ဇူလိုင်-၁၄၊၂၀၂၅/People’s Spring
မြန်မာဖက်ကို နယ်စပ်ဖြတ်ကျော်ပြီး အိန္ဒိယက ဒရုန်းနဲ့ တိုက်ခိုက်ခဲ့တာကြောင့် အိန္ဒိယ ခွဲထွက်ရေး လက်နက်ကိုင် အဖွဲ့တစ်ခုရဲ့ ခေါင်းဆောင် သေဆုံးသွားတယ်လို့ ဆိုပါတယ်။ ဒါပေမဲ့ အိန္ဒိယ စစ်တပ်ကတော့နယ်စပ်ဖြတ်ကျော်ဒရုန်းတိုက်ခိုက်မှုလုပ်ခဲ့တယ် ဆိုတာကို ငြင်းဆိုထားပါတယ်။
ဇူလိုင် ၁၃ ရက်နေ့ကမြန်မာနိုင်ငံအနောက်မြောက်ဖက်ခြမ်း နယ်စပ်မှာ ရှိနေတဲ့ ညီညွတ်သော အာသံ လွတ်မြောက်ရေး တပ်ဦး (ULFA) စခန်းတစ်ခုကို ဒရုန်းနဲ့ တိုက်ခိုက်တာ ခံခဲ့ရတာလို့ဆိုပါတယ်။ အဲဒီ ဖြစ်စဉ်မှာ ULFAရဲ့ ထိပ်ပိုင်း စစ်ဦးစီးတစ်ဦး အပါအဝင် ၃ ဦးသေဆုံးခဲ့ပြီး ၁၉ ဦး ဒဏ်ရာရခဲ့တယ်လို့ ULFAက ပြောပါတယ်။
ULFA အပါအဝင် အိန္ဒိယ အစိုးရကို တော်လှန်နေတဲ့ ခွဲထွက်ရေး အင်အားစု တချို့ဟာ မြန်မာဖက်ခြမ်းတိုင်းရင်းသားမျိုးနွယ်စုတချို့နဲ့ ဘာသာစကား၊ ယဉ်ကျေးမှု နှီးနှောဆက်နွှယ်နေသလို မြန်မာပိုင်နက်မှာ တပ်စခန်းတွေ ဖြန့်ကျက်ထားလေ့ ရှိပါတယ်။
Public Service Announcement
ပထမဆုံး တိုက်ခိုက်မှုမှာ ULFA ထိပ်ပိုင်း စစ်ဦးစီး သေဆုံးခဲ့ပြီး နောက်ဆက်တွဲ တိုက်ခိုက်မှုတွေမှာ တခြားခေါင်းဆောင်နှစ်ဦးပါအသက်ဆုံးရှုံးခဲ့ကြောင်း၊ အဖွဲ့သားတွေနဲ့ အရပ်သားတွေလည်း ထိခိုက်ဒဏ်ရာတွေ ရခဲ့ကြောင်း အဲဒီအဖွဲ့က ကြေညာချက်တွေထုတ်ပြန်ခဲ့ပါတယ်။
တခြားလက်နက်ကိုင် အင်အားစု တစ်ခုဖြစ်တဲ့ ပြည်သူ့လွတ်မြောက်ရေးတပ် (PLA) စခန်းတစ်ခုလည်း အဲဒီနား တဝိုက်မှာ ရှိနေခဲ့တယ်လို့ ULFA က ပြောပါတယ်။ULFAကအာသံပြည်နယ်ခွဲထွက်ရေးအတွက် တိုက်ပွဲဝင်နေတာဖြစ်ပြီး PLAကတော့ မဏိပူရပြည်နယ် ခွဲထွက်ရေးကို လက်နက်ကိုင် လမ်းစဉ်နဲ့ တောင်းဆိုနေတာပါ။
အိန္ဒိယစစ်တပ်ကတော့ နယ်စပ်ဖြတ်ကျော်ပြီး မြန်မာဖက်ခြမ်းမှာ ဒရုန်းတိုက်ခိုက်မှုတွေ လုပ်ခဲ့တယ်ဆိုတာ လုံးဝမဟုတ်ဘူးလို့ ငြင်းချက်ထုတ်ခဲ့ပါတယ်။အိန္ဒိယစစ်တပ်ရဲ့စစ်ဆင်ရေးထဲမှာ ULFAက ပြောထားတဲ့ ကိစ္စမျိုး မရှိခဲ့ဘူးလို့ စစ်တပ် ပြောရေးဆိုခွင့်ရ အရာရှိ ဒုတိယ ဗိုလ်မှူးကြီး မာဟင်ဒရာ ရာဝတ်က ပြောပါတယ်။
အာသံပြည်နယ် ဝန်ကြီးချုပ်နဲ့ ပြည်နယ် ရဲတပ်ဖွဲ့တို့ကလည်း အဲဒီလို စစ်ဆင်ရေးမျိုးအကြောင်း သိလည်းမသိခဲ့သလို ပါဝင်ပတ်သက်မှုလည်း မရှိခဲ့ကြောင်း အသီးသီး ထုတ်ပြန်ခဲ့ကြပါတယ်။
ကိုးကား-Express Tribune
