မေ ၁၁၊၂၀၂၅။ရဲခေါင်/People’s Spring
ကရင်နီပြည်နယ်၊ မော်ချီးဒေသကို စစ်ကောင်စီက လေယာဥ်နှစ်စီးဖြင့် ဗုံးကြဲတိုက်ခိုက်ရာ အရပ်သားနှစ်ဦးသေဆုံးပြီး သုံးဦးဒဏ်ရာရရှိခဲ့ကြောင်း ကရင်နီပြည်ကြားကာလအုပ်ချုပ်ရေးကောင်စီတွဲဖက်အတွင်းရေး မှူးဦးဗညားက လူထုနွေဦးသို့ ပြောသည်။
ယမန်နေ့(မေလ ၁၀ ရက်) နေ့လယ် ၁၂ နာရီခွဲခန့်တွင် မော်ချီးဒေသ၏ နေရာသုံးခုကို စစ်ကောင်စီက လေကြောင်းမှ ဗုံးကြဲခဲ့ခြင်းဟု ဆိုသည်။
“သုံးနေရာကို လေယာဥ် နှစ်စီးနဲ့ကြဲတာ။ပြည်သူနှစ်ဦးသေဆုံးပြီး သုံးဦးဒဏ်ရာရတယ်”ဟု ဦးဗညားက မော်ချီးဒေသလေကြောင်းတိုက်ခံရမှုအပေါ် ရှင်းပြသည်။
Public Service Announcement
ဒေသတွင်း အရပ်ဖက်ကူညီရေးအဖွဲ့များ၏အချက်အလက်များအရ စစ်ကောင်စီသည် မော်ချီးဒေသအား ယခုနှစ် မတ်လကစ၍ လေကြောင်းတိုက်ခိုက်မှု လေးကြိမ်ရှိပြီဖြစ်သည်။
ထိုသို့ တိုက်ခိုက်မှုများကြောင့် လသားအရွယ်ကလေးငယ် အပါအဝင် ပြည်သူ ၁၀ဦး သေဆုံးခဲ့ရပြီး ၂၀ ထက်မနည်း ဒဏ်ရာရခဲ့ကြသည်။
စစ်ကောင်စီ၏ အဆက်မပြတ်လေကြောင်းတိုက်ခိုက်မှုများအတွက် ဗုံးခိုကျင်းများတူးကြရန်၊အကြောင်းမဲ့ ရပ်ဝေးရပ်နီးခရီးသွားလာခြင်းမပြုလုပ်ရန်၊အရေးပေါ်ကိစ္စရပ်ကြောင့်သွားလိုပါကသက်ဆိုင်ရာသို့ အကြောင်းကြားရန် မော်ချီးဒေသအတွင်းလေကြောင်း သတိ ပေးချက်များကို ကရင်နီအမျိုးသားများစည်း လုံးညီညွတ်ရေးအဖွဲ့ KNSO က ထုတ်ပြန်ထားသည်။
ကရင်နီအမျိုးသားစည်းလုံးညီညွတ်ရေးအဖွဲ့ KNSOသည် ကရင်နီပြည်၊ မော်ချီးဒေသအတွင်း အခြေစိုက်ထားသည့် တိုင်းရင်းသားလက်နက်ကိုင်အဖွဲ့တစ်ခု ဖြစ်သည်။
စစ်တပ်နှင့် ၂၀၀၂ နို ဝင်ဘာ ၉ ရက်တွင် ငြိမ်းချမ်းရေးယူခဲ့သော်လည်း အရပ်သားများကို အကြမ်းဖက်သတ်ဖြတ်မှု၊အင်အားသုံးရက်စက်မှုများကြောင့် စစ်ကောင်စီကို တိုက်ခိုက်မည်ဟု ၂၀၂၄ ဧပြီ ၁၀ရက်တွင် KNSOက ကြေညာခဲ့သည်။
ခဲမဖြူနှင့် အဖြိုက်နက် သတ္ထုများထွက်ရှိရာ မော်ချီးဒေသကို ကရင်နီတပ်ပေါင်းစုက ၂၀၂၄ ဇန်နဝါရီ ၂၇ ရက်က အလုံးစုံထိန်းချုပ်ထားခြင်းဖြစ်သည်။
