ဇွန် – ၁၁ ၊၂၀၂၅ ၊ ဆိုင်းမင်း/People’s Spring
မန္တလေးမြို့မှာ လိုင်စင်မဲ့ကားနဲ့ ဆိုင်ကယ်တွေကို မောင်းနှင်သူတွေကို ဖမ်းဆီးပြီးနောက် ထောင်ဒဏ်ချတာတွေ စစ်ကောင်စီက ပြုလုပ်နေတယ်လို့ သိရပါတယ်။
လိုင်စင်မဲ့ယာဉ် မောင်းနှင်သူတွေကို ပို့ကုန်သွင်းကုန် ဥပဒေပုဒ်မ (၈) နဲ့ အမှုဖွင့်ပြီး ထောင်ဒဏ်တစ်လ ချတာရှိနေတာလို့ မန္တလေးမြို့စစ်ကောင်စီလက်အောက်ခံ ရဲတပ်ဖွဲ့နဲ့နီးစပ်တဲ့သတင်းရင်းမြစ်ထံကသိရပါတယ်။
” တရားစွဲ တစ်ခါတည်းတန်းပြီး ထောင်ချတာ၊ နေ့ချင်းပြီးလုပ်သွားတာ ” လို့ အဲဒီ သတင်းရင်းမြစ်က ပြောပါတယ်။
Public Service Announcement
လိုင်စင်မဲ့ယာဉ် မောင်းနှင်သူကို သက်ဆိုင်ရာမြို့နယ် ရဲစခန်းမှာဖမ်းဆီးပြီး တရားရုံးကိုအမှုစွဲတင်ကာ ပြစ်ဒဏ်ချပြီး ယာဉ်ကိုတော့ နိုင်ငံပိုင် သိမ်းဆည်းတယ်လို့သိရပါတယ်။
” တချို့ကျတော့လည်း တရားရုံးမရောက်ဘူး၊စခန်းမှာတင်ညှိပြီး လွတ်သွားတဲ့သူတွေလည်းရှိတယ်၊ ပစ္စည်းတော့ပြန်မပေးဘူး “လို့ လိုင်စင်မဲ့ကားဖမ်းဆီးခံရပြီးပြန်လည်လွတ်မြောက်လာသူတစ်ဦးကပြောပါတယ်။
လိုင်စင်မဲ့ ကား၊ ဆိုင်ကယ် ဖမ်းဆီးတာ ကိုမန္တလေးမှာ စတင်တဲ့ ဇွန်လ ၁ရက်ကနေ ဒီနေ့ ၁၀ ရက်နေ့အထိ စုစုပေါင်း ဖမ်းခံရသူနဲ့ထောင်ချခံရသူဦးရေကိုတော့အတိအကျမသိရပါဘူး။
လက်ရှိမှာဆိုရင် မန္တလေးမြို့တွင်း၊မြို့ပြင်မှာ အထိုင်ချဖမ်းဆီးနေသလို ယာဉ်ထိန်းနဲ့ ရဲတွေက အိမ်စီးကား လှည့်လည်ပြီး ဖမ်းဆီးတာမျိုးလုပ်ဆောင်နေတာပါ။
လိုင်စင်မဲ့ ယာဥ်မောင်းနှင်သူကို ပို့ကုန်သွင်းကုန်ဥပဒေပုဒ်မ ၈ အရ အရေးယူတာဖြစ်ပြီး အဲဒီပုဒ်မဟာ အမြင့်ဆုံးထောင်ဒဏ် ၃နှစ်ထိချနိုင်သလို ငွေဒဏ်လည်းချမှတ်နိုင်တဲ့ပုဒ်မဖြစ်ပါတယ်။
အခုလို ဖမ်းဆီးမှုတွေဟာ ပြီးခဲ့တဲ့ မေလ ၂၀ ရက်က နေပြည်တော်မှာ ပြုလုပ်တဲ့ အစည်းအဝေးမှာ အာဏာသိမ်းစစ်ကောင်စီခေါင်းဆောင်က လိုင်စင်မဲ့ ကားတွေ ၊ ဆိုင်ကယ်တွေကို ဖမ်းဆီးဖို့ ညွှန်ကြားလိုက်ပြီးနောက် ဖြစ်ပေါ်လာတာပါ။
လိုင်စင်မဲ့ ယာဉ်တွေဟာ အခွန်အခ နစ်နာသလို လုံခြုံရေးပိုင်း ထိခိုက်စေတယ်လို့ စစ်ကောင်စီခေါင်းဆောင်က အဲဒီအစည်းအဝေးမှာ ပြောခဲ့တယ်လို့သိရပါတယ်။
ဒါပေမယ့် မြေပြင်မှာတော့လိုင်စင်မဲ့ကားတွေ ၊ ဆိုင်ကယ်တွေကို စစ်ကောင်စီလက်အောက်ခံ စစ်ဘက်နဲ့ နယ်ဘက် ဝန်ထမ်းတွေ ၊ အုပ်ချုပ်ရေးအဖွဲ့တွေ ၊ ပြည်သူ့စစ် ခေါ် ပျုစောထီးတွေ စီးနင်းနေကြတယ်လို့ မန္တလေးမြို့ခံအချို့က ပြောပါတယ်။
