ကသာမြို့စစ်တပ်အုပ်ချုပ်​ရေးယန္တရားလုံးဝရပ်ဆိုင်း

■ခမရ(၃၀၉)ထွက်​ပြေးတဲ့စစ်​ကောင်စီဝန်ထမ်း​တွေကို စစ်တပ်ကထွက်ခွင့်မ​ပေး​တော့

ဇန်နဝါရီ-၂၊၂၀၂၅။အိမ်သွင်/People’s Spring

ကသာမြို့မှာ စစ်ကောင်စီရဲ့အုပ်ချုပ်ရေးယန္တရားလုံးဝရပ်ဆိုင်းသွားပြီဖြစ်သလို အမှတ် ၃၀၉ ​ခြေမြန်တပ်ရင်း(ခမရ ၃၀၉)ထဲ ထွက်ပြေးတဲ့ စစ်​ကောင်စီဝန်ထမ်းတွေကို စစ်တပ်က ထွက်ခွင့်မပေးဘဲ ပိတ်ဆို့ထားတယ်လို့ သတင်းရရှိပါတယ်။

မြို့ပေါ်မှာ တပ်စွဲထားတဲ့ စစ်တပ်ရဲ့စခန်းတွေအနက် အချို့ကို ​တော်လှန်​ရေးတပ်ဖွဲ့တွေကထိုးစစ်ဆင်တိုက်ခိုက်တဲ့အခါ စစ်သားနဲ့ Non CDM ဝန်ထမ်းတွေက မြို့ပြင်မှာရှိတဲ့ ခမရ(၃၀၉)ထဲကိုထွက်​ပြေး သွားရောက်စုစည်းနေတယ်လို့ မြို့ခံတစ်ဦးကပြောပါတယ်။

Public Service Announcement

“ မြို့ထဲကိုဗုံးကြဲတာအထိအခိုက်ရှိတယ်။ ရက်ကွက်(၉)ထဲမှာ လူသေဆုံးတာရှိတယ်။ စစ်တပ်က သူတို့တပ်စွဲထားတဲ့ အထက(၂)ကျောင်းကနေဆုတ်ပြီး ကျောင်းကို ပြန်ဗုံးကြဲသွားလို့ ကျောင်းမီးလောင်သွားပြီ” လို့ဒေသခံတဦးကပြောပါတယ်။

ကသာမြို့မှာ စစ်တပ်စွဲထားတဲ့နေရာတွေကို ဒီဇင်ဘာလ၂၈ရက်မနက်အစောပိုင်းမှာ PDF ​တွေအပါအဝင်​တော်လှန်​ရေးတပ်​တွေက စတင်တိုက်ခိုက်ခပြီး မြို့သိမ်းတိုက်ပွဲဆင်နွှဲ​နေတာပါ။ဇန်နဝါရီ ၂ ရက်အထိ တိုက်ပွဲတွေဆက်ဖြစ်နေပြီး မြို့ခံတွေ ဘေးလွတ်ရာကိုတိမ်းရှောင်ဖို့ကြိုးစားနေကြပါတယ်။

ဇန်နဝါရီက ၁ရက်နေ့မှာ အရပ်သားပြည်သူတွေနဲ့အတူ စစ်ရှောင်အဖြစ်ဟန်ဆောင်ထွက်ပြေး
တဲ့ စစ်တပ်လက်​အောက်ခံဝန်ထမ်း Non CDM ၅၀ ခန့်ကို​တော်လှန်​ရေးတပ်​တွေက ဖမ်းမိခဲ့ပါတယ်။ဇန်နဝါရီလ ၂ရက်နေ့မှာလည်း အရပ်သားတွေပြေးတဲ့ဘက်ကို စစ်တပ်ကလေကြောင်းကနေ ဗုံးကြဲလို့ ဒေသခံတွေဟာ မြို့ထဲကိုပြန်ဝင်ခဲ့ကြရပါတယ်။

“ ဒီနေ့က Non တွေနည်းနည်းပဲထပ်မိတယ်။ အရပ်သားတွေနဲ့ရောပြီးထွက်သလိုအရပ်သားတွေနဲ့ပဲ မြို့ထဲကို ပြန်ဝင်သွားတာ။ကသာက ခရိုင်မြို့ဆိုတော့ Non တွေလည်း များတယ်” လို့မြေပြင်သတင်းရင်းမြစ်တစ်ဦးကပြောပါတယ်။

Non CDM အချို့ဟာ ခမရ(၃၀၉)ထဲမှာ သွားရောက်စုစည်းနေစဉ် စစ်ကောင်စီကထွက်ခွာခွင့်
မပေးတော့ဘဲ လက်နက်ထုတ်ပေးပြီး ခုခံခိုင်းနေတယ်လို့ သတင်းရရှိပါတယ်။

“ ၃၀၉ကို အားကိုးတဲ့ Non တွေဒုက္ခရောက်ပြီ။ စစ်ကောင်စီက မြိုပတ်ချာလည်အပြင်၃၀၉ ဘက်ကိုပါဗုံးကြဲနေတာ ” လို့ ဒေသခံသတင်းရင်းမြစ်ပြောပါတယ်။

ခမရ(၃၀၉)ဟာ ကသာမြို့၊ပြည်သာယာ ရပ်ကွက်နဲ့ နီးပြီး မြို့အပြင်ဘက် တောင်ကုန်းမှာရှိပါတယ်။ စစ်ကောင်စီက မြို့ပြင်ဘက်တွေကို လေကြောင်းကနေမကြာခဏတိုက်ခိုက်နေပါတယ်။ခမရ(၃၀၉)ကျတော့မှာမို့ ခုခံဖို့ဆိုပြီး စစ်တပ်ဝါဒဖြန့်ချိရေးစာမျက်နှာတွေက လူမှုကွန်ရက်ကနေအလှူခံနေတာလည်းတွေ့ရပါတယ်။

မြို့ခံများစုဟာ ပြည်သူ့ကာကွယ်ရေးတပ်ဖွဲ့တွေထိန်းချုပ်ထားတဲ့ အင်းတော်နဲ့ မော်လူးမြို့ဘက်အပြင် မြစ်ကြီးနားနဲ့မန္တလေးမြို့ဘက် စစ်ဘေးရှောင်ဖို့ ကြိုးစားနေကြပါတယ်။ဒေသခံတွေစစ်ရှောင်တဲ့လမ်းကြောင်းကို စစ်တပ်ကလေကြောင်းကနေတိုက်ခိုက်မှုတွေပြုလုပ်နေတယ်လို့လည်း မြို့ကိုစွန့်ခွာထွက်ပြေးလာသူတချို့ကပြောပါတယ်။

ကသာမြို့ကနေ ထွက်လာတဲ့ စစ်ဘေးရှောင်တွေကို အမျိူးသားညီညွတ်ရေးအစိုးရရဲ့ လူသားစာနာဌာနအပါအဝင် ပြည်သူ့အုပ်ချုပ်ရေးအဖွဲ့ဝင်တွေက အကူအညီတွေပေးနေပြီး ပြည်သူ့ကာကွယ်ရေးတပ်ဖွဲ့တွေကလည်း လုံခြုံရေးစောင့်ရှောက်မှုနဲ့ စစ်ဆေးမှုတွေလုပ်နေပါတယ်။