သြဂုတ်-၁၃၊၂၀၂၆။တာရာ/People’s Spring
ရန်ကုန်မြို့မှာ ၄ ရက်အတွင်း ဝမ်းပျက်ဝမ်းလျှောလူနာ ၁၈၀ ကျော် အထိရှိပြီး ၁ဦး သေဆုံးခဲ့တယ်လို့ စစ်တပ် လက်အောက်ခံ ကျန်းမာရေးဝန်ကြီးဌာနက ဒီကနေ့ ထုတ်ပြန်ပါတယ်။
သြဂုတ် ၉ ရက်ကနေ ၁၂ ရက်အထိ ဝမ်းပျက်ဝမ်းလျှောလူနာ စုစုပေါင်း ၁၈၂ ဦး ရှိပြီး ရန်ကုန်ဆေးရုံကြီးမှာ ဆေးကုသမှုခံယူနေတယ်လို့ ဆိုပါတယ်။အဲဒီထဲကအသက် (၉၂)နှစ်အရွယ်သက်ကြီး လူနာ ၁ ဦး သေဆုံးတယ်လို့ ဖော်ပြထားပါတယ်။
လူနာတွေထဲက ပြင်းထန်ဝမ်းပျက်နဲ့ ဝမ်းလျှောရောဂါပိုးတွေ့သူ ၅၄ ဦးရှိတယ်လို့လည်း ဆိုပါတယ်။
Public Service Announcement
“အဲဒီဝမ်းပျက်ဝမ်းလျှောရောဂါကူးစက်မြန်တယ်။ အထူးသဖြင့် မိုးရာသီဆို အဖြစ်များတယ်။ အစားအသောက်တွေကြောင့် အများဆုံးဖြစ်တာ။ ပြီးတော့ ရေကြောင့်ဖြစ်တာလည်းဖြစ်တယ်။ အခုဆေးရုံကြီးမှာ ဆရာဝန်တွေကအချိန်ပြည့် လှည့်နေရတယ်။ ဆရာဝန်အင်အားကလည်း နည်းတော့ မလောက်ဘူး”လို့ ဆရာဝန်တစ်ဦးက ပြောပါတယ်။
ဒါ့အပြင် ရောဂါဖြစ်ပွားတဲ့ လမ်းမတော်၊လသာ၊ပန်းပဲတန်း၊ကျောက်တံတားမြို့နယ်တို့မှာ စစ်တပ်ပူးပေါင်းအဖွဲ့တွေက စစ်ဆေးမှုတွေ လုပ်နေတယ်လို့ ဆိုပါတယ်။
ဝမ်းပျက်၊ဝမ်းလျှောလူနာတွေကို ရန်ကုန်ဆေးရုံကြီးရဲ့သီးသန့်လူနာဆောင်မှာ ထားရှိ ကုသပေးနေကာ လူနာအရေအတွက်တိုးလာတာကြောင့် ဆေးရုံကုတင်တွေ မလုံလောက်ဘူးလို့ သိရပါတယ်။
ဒါ့အပြင် ဝမ်းရောဂါ ကူးစက်မှာစိုးတာကြောင့်ဒီကနေ့ကစပြီး ပြင်ပလူနာဌာနကို လာရောက်ပြသခွင့်ပိတ်လိုက်တယ်လို့ လည်းကျန်းမာရေးဝန်ထမ်းအချို့ကပြောပါတယ်တယ်။
“ဆေးရုံကြီးမှာလည်း တခြားသူတွေကူးမှာစိုးလို့ ပြင်ပလူနာဌာစပိတ်ပြီ ။ဆေးရုံကြီးအပြင်စံပြဆေးရုံ၊ မြောက်ဥက္ကလာ၊ပုဂ္ဂလိကဆေးရုံတွေမှာလည်း ဝမ်းရောဂါလူနာတွေကိုကုပေးနေရတယ်”လို့ဆရာဝန်တဦးကပြောပါတယ်။
