ဧပြီ−၇၊ ၂၀၂၆။ဟာနာဆန်/People’s Spring
မကွေးတိုင်း၊ ပခုက္ကူမြို့နယ်ကို ဆက်သွယ်ထားတဲ့ မဟာဓာတ်အားလိုင်းတာဝါတိုင်တွေက သံဘောင်တွေ ဖြုတ်ခိုးခံထားရမှုကြောင့် လေပြင်းတိုက်ခတ်ချိန်မှာ တိုင်တွေကျိုးကျပျက်စီးခဲ့ပြီး တစ်မြို့နယ်လုံး လျှပ်စစ်ဓာတ်အားပြတ်တောက်နေကြောင်း သိရပါတယ်။
မနေ့က ဧပြီ ၆ ရက် ည ၁၀နာရီခန့်က ယင်းမာပင်ခရိုင်၊ ဆားလင်းကြီးမြို့နယ်၊ ညောင်ပင်ကြီးဓာတ်အားခွဲရုံနဲ့ ပခုက္ကူမြို့နယ် ဗုဒ္ဓကုန်းဓာတ်အားခွဲရုံကို ဆက်သွယ်ထားတဲ့ မဟာဓာတ်အားလိုင်းက တာဝါတိုင်နှစ်တိုင် လေပြင်းကြောင့် ကျိုးကျပျက်စီးသွားလို့ တစ်နယ်လုံး ဓာတ်အားပြတ်တောက်သွားတာဖြစ်ကြောင်း ပခုက္ကူလျှပ်စစ်အင်ဂျင်နီယာရုံး (PKU ESE)ရဲ့ ထုတ်ပြန်ချက်အရ သိရပါတယ်။
“ ဖြစ်ရသည့် အကြောင်းရင်း တာဝါတိုင်၏ သံဘောင်များ ဖြုတ်ခိုးခံရပြီး ဧပြီ ၆ ရက်နေ့ညတွင် လေကြမ်းသွားသောကြောင့် ကျိုးကျရခြင်းဖြစ်ပါသည်” လို့ ပခုက္ကူလျှပ်စစ်အင်ဂျင်နီယာရုံးက ဆိုပါတယ်။
Public Service Announcement
လက်ရှိမှာ မဟာဓာတ်အားလိုင်းက ကျိုးကျသွားတဲ့ တာဝါတိုင်တွေကို ပြင်ဆင်ဖို့လုပ်နေပြီး ၄ ရက်ကနေ ၅ ရက်ခန့် အထိ ကြာနိုင်တယ်လို့ အင်ဂျင်နီယာတွေက ဆိုပါတယ်။
ယခုလို အပူရှိန်ပြင်းထန်တဲ့ ကာလမှာရက်ရှည်လျှပ်စစ်မီးပြတ်တောက်မှုကြောင့် ဒေသခံတွေဟာ ရေရရှိရေးနဲ့ အခြားလုပ်ငန်းတွေမှာ အခက်အခဲတွေ ကြုံတွေ့နေရပါတယ်။
“ မြန်မှရမှပဲ။ ဆီကလိုသလောက်မဝယ်ရနဲ့ ရေဒုက္ခရောက်မှာ” လို့ ပခုက္ကူမြို့ခံ အမျိုးသမီးတစ်ဦးက ပြောပါတယ်။
ပြီးခဲ့တဲ့ ၂၀၂၄နဲ့ ၂၀၂၅အတွင်းကလည်း ယင်းဓာတ်အားလိုင်းနေရာအချို့ တိုက်ပွဲတွေကြောင့် လက်နက်ကြီးထိပြီး လျှပ်စစ်မီးရက်အတန်ကြာ ပြတ်တောက်ခဲ့ဖူးပါတယ်။
(ကျိုးကျသွားတဲ့တာဝါတိုင်တစ်တိုင်ကို တွေ့ရစဥ်။ ဓာတ်ပုံ − KMT/Fb)
