အိန္ဒိယမှာ ကလေး ၈၀ ကျော် ခရမ်းချဉ်သီးတုပ်ကွေး ရောဂါသစ် ကူးစက်ခံရ

အိန္ဒိယ နိုင်ငံက ကလေးငယ်တွေမှာ ခရမ်းချဉ်သီး တုပ်ကွေးလို့ခေါ်တဲ့ အဖျားရောဂါသစ်တစ်မျိုး ပျံ့နှံ့ ဖြစ်ပွားနေတဲ့အပေါ် ကျန်းမာရေး ပညာရှင်တွေက သတိပေးထားပါတယ်။

မေလ ၆ ရက်က ကီရာလာ ပြည်နယ်မှာ အဲဒီ တုပ်ကွေးဗိုင်းရပ်စ်ကို စတင် တွေ့ရှိခဲ့ပြီး လက်ရှိ အချိန်ထိ ရောဂါဖြစ်ပွားမှု ၈၆ ခုထက်မနည်း ဆေးစစ် အတည်ပြုထားပါတယ်။ အဲဒီ ဖျားနာမှုဟာ အသက် ၅ နှစ်အောက် ကလေးတွေမှာ အဓိက ဖြစ်ပွားလေ့ ရှိတယ်လို့ သိရပါတယ်။

အိန္ဒိယနိုင်ငံ အရှေ့ဖျားက ဩရိသ ပြည်နယ် တစ်ခုတည်းမှာတင် ခရမ်းချဉ်သီး တုပ်ကွေး ဖြစ်ပွားတဲ့ ကလေးငယ် ၂၆ ဦးလောက် များပြားခဲ့ပါတယ်။ ဒီရောဂါဟာ လူကြီးတွေမှာလည်း ဖြစ်ပွားနိုင်ပေမယ့် အရွယ်ရောက်ပြီးသူတွေရဲ့ ကိုယ်ခံအား စနစ်က ပိုမိုကောင်းမွန်တာကြောင့် ရောဂါ ဖြစ်ဖို့ ခဲယဉ်းကြောင်း သိရပါတယ်။ ကလေးတွေမှာတောင် သွေးလွန်တုပ်ကွေးလို ရောဂါမျိုး ဖြစ်ပွားဖူးသူတွေမှာ ကူးစက်နိုင်ခြေ သိသိသာသာ ပိုများပါတယ်။

ခရမ်းချဉ်သီး တုပ်ကွေး ဖြစ်ပွားရင် အသက်အန္တရာယ် ထိခိုက်နိုင်ခြေ မရှိသလောက် နည်းပေမယ့်လည်း ကလေးတွေ အတော်လေး မသက်မသာ ခံစားရတတ်ပါတယ်။ ရောဂါဖြစ်ပွားရင် ကိုယ်လက် ကိုက်ခဲတာ၊ ဖျားတာ၊ နွမ်းနယ်တာတွေနဲ့ အစပြုပြီး တချို့က ဝမ်းပျက်တာ၊ အော့အန်တာ၊ ဗိုက်အောင့်တာ၊ အဆစ်အမြစ် နာကျင်တာတွေပါ ခံစားရတတ်ပါတယ်။ နောက်ပြီး အရေပြားပေါ်မှာ အနီရောင် အကွက်တွေလည်း နေရာအနှံ့ ပေါ်လာတတ်ပါတယ်။

Public Service Announcement

ကီရာလာမှာ စတင်တွေ့ရှိခဲ့တဲ့ ခရမ်းချဉ်သီး တုပ်ကွေးဟာ ရောဂါအသစ် တစ်ခုဖြစ်ပြီး ဘယ်လို ဗိုင်းရပ်စ် ရောဂါပိုးကြောင့် ဖြစ်သလဲ ဆိုတာကို အတိအကျ မသိရသေးပါဘူး။ ရောဂါကြောင့် ဖြစ်လာတဲ့ အနီရောင် အကွက်တွေက ဝိုင်းစက်ပြီး ခရမ်းချဉ်သီးနဲ့ တူတာကြောင့် ဒီနာမည် ပေးထားတာပါ။ ရောဂါ ကူးစက်ခံရပြီးရင် တစ်ပတ်လောက်အတွင်း သက်သာ ပျောက်ကင်းသွားတတ်ပါတယ်။

ဒါပေမဲ့ ကျန်းမာရေး ပညာရှင်တွေကတော့ ပေါ့ပေါ့ဆဆ သဘောထားရင် ပျံ့နှံ့မှု အရမ်းမြန်ဆန်သွားပြီး နိုင်ငံရဲ့ ကျန်းမာရေး စောင့်ရှောက်မှု စနစ်အပေါ် ဝန်ပိလာစေနိုင်ကြောင်း သတိပေးထားပါတယ်။ အထူးသဖြင့် ကိုဗစ် ကပ်ရောဂါဆိုးကြီးရဲ့ ခြိမ်းခြောက်မှုတွေ အကင်းမသေသေးချိန်မှာ နောက်ထပ် ရောဂါတစ်ခုကြောင့် ရှုပ်ထွေးမှုတွေ ဖြစ်သွားစေနိုင်တယ်လို့ ဆိုပါတယ်။ ဒီရောဂါဟာ သလိပ်၊ တံတွေး အစရှိတဲ့ ခံတွင်းကထွက်တဲ့ အရည်တွေကနေတဆင့် အဓိက ကူးစက်နိုင်ပါတယ်။

ခရမ်းချဉ်သီး တုပ်ကွေး ရောဂါအတွက် တိကျတဲ့ ကုသဆေး မရှိသေးဘဲ ရောဂါလက္ခဏာအလိုက် သက်သာစေမယ့် ဆေးတွေသာ သုံးစွဲနေတယ်လို့ ဆရာဝန်တွေက ပြောပါတယ်။ ဒီရောဂါဟာ တစ်ကိုယ်ရည် သန့်ရှင်းမှု အားနည်းတဲ့ ကလေးတွေမှာ အဖြစ်များတာကြောင့် အကောင်းဆုံး ကာကွယ်နည်းက တစ်ကိုယ်ရည် သန့်ရှင်းမှုကို ဂရုစိုက်ဖို့သာ ဖြစ်ပါတယ်။

နောက်တစ်ချက်က ရောဂါဖြစ်တဲ့ ကလေးတွေဟာ အပြည့်အဝ အနားယူသင့်ပြီး အဲဒီလို မဟုတ်ရင် နောက်ဆက်တွဲ မလိုလားအပ်တဲ့ အကျိုးဆက်တချို့ စွဲကျန်နေနိုင်တယ်လို့ ကျန်းမာရေး ပညာရှင်တွေက သတိပေးထားပါတယ်။ နောက်ပြီး ကလေးတွေက အနီကွက်တွေ၊ အနာဖုတွေကို လက်သည်းတွေနဲ့ ကုတ်တာ၊ ဆိတ်တာမျိုး မလုပ်မိဖို့လိုပြီး အဲဒီကျရင် ရောဂါ လက္ခဏာတွေက ပိုပြင်းထန်သွားနိုင်တယ်လို့လည်း သိရပါတယ်။