ဇူလိုင်-၂၊၂၀၂၆။သုည/People’s Spring
နယ်မြေမတည်ငြိမ်မှုတွေကြားက စစ်ကိုင်းတိုင်းအတွင်း ဒေသခံပြည်သူတွေ၊ တော်လှန်သပိတ်အင်အားစုတွေက စစ်အာဏာရှင်ဆန့်ကျင်ရေးလူထုလှုပ်ရှားမှုနဲ့ ဟောပြောပွဲတွေ ဒီကနေ့ (ဇူလိုင် ၂) မှာ ဆက်လက်ပြုလုပ်ခဲ့ပါတယ်။
စစ်ကိုင်းတိုင်း ဟုမ္မလင်းမြို့နယ်တနေရာမှာ ချင်းတွင်းမြစ်ကမ်းဘေးကျေးရွာများသပိတ်ကော်မတီနဲ့ ကျောင်းသူ၊ ကျောင်းသား၊ ဆရာ၊ဆရာမတွေ ပူးပေါင်းပြီး စစ်အာဏာရှင်ဆန့်ကျင်ရေး လှုပ်ရှားမှု ပြုလုပ်ခဲ့ပါတယ်။
ဆန္ဒပြပြည်သူတွေက “ညီညွတ်ရေးဟာ အစွမ်းထက်ဆုံးလက်နက်” ၊ “ဘုံရန်သူကို ထိုးနှက် တော်လှန်ရေးပန်းတိုင်ဆီ အတူတူချီတက်” စတဲ့ စာသားတွေ ကိုင်ဆောင်ပြီး ဆန္ဒထုတ်ဖော်ခဲ့ပါတယ်။
Public Service Announcement
မြောင်မြို့နယ်မှာလည်း လူထုသပိတ်တိုက်ပွဲဦးဆောင်ကော်မတီက သဘာဝပတ်ဝန်းကျင်ဆိုင်ရာ ၊ နိုင်ငံရေးအခြေခံသဘောတရားများကို အသိပညာပေးဟောပြောခဲ့ကြပြီး ဒေသခံလူထုနဲ့အတူ ပလတ်စတစ်ကောက်ခြင်း လှုပ်ရှားမှုကို ပြုလုပ်ခဲ့ပါတယ်။
ရွှေဘိုမြို့နယ်မှာလည်း သပိတ်အင်အားစုမှ ရဲဘော်တွေက ဒေသတွင်း သွားလာရန်ခက်ခဲပြီး အကူအညီများစွာ လိုအပ်နေတဲ့ စစ်ဘေးရှောင်ပြည်သူတွေကို ဆန်တွေ သွားရောက်လှူဒါန်းခဲ့ပါတယ်။
