လူကို နင်းသတ်တဲ့ အိန္ဒိယ တောဆင်ရိုင်းက နာရေးမှာ အလောင်းကို လာဖျက်ဆီးပြန်

အိန္ဒိယမှာ တောဆင်ရိုင်း တစ်ကောင်ဟာ ကိုယ်တိုင် နင်းသတ်ခဲ့သူရဲ့ ရုပ်အလောင်းကို နာရေး အခမ်းအနားမှာ နောက်တစ်ကြိမ် လာနင်းပြီး ဖျက်ဆီးခဲ့ကြောင်း သိရပါတယ်။

ပြီးခဲ့တဲ့ သီတင်းပတ်ကုန်က နိုင်ငံ အရှေ့ပိုင်း၊ ဩရိသ ပြည်နယ်မှာ ဒီလို ထိတ်လန့်စရာ အခြေအနေမျိုး ကြုံခဲ့ရတာလို့ ရဲတွေက ပြောပါတယ်။ မေယာ မာမူဆိုတဲ့ အသက် ၇၀ အရွယ် အမျိုးသမီးကြီး တစ်ဦးဟာ ရေတွင်းကနေ ရေခပ်နေချိန်မှာ တောဆင်ရိုင်း တစ်ကောင်က အလစ်အငိုက် တိုက်ခိုက်တာ ခံခဲ့ရပါတယ်။

မေယာဟာ ဆင်နင်းခံရပြီး ပြင်းထန်တဲ့ ဒဏ်ရာတွေ ရထားတာကြောင့် ရွာသားတွေက သူ့ကို ဆေးရုံ ပို့ဆောင်ပေးခဲ့ကြပါတယ်။ ဒါပေမဲ့ ဒဏ်ရာ အရမ်းပြင်းတာမို့ ဆေးရုံမှာပဲ ကွယ်လွန်သွားခဲ့ပါတယ်။

အဲဒီနောက် မိသားစုက အလောင်းကို ရွာပြန်သယ်လာပြီး ထုံးတမ်းတွေနဲ့အညီ သင်္ဂြိုဟ်ဖို့ စီစဉ်ခဲ့ကြပါတယ်။ ဒါပေမဲ့ မြေမချခင် ဆုတောင်းတာတွေ လုပ်နေတုန်း မေယာကို နင်းသတ်ခဲ့တဲ့ ဆင်ကြီးပဲ ထပ်ရောက်လာပြန်ပြီး အလောင်းကို နင်းချေ ဖျက်ဆီးပစ်ခဲ့ပြန်ပါတယ်။ အံ့ဩ တုန်လှုပ်နေတဲ့ ဘေးလူတွေဟာ ဒီမြင်ကွင်းကို ရပ်ကြည့်နေခဲ့ရပြီး ဆင်ကြီး ထွက်သွားချိန်မှသာ နာရေးကိစ္စကို အပြီးသတ် ဆက်စီစဉ်ခဲ့ကြရပါတယ်။

Public Service Announcement

မိသားစုဝင်တွေက ဒီဆင်ကြီးဟာ မေယာအပေါ် ဘာကြောင့် အခုလို အညှိုးတကြီး ပြုမူခဲ့သလဲ ဆိုတာကို နားမလည်နိုင်ဘူးလို့ ဖွင့်ဟကြပါတယ်။ ဆင်ကြီးဟာ နာရေးမှာ ရှိနေတဲ့ တခြားသူတွေကို ရန်ပြုသွားတယ်ဆိုတဲ့ သတင်းမျိုးလည်း မကြားရပါဘူး။

ဩရိသ ပြည်နယ်ဟာ အရင်ကတည်းက လူနဲ့ တောဆင်ရိုင်းတွေကြား ပဋိပက္ခတွေ မကြာခဏ ဖြစ်ပေါ်နေကျ ပြည်နယ် တစ်ခုပါ။ လူနေ ဧရိယာတွေ ချဲ့ထွင်မှု၊ သစ်တော ဧရိယာတွေ ပြုန်းတီးမှုတွေကြောင့် လူနဲ့ တောရိုင်း တိရစ္ဆာန်တွေကြား ထိတွေ့မှုတွေ ပိုမိုထူထပ်လာပြီး မလိုလားအပ်တဲ့ ပြဿနာတွေနဲ့ ရင်ဆိုင်ရလေ့ ရှိတယ်လို့လည်း သိရပါတယ်။