ဧပြီ ၆၊၂၀၂၅။ခွာညို/People’s Spring
စစ်ကိုင်းတိုင်း၊ ဘုတလင်မြို့နယ်တွင် အရပ်သားများရှိရာ ကျေးရွာကို စစ်ကောင်စီက စက်တပ်လေထီးဖြင့် တိုက်ခိုက်ခဲ့ရာ ဒေသခံ တစ်ဦးသေဆုံးပြီး နှစ်ဦးဒဏ်ရာရရှိခဲ့သည်။
ဘုတလင်မြို့နယ်၊ ကုက္ကိုစုရွာနှင့် အုတ်ကျင်းကျေးရွာကို ယနေ့(ဧပြီ ၆ရက်)ညနေ ၄နာရီ ၅၀မိနစ်ခန့်တွင် စက်တက်လေထီးဖြင့် တိုက်ခိုက်ခြင်းဖြစ်သည်။
” မုံရွာနမခကနေ တက်လာတာ။ ဒေသခံတွေကသူ့ရွာမှာသူနေတာ။ စက်တပ်လေထီးပျံတော့ ကြောက်ကြတာပေါ့။ ရွာကိုတော့ မပစ်ဘူးထင်တာကနေ ပစ်ချသွားတာ”ဟု ဒေသခံတစ်ဦးကပြောသည်။
Public Service Announcement
တိုက်ခိုက်မှုကြောင့် အုတ်ကျင်းရွာမှဦးအောင်ဇော်မင်း ဆိုသူ သေဆုံးကာ နောက်ထပ်နှစ်ဦးမှာ ဒဏ်ရာရရှိခဲ့ကြောင်း သတင်းရရှိသည်။ ထို့အပြင် အိမ်မွေးတရိစ္ဆာန်တချို့သေဆုံးခဲ့သည်ဟုလည်း ဆိုသည်။
စစ်ကောင်စီသည် ဘုတလင်မြို့နယ်နှင့် ဆက်စပ်နေသော ကနီမြို့နယ်ကိုလည်း ယခုရက်ပိုင်း စက်တပ်လေထီးဖြင့် မကြာခဏတိုက်ခိုက်နေသည်။
စစ်ကောင်စီက ငလျင်ဘေးကယ်ဆယ်ရေးအတွက်ဟုဆိုကာ ဧပြီ ၂ရက်မှ ၂၂ရက်အထိ ယာယီအပစ်ရပ်ကြောင်း ကြေညာထားသော်လည်း လေကြောင်းတိုက်ခိုက်မှုနှင့် မြေပြင်ထိုးစစ်ဆင်မှုများ ဆက်တိုက်ပြုလုပ်နေသည်။
