သြဂုတ်-၈၊ ၂၀၂၅။ ဇော်ရမ်း/People’s Spring
ကချင်ပြည်နယ်၊ ဖားကန့်မြို့နယ် ဆိပ်မူကျေးရွာအုပ်စုမှ ဟင်းတင့်ကျေးရွာတွင် သေနတ်ဖြင့် ပစ်သတ်ခံထားရသည့် အမျိုးသားနှစ်ဦး၏ ရုပ်အလောင်းကို ယနေ့ နံနက်ပိုင်းတွင် ဒေသခံများက တွေ့ရှိခဲ့သည်။
လူလတ်ပိုင်းအမျိုးသားနှစ်ဦးသည် မသေဆုံးမီ နှိပ်စက်ခံထားရပြီး သေနတ်ဖြင့်ပါ ပစ်သတ်ခံထားရခြင်းဟု ဒေသခံတစ်ဦးကပြောသည်။
” ရက်စက်တယ်ဗျ။ မျက်နှာတွေကိုတိတ်နဲ့ပါပတ်ထားတာ။ ဘယ်သူတွေမှန်းလည်းမသိသေးဘူး။ ဘယ်ကိုစုံစမ်းရမယ်မှန်းလည်းမသိဘူး” ဟု ဒေသခံတစ်ဦးကပြောသည်။
Public Service Announcement
ရုပ်အလောင်းနှစ်ခုကို လူမှုရေးအဖွဲ့များကလာရောက်သယ်ဆောင်သွားသည်။ ဟင်းတင့်ကျေးရွာတွင် တိုက်ပွဲဖြစ်ပွားခြင်းမရှိသလို စစ်ကောင်စီစစ်ကြောင်းလည်းမရှိကြောင်း သတင်းရရှိသည်။
” ဖားကန့်မှာက လုပ်ကြံတာတွေလည်းဖြစ်နေတယ်။ ဒီလတွေထဲမှာတော့ စစ်ကောင်စီစစ်ကြောင်းကသတ်ဖြတ်တာအများဆုံးပဲ။ အခုကတော့ စစ်ကြောင်းမရှိဘဲနဲ့အသတ်ခံရတော့ စဉ်းစားရခက်နေတယ်” ဟု ဒေသခံတစ်ဦးကပြောသည်။
ပြီးခဲ့သည့်ဇွန်လက ဖားကန့်သို့ ရောက်ရှိနေသည့်စစ်ကောင်စီစစ်ကြောင်းက မှော်စီစာကျေးရွာပတ်ဝန်းကျင်၌ ရက်အနည်းငယ်အတွင်း အရပ်သားဆယ်ဦးကို ဖမ်းဆီးသတ်ဖြတ်ပြီးအလောင်းစွန့်ပစ်ခဲ့ဖူးသည်။
ဖားကန့်သို့ စစ်ကောင်စီ စစ်ကြောင်းဝင်လာသည့် မေလ ၂၇ရက်မှ ယနေ့ ဩဂုတ် ၈ရက်အတွင်း စစ်ကောင်စီက လက်နက်ကြီးနှင့် ဒရုန်းပစ်ခတ်ခြင်း၊ လေကြောင်းမှ ဗုံးကြဲခြင်းတို့ကြောင့် ကလေးငယ်အချို့အပါအဝင် အရပ်သား ၃၀ဦးထက်မနည်း သေဆုံးခဲ့သည်။ စစ်ကြောင်းထိုးရင်း သတ်ဖြတ်သွားသူ စုစုပေါင်း ၁၅ဦးထက်မနည်း ရှိပြီဖြစ်သည်။ ထို့အပြင် လုပ်ကြံသတ်ဖြတ်မှုများဟုယူဆနိုင်သည့် သေဆုံးသူလည်း ဆယ်ဦးထက်မနည်းရှိပြီဟု ဒေသခံများကပြောသည်။
