ဇူလိုင် -၂၊၂၀၂၆။မိုမို/People’s Spring
ကရင်နီပြည်နယ်၊ နန်းမယ်ခုံမြို့ကို စစ်တပ်က လူလှိုင်းသုံးပြီး ထိုးစစ်ဆင်နေတယ်လို့ ကရင်နီအခြေစိုက်တော်လှန်ရေးတပ်တာ၀န်ရှိသူတချို့က ပြောပါတယ်။
ကရင်နီပြည်နယ်ရဲ့၀င်ပေါက်ဖြစ်တဲ့ ရှမ်း-ကရင်နီအစပ် မိုးဗြဲမြို့ကနေတဆင့် ဒီးမော့ဆိုမြို့နယ် အထက်ခြမ်းက နန်းမယ်ခုံမြို့ကို စစ်တပ်ရဲ့ထိုးစစ်ဆင်မှုဟာ ပြီးခဲ့တဲ့ဇွန်လကစပြီး အရှိန်မြှင့်လာတယ်လို့ ဆိုပါတယ်။
“ သူတို့ဘက်က ပစ(စစ်မှုထမ်း)တွေကိုအလွန်အကျွံ့သုံးပြီး လူလိုင်းလုံး စစ်ဆင်ရေးပုံစံနဲ့ ထိုးနေတာ။နေ့တိုင်းထိတွေ့မှု့ဖြစ်နေတယ်”လို့ ရှမ်း-ကရင်နီပူးပေါင်းတပ် တာ၀န်ရှိသူတစ်ဦးက ပြောပါတယ်။
Public Service Announcement
ဒါ့အပြင် ဇွန်လ ၂၈ ရက် တိုက်ပွဲမှာ ဖမ်းမိခဲ့သူ ၂ဦးကလည်း စစ်မှုထမ်း ၂ဦး ဖြစ်တယ်လို့ အသိပေးပါတယ်။
” ရထားတဲ့နေရာတွေကို ကာထားတဲ့အခြေအနေပဲ။စကစ ဘက်က အင်အားက ၅၀၀ကျော်လောက်ရှိတယ်”လို့ ကရင်နီရဲဘော်တစ်ဦးက မိုးဗြဲ မြို့တိုက်ပွဲ အခြေအနေကို ရှင်းပြပါတယ်။
မိုးဗြဲမြို့အနီးက လွယ်ဝိုင်း၊ လွယ်ယင်းတောင်ခြေ၊ခေါင်းဝံ လမ်းနဲ့ နန်းမယ်ခုံမြို့ဘက်က
နေရာတွေကို အသွားအလာမလုပ်ကြဖို့ မိုးဗြဲပြည်သူ့ကာကွယ်ရေးတပ် (MB-PDF)က ဇွန်လ ၃၀ ရက်ကစပြီး တားမြစ်ထားပါတယ်။
အာဏာသိမ်းစစ်တပ်က မိုးဗြဲမြို့ကို ပြီးခဲ့တဲ့နှစ်လယ်ပိုင်းက ပြန်ထိန်းချုပ်ခဲ့ပေမယ့် မြို့အနီးတဝိုက်ကို တော်လှန်ရေးတပ်တွေက ပိတ်ဆို့ထားပါတယ်။
“နန်းမယ်ခုံရရင် မိုးဗြဲ ၊လွိုင်ကော် နဲ့ ဒီမောဆိုရှေ့ခြမ်းကိုကောင်းကောင်းထိန်းချုပ်လို့ရသွားမယ့်အခြေ အနေ”လို့ ကရင်နီစစ်ရေးသတင်းရင်းမြစ်က ပြောပါတယ်။
မိုးဗြဲမြို့နဲ့ မိုင် ၂၀ ၀န်းကျင်အကွာ မိုးဗြဲ – ဒီးမော့ဆိုမြို့နယ်ကြားမှာ ရှိတဲ့ နန်းမယ်ခုံမြို့ကို တော်လှန်ရေးတပ်တွေက ၂၀၂၃ နှစ်ကုန်ပိုင်းကစပြီး ထိန်းချုပ်ထားတာဖြစ်ပါတယ်။
