများမှ ကျောက်မဲမြို့အပြင် နောင်ချို၊ မိုးကုတ်မြို့တို့ကိုလည်း လေကြောင်းမှတိုက်ခိုက်ခဲ့ရာ အရပ်သားထိခိုက်သေဆုံးမှုများရှိခဲ့သည်။
