ဇူလိုင်-၂ ၊၂၀၂၆။တာရာ/People’s Spring
ရန်ကုန်မြို့ ၊တောင်ဥက္ကလာနဲ့ သာကေတမြို့နယ်မှာရှိတဲ့ ဗိုလ်ချုပ်ကြေးရုပ်တွေကို အာဏာသိမ်းစစ်တပ်က ယမန်နေ့ညကဖြိုချဖျက်ဆီးခဲ့တယ်လို့ ဒေသခံတွေကပြောပါတယ်။
ဇူလိုင် ၁ ရက်နေ့ည ၁၀ နာရီဝန်းကျင်ခန့် မှာအင်အား ၃၀ နီးပါးရှိတဲ့စစ်တပ်နဲ့ စည်ပင်ဝန်ထမ်းတွေက ဘက်ဟိုး၊ မြေကော်ကားတွေနဲ့ တောင်ဥက္ကလာပမြို့နယ်၊သုမင်္ဂလာပန်းခြံမှာရှိတဲ့ ဗိုလ်ချုပ်ကြေးရုပ် ၂ ရုပ်အနက် တစ်ရုပ်ကို ဖျက်ဆီးခဲ့ပါတယ်။
“အခုဖြိုလိုက်တာကဦးကိုကိုကြီးရဲ့အရုပ်။ ဘာကြောင့်ဖြိုလဲတော့မသိဘူး။ ဝုန်းဒိုင်းဝုန်းဒိုင်းနဲ့လာပြီး အရုပ်တွေကိုစဖျက်တော့တာပဲ။ ပန်းခြံကတော့ပိတ်ထားတယ်။မနက်ကတည်းက အရပ်ဝတ်တွေကစောင့်နေတာ။ အများကြီး”လို့ ပန်းခြံအနီးနေထိုင်သူတဦးကပြောပါတယ်။
Public Service Announcement
အလားတူ သာကေတမြို့နယ်၊ မြကန်သာပန်းခြံအတွင်းက ဗိုလ်ချုပ်ကြေးရုပ်ကိုလည်းစစ်အုပ်စုက ဖျက်ဆီးခဲ့ပါတယ်။
တောင်ဥက္ကလာပမြို့နယ်ရှိ ဗိုလ်ချုပ်ကြေးရုပ်ကို ၂၀၁၇ ခုနှစ် ဖေဖော်ဝါရီလ ၁၃ ရက် ဗိုလ်ချုပ်အောင်ဆန်း၏ ၁၀၂ နှစ်ပြည့် မွေးနေ့အမီ အများပြည်သူ ဂါရဝပြုနိုင်ဖို့စိုက်ထူခဲ့တာဖြစ်ပြီး ၈၈ မျိုးဆက်ကျောင်းသားခေါင်းဆောင် ဦးကိုကိုကြီး ဦးဆောင်တည်ဆောက်ခဲ့တဲ့ ကြေးရုပ်ဖျက်ဆီးခံရတာဖြစ်ပါတယ်။
ကျန်ရှိနေတဲ့တစ်ရုပ်က တောင်ဥက္ကလာပမြို့နယ် ဗိုလ်ချုပ်အောင်ဆန်းကြေးရုပ် ဖြစ်မြောက်ရေးကော်မတီနဲ့မြို့နယ်လွှတ်တော်ကိုယ်စားလှယ်များ ဦးဆောင်တည်ဆောက်ခဲ့တဲ့ ဗိုလ်ချုပ်အောင်ဆန်းကြေးရုပ်ဖြစ်ပါတယ်။
စစ်တပ်က အခုလပိုင်းအတွင်းမှာ နိုင်ငံတစ်ဝန်းက ဗိုလ်ချုပ်ရုပ်တုတွေကို ဖျက်ဆီးနေတာဖြစ်ပါတယ်။
