ညောင်ဦးမြို့နယ်မှာ တိုက်ပွဲဖြစ်ပြီး စစ်ကောင်စီ ပထမဆုံးအကြိမ် လေကြောင်းတိုက်ခိုက်

မေ/People’s Spring

မန္တလေးတိုင်း၊ ညောင်ဦးမြို့နယ်ထဲမှာ တိုက်ပွဲဖြစ်ပွားနေပြီး စစ်ကောင်စီက ဒီကနေ့မနက်မှာလေကြောင်းတိုက်ခိုက်ခဲ့တယ်လို့ဒေသခံတွေက ပြောပါတယ်။

ညောင်ဦးမြို့နယ်ထဲက ပုဂံမြို့သစ်ရဲ့ အရှေ့တောင်ဘက်က ကျောက်ပြင်ကန်နဲ့ဂျိုးကန်ကျေးရွာအနီးမှာ တိုက်ပွဲဖြစ်ပွားနေပြီး ဒီနေ့မနက် ၇နာရီလောက်ကတည်းက စစ်ကောင်စီက လေယာဥ်နဲ့ဗုံးကြဲနေတာလို့ ဒေသခံတွေက ပြောပါတယ်။

“ဂျိုးကန်ရွာကို မနေ့ညကစစ်ကြောင်းဝင်ပြီးတဲ့နောက်တိုက်ပွဲဖြစ်တာလို့ ပြောတယ်။လေယာဥ်ကြဲတာ မီးခိုးလုံးတွေပါမြင်နေရတယ်”လို့ ဒေသခံတဦးက ပြောပါတယ်။

Public Service Announcement

လေကြောင်းတိုက်ခိုက်မှုမှာ ပြည်သူထိခိုက်မှုကိုတော့ မသိရသေးပါဘူး။

“ဒီနေ့ ၁၁ နာရီမှာစကစ ကရဟတ်ယာဥ်နဲ့ဗုံးလာကြဲပါတယ်။ကျောက်ပြင်ကန်ရွာနဲ့ဂျိုးကန်ရွာကိုစစ်ကြောင်းထိုးပြီးလက်နက်ကြီးတွေနဲ့ပစ်ပြီးလေကြောင်းကလဲဗုံးကြဲနေပါတယ်။အခုကျောက်ပြင်ကန်ရွာထဲမှာအိမ်တွေကပစ္စည်းတွေယူနေပါတယ်”လို့ ​ဒေသခံ တဦးက​ပြောပါတယ် ။

လေကြောင်းတိုက်ခိုက်မှုကြောင့် ညောင်ဦးမြို့နယ်က ကျေးရွာတွေ စစ်ဘေးရှောင်နေကြတယ်လို့ ဆိုပါတယ်။

စစ်​ကြောင်းထိုးတဲ့အခါ ​ချောက်မြို့ဘက်က​နေ ခန့်မှန်းအင်အား ၇၀ ​လောက်နဲ့ လက်နက်ကြီး​တွေပစ်ပြီး စစ်​ကြောင်းထိုးတာလို့​ဒေသခံ​တချို့က​ပြောပါတယ်။​ဒါအပြင် ရဟတ်ယာဥ်နဲ့လည်းစစ်သားအချို့ထပ်ပို့ခဲ့ပြီး အ​ရေအတွက်​တော့မသိရဘူးလို့​ဒေသခံ​တွေက​ပြောပါတယ်။

ကျောက်ပြင်ကန်ရွာမှာ ​ဖေ​ဖော်ဝါရီ ၁၃ ရက်​နေ့က သားရှင်ပြုအလှူပွဲရှိ​တာမှာ စစ်​ကောင်စီက ​လေ​ကြောင်းကတိုက်ခိုက်၊စစ်​ကြောင်းထိုးတာ​​ကြောင့်အလှူပွဲလည်းပျက်ခဲ့ပါတယ်။

ညောင်ဦးမြို့နယ်ကို စစ်ကောင်စီက လေကြောင်းတိုက်တာ ပထမဆုံးအကြိမ်လို့လည်း ဒေသခံတွေက ပြောပါတယ်။

တိုက်ပွဲဖြစ်ပွားတဲ့နေရာဟာ စစ်ကောင်စီ တပ်ရင်းတွေနဲ့နီးတဲ့နေရာတွေဖြစ်တာမို့ သတင်းမထုတ် ပြန်နိုင်သေးဘူးလို့ အဲဒီနယ်မြေက တော်လှန်ရေးတပ်တွေကတော့ ပြောပါတယ်။

တိုက်ပွဲနဲ့ပတ်သက်ပြီး ညောင်ဦးမြို့နယ်ပြည်သူ့ကာကွယ်ရေးအဖွဲ့(ပကဖ) တာဝန်ခံကိုဆက်သွယ်ထားပေမယ့်လည်းအကြောင်းမပြန်သေးပါဘူး။

​ဖေ​ဖော်ဝါရီ ၁၃ ရက်နေ့ ​နေ့လယ်ပိုင်းမှာတော့ တိုက်ပွဲသံငြိမ်နေပြီး ဒေသခံတွေကတော့ ပြန်မဝင်ကြသေးဘူးလို့ သိရပါတယ်။

ဒါ့အပြင် ညောင်ဦးမြို့နယ်က လူငယ်တွေကိုလည်း စစ်ကောင်စီတပ်က စစ်မှုထမ်းဖို့ ဖမ်းဆီးနေတယ်လို့လည်း ဒေသခံတွေက ပြောပါတယ်။
ဇီးစားမြင်ရွာက လူငယ်တွေအဖမ်းခံရတာလို့​ဒေသခံတချို့က​ပြောပါတယ်။

ကျောက်ပြင်ကန်နဲ့ ဂျိုးကန်ကျေးရွာဟာ ပုဂံမြို့ရဲ့ အရှေ့တောင်ဘက်၊ ပုဂံ – ချောက်ကားလမ်းမပိုင်းအရှေ့ဘက်မှာ ရှိပါတယ်။