မတရားဖမ်းဆီးခံပြည်သူများအား အကြမ်းဖက်စစ်ကောင်စီတပ်သားများက နေပူလှမ်းပြီး ရိုက်နှက်နှိပ်စက်နေသည့် ဗီဒီယိုဖိုင်ထွက်ပေါ်လာသည်။
စစ်ကိုင်းတိုင်း အရာတော်မြို့နယ်ရှိ စခတ (၁၀) တပ်အတွင်း ဖမ်းဆီးထားသောပြည်သူများကို ရိုက်နှက်နှိပ်စက်နေသည့်ဗီဒီယိုဖိုင်ဖြစ်ကြောင်း ဒေသခံများက ဆိုသည်။
“အဲဒီ ဗီဒီယိုဖိုင်က တပ်နဲ့နီးစပ်သူပဲရိုက်ပြီး ပို့ပေးတာ။သူကလည်း တော်တော် လူမဆန်လို့ဆိုပြီး ရိုက်ထားတာ”ဟု အရာတော်မြို့နယ် ဒေသခံတစ်ဦးက ပြောသည်။
အရာတော်မြို့နယ်မှ ဖမ်းဆီးခံရသူအများစုကို စခတ-၁၀ (အရပ်ခေါ် အရှေ့တပ်)ထဲတွင် ချုပ်နှောင်ထားပြီး နှိပ်စက်စစ်ဆေးလျက်ရှိသည်။
Public Service Announcement
ဖမ်းဆီးခံများကို မကြာခဏနေပူထုတ်လှမ်းပြီး ရိုက်နှက်စစ်ဆေးသည့်အပြင် ညသန်ခေါင်ယံ အချိန် များတွင်လည်း ဖမ်းဆီးခံပြည်သူများအား နှိုး၍ စစ်ကြောနှိပ်စက်တတ်သေးကြောင်းလည်း သိရသည်။
ထို့အပြင် ဖမ်းဆီးခံသံဃာတော်များကိုပါ လူဝတ်လဲစေပြီး အကြမ်းဖက်စစ်တပ်က ရိုက်နှိက်နှိပ်စက်နေသည်ဟု စခတ-၁၀ (အရပ်ခေါ် အရှေ့တပ်)နှင့်နီးစပ်သည့်အသိုင်းအဝိုင်းက ဆိုသည်။
လက်ရှိ အရာတော်မြို့နယ်တွင် မတရားဖမ်းဆီးခံရပြီး ယခုထိ ထိန်းသိမ်းခံထားရသည့် ပြည်သူ၆၀ဦးခန့် ရှိနေသည်။ အဆိုပါ ၆၀ဦး အနက်မှ အမျိုးသမီးတစ်ဦးသာ အောက်တိုဘာ ၁၉ ရက်က ပြန်လည်လွတ်မြောက်လာသည်။
