ကရင်နီပြည်နယ်၊ ဒီးမော့ဆိုမြို့နယ်ရှိ စစ်ရှောင်စခန်းတစ်ခုအား စစ်ကောင်စီက လေကြောင်းမှ ဗုံး ၁၅လုံးထက်မနည်းကြဲ တိုက်ခိုက်ခဲ့ကြောင်း ကရင်နီအရေးပေါ်ကယ်ဆယ်ရေး(CTER-Karenni)က ယနေ့(မတ်လ ၁၂ ရက်) အသိပေးထုတ်ပြန်သည်။
စစ်ကောင်စီသည် မတ်လ ၁၁ ရက် ည ၇ နာရီကျော်တွင် ဒီးမော့ဆိုမြို့နယ်ရှိ စစ်ရှောင်စခန်းတစ်ခုကို လေယာဉ်ဖြင့် သုံးကြိမ်လာရောက်ပြီး ဗုံးအလုံးရေ ၁၅ လုံးထက်မနည်း ကြဲတိုက်ခိုက်ခဲ့ကြောင်းအသိပေးသည်။
“စစ်ရှောင်စခန်းတစ်ခုတည်းကို လေယာဉ်သုံးကြိမ်လာကြဲတယ်။ ဗုံးအလုံးရေ ၁၅ လုံးလောက်ကြဲသွားတယ်။ စခန်းတစ်ခုလုံးကို နေရာလွတ်မရှိအောင်ကြဲသွားတာ”ဟု ဒီးမော့ဆိုမြို့နယ်ရှိ စစ်ရှောင်ပြည်သူတစ်ဦးက ပြောသည်။
Public Service Announcement
ဗုံးကြဲတိုက်ခိုက်မှုကြောင့် အသက်(၄၀)အရွယ် အမျိုးသားတစ်ဦး ဒဏ်ရာရရှိခဲ့ပြီး စစ်ရှောင်တဲအိမ်များ ပျက်စီးမှုရှိကြောင်း သိရသည်။
၂၀၂၅အတွင်း စစ်ကောင်စီသည် ကရင်နီပြည်နယ်ကို လက်နက်ကြီးပစ်ခတ်မှုအပါအဝင် ဒရုန်း၊ လေကြောင်းတိုက်ခိုက်မှုများ အကြိမ်ကြိမ်ပြုလုပ်နေပြီး စစ်ရှောင်လူထုအပေါ် ခပ်စိပ်စိပ်ပစ်မှတ်ထားတိုက်ခိုက်လာသည်ကိုလည်း တွေ့ရကြောင်း CTER-Karenni ဖော်ပြသည်။
မကြာသေးမီရက်ပိုင်းကလည်း ဒီးမော့ဆိုမြို့နယ် နောက်ဘက်ခြမ်းနှင့် မော်ချီးဒေသတို့ကို စစ်ကောင်စီက အသေခံဒရုန်းနှင့် လေကြောင်းတိုက်ခိုက်ခဲ့၍ ဒေသခံ နှစ်ဦးသေဆုံးပြီး ၁၀ဦးကျော် ဒဏ်ရာရရှိခဲ့သည်။
အာဏာသိမ်းစစ်တပ်၏ သတ်ဖြတ်မှုကြောင့် လေးနှစ်ကျော်အတွင်း ကရင်နီပြည်နယ်၌ အရပ်သား ၆၀၀ကျော် သေဆုံးခဲ့ရကြောင်း ကရင်နီလူမှုအသင်းအဖွဲ့များကွန်ရက်က ထုတ်ပြန်ထားသည်။
၂၀၂၁ ဖေဖော်ဝါရီနောက်ပိုင်းမှ ယခုနှစ် ဖေဖော်ဝါရီအထိ ကရင်နီပြည်နယ်၏ မြို့နယ်ရှစ်ခုတွင် နေရပ်စွန့်ခွာ၍ စစ်ဘေးရှောင်နေရသည့် ပြည်သူ နှစ်သိန်းရှစ်သောင်းကျော်အထိ ရှိနေသည်။
