စစ်ကိုင်းမြို့နယ်၊ စဉ့်ကိုင်ကျေးရွာကို မနေ့(မတ်လ ၁၆ရက်)ညပိုင်းက စစ်တပ်ကလေကြောင်းတိုက်ခိုက်ခဲ့တာကြောင့် သက်ကြီးရွယ်အိုနဲ့ လသားကလေးငယ်အပါအဝင် သေဆုံးသူ ၄ဦးရှိပြီး ထိခိုက်ဒဏ်ရာရသူတွေရှိတယ်လို့ ဒေသခံတွေက ပြောပါတယ်။
မတ်လ ၁၆ရက် ည ၁၀နာရီ ကျော်လောက်မှာ စစ်ကောင်စီရဲ့ တံတားဦး လေတပ်က တက်လာတဲ့ ဂျက်ဖိုက်တာနဲ့လေကြောင်းတိုက်ခိုက်မှု ပြုလုပ်ခဲ့တာလို့ သိရပါတယ်။
လေကြောင်းတိုက်ခိုက်မှုမှာ နေအိမ်တွေပေါ်ကျရောက်ပြီး အသက် ၈၀ကျော်အရွယ် အဖိုး၊အဖွား၂ဦး၊ အသက် ၃၀ကျော်အမျိုးသမီး ၁ဦး၊၆လသားအရွယ် ကလေးငယ် ၁ဦးတို့ သေဆုံးခဲ့တယ်လို့ ဒေသခံအချို့က ပြောပါတယ်။
Public Service Announcement
“ရွာထဲ သက်သက်ကြီး ကြဲမယ်မထင်တော့ အကုန်စိတ်ချလက်ချအိပ်နေကြတာလေ။ လေယာဉ်သံကလည်း အမြဲကြားနေကြဆိုတော့ သတိမထားမိတာ။ သုံးလေးခါပတ်ဝဲပြီးကို ဗုံးကြဲတာ”လို့ ဒေသခံတစ်ဦးက ပြောပါတယ်။
စဉ့်ကိုင်ကျေးရွာမှာ တိုက်ပွဲဖြစ်ပွားခြင်းမရှိဘဲ စစ်တပ်က လေကြောင်းတိုက်ခိုက်မှုပြုလုပ်ခဲ့တာလို့ ဒေသခံတွေက ပြောပါတယ်။
မနေ့ကပဲ နောင်ချိုမြို့ပေါ်က ဘုန်းကြီးကျောင်းကို စစ်တပ်က လေကြောင်းတိုက်ခိုက်ခဲ့လို့ သံဃာ ၆ပါးအပါအဝင် စုစုပေါင်း ၉ဦး သေဆုံးခဲ့တယ်ကြောင်း တအာင်းတပ်မတော်(TNLA)က ဒီနေ့ မနက်ပိုင်းမှာ ထုတ်ပြန်ပါတယ်။
အာဏာသိမ်းစစ်တပ်ဟာ စစ်ခေါင်းဆောင် မင်းအောင်လှိုင်ရဲ့ ရုရှားခရီးစဉ် မတိုင်မီ၊ ခရီးစဉ်အတောအတွင်းနဲ့ ခရီးစဉ်အပြီးမှာ လေကြောင်းတိုက်ခိုက်မှု သိသိသာသာတိုးမြှင့်လုပ်ဆောင်နေပြီး နောင်ချိုမြို့နယ်၊ စဉ့်ကူးမြို့နယ်နဲ့ စစ်ကိုင်းမြို့နယ်အတွင်းမှာ နှစ်ရက်အတွင်း လေကြောင်းတိုက်ခိုက်ခံရမှုကြောင့် သံဃာတော် အပါအဝင် လူပေါင်း ၄၀ ခန့် သေဆုံးခဲ့ပါတယ်။
