စစ်ကိုင်းတိုင်း၊ ကနီမြို့နယ် ချင်းတွင်းမြစ်ကမ်းဘေးကျေးရွာဖြစ်သည့် နတ်ကြီးရွာကို စစ်ကောင်စီက ယနေ့(မတ်လ ၁၀ရက်)နေ့လည်ပိုင်းမှစ၍ လေကြောင်းမှ သုံးကြိမ်တိုက်ခိုက်ခဲ့ရာ ဒေသခံအရပ်သားထိခိုက်သေဆုံးမှုများရှိနေသည်။
ယနေ့ နေ့လည် ၂နာရီ ၅၂မိနစ်မှ ညနေ ၅နာရီ ၂၆မိနစ်အတွင်း ဂျက်ဖိုက်တာ သုံးစီးဖြင့် ပေါင် ၅၀၀ဗုံး သုံးလုံးကြဲချခြင်းဖြစ်ကြောင်း ဒေသခံများကပြောသည်။
ပထမအကြိမ်တိုက်ခိုက်မှုတွင် အရပ်သားတစ်ဦးသေဆုံးခဲ့သည်။ နောက်ထပ်နှစ်ကြိမ်တိုက်ခိုက်မှုကြောင့် ထိခိုက်မှုကိုအခြေအနေကို မသိရသေးပေ။
Public Service Announcement
ဒေသခံများသည် ဗုံးခိုကျင်းများအတွင်းပုန်းအောင်းနေရသလို အချို့မှာ ဘေးလွတ်ရာသို့ ထွက်ပြေးတိမ်းရှောင်နေရသည့်အခြေအနေဖြစ်သည်။
ဖေဖော်ဝါရီ ၁၈ရက်က နီမြို့နယ် ချောင်းမရွာရှိ လက်ဖက်ရည်ဆိုင်ကို စစ်ကောင်စီက ဂျက်ဖိုက်တာဖြင့်လေကြောင်းမှ ဗုံးကြဲတိုက်ခိုက်ရာ ဒေသခံငါးဦး သေဆုံးခဲ့သည်။
စစ်ကောင်စီသည် ဖေဖော်ဝါရီ ၇ရက်မှစ၍ ကနီမြို့နယ်အတွင်း ပစ်မှတ်ထားထား၍ လေကြောင်းတိုက်ခိုက်မှုများပြုလုပ်နေသည်။ ဖေဖော်ဝါရီ ၁၇ရက် နေ့လည်ပိုင်းတွင် မုဌောရွာအနီးချင်းတွင်းမြစ်ဆ်ိပ်ကမ်းတနေရာကို စစ်ကောင်စီက ဂျက်ဖိုက်တာဖြင့် လေကြောင်းမှတိုက်ခိုက်ရာ ခရီးသွားသံဃာတော်တစ်ပါးနှင့် အရပ်သားတစ်ဦး ဒဏ်ရာရရှိခဲ့သည်။ ဆိပ်ကမ်းအနီးရှိ ကားနှင့်မော်တော်အချို့ မီးလောင်ပျက်စီးခဲ့သည်။
ကနီမြို့နယ်အတွင်း စစ်ကောင်စီက စက်တပ်လေထီးများ အသုံး၍ လေကြောင်းမှတိုက်ခိုက်ရာ အရပ်သား သုံးဦးသေဆုံးပြီး နေအိမ်အချို့ပျက်စီးခဲ့သည်။
ကနီမြို့နယ်သည် မုံရွာမြို့အခြေစိုက် အနောက်မြောက်တိုင်းစစ်ဌာနချုပ်(နမခ)နှင့် မဝေးသောကြောင့် လေကြောင်းအန္တရာယ်နှင့်စက်တပ်လေထီးအသုံးပြုတိုက်ခိုက်နိုင်သည့် ဖြစ်စဉ်မျိုးမကြာခဏကြုံတွေ့လာနိုင်ပြီး ဒေသခံပြည်သူများအနေဖြင့် အထူးသတိပြုနေထိုင်ကြရန် ကနီမြို့နယ်ပြည်သူ့ကာကွယ်ရေးအဖွဲ့က သတိပေးထားသည်။
