ယူကရိန်းက ရထားဘူတာရုံ တစ်ခုကို ရုရှားက ဒုံးကျည်နဲ့ ပစ်ခတ်ခဲ့တာကြောင့် လူ ၂၅ ဦးထက်မနည်း သေဆုံးသွားကြောင်း သိရပါတယ်။
ယူကရိန်းကို ရုရှားက ကျူးကျော် စစ်ပြုခဲ့တာ ၆ လပြည့်မြောက်ပြီး ယူကရိန်း လွတ်လပ်ရေးနေ့နဲ့လည်း တိုက်ဆိုင်နေတဲ့ ကာလမှာ ရုရှားစစ်တပ်က အခုလိုမျိုး အရပ်သား ပစ်မှတ် တစ်ခုကို တိုက်ခိုက်ခဲ့တာ ဖြစ်ပါတယ်။ ပြီးခဲ့တဲ့ ရက်ပိုင်းမှာ ကတည်းက ဥရောပ နိုင်ငံတွေရဲ့ စစ်ထောက်လှမ်းရေး အဖွဲ့တွေက ရုရှားစစ်တပ်ဟာ ယူကရိန်းရဲ့ အရပ်ဖက် ပစ်မှတ်တွေကို တိုက်ခိုက်လာနိုင်ကြောင်း ထုတ်ပြန် သတိပေးထားပါသေးတယ်။
ယူကရိန်း အရှေ့ပိုင်းက ချပ္ပလင်းမြို့မှာ ဒုံးကျည် ကျရောက် ပေါက်ကွဲတဲ့နောက် လူ ၅ ယောက်ဟာ ကားတစ်စီးထဲ ပိတ်မိနေပြီး အရှင်လတ်လတ် မီးလောင် သေဆုံးသွားခဲ့ကြပါတယ်။ သေဆုံးသူတွေထဲမှာ ကလေး ၂ ယောက်လည်း ပါဝင်တယ်လို့ ဆိုပါတယ်။
ယူကရိန်း သမ္မတ ဗိုလိုဒီမာ ဇီလန်စကီးက ရုရှားရဲ့ စည်းမဲ့ကမ်းမဲ့ တိုက်ခိုက်မှုအကြောင်း အသေးစိတ် အစီရင်ခံချက်တွေကို ကုလသမဂ္ဂ လုံခြုံရေး ကောင်စီ အစည်းအဝေး တစ်ခုမှာ ထုတ်ပြန် ကြေညာသွားခဲ့ပါတယ်။ ရုရှား ဒုံးကျည်ကြောင့် အပြစ်မဲ့ ပြည်သူ ၂၄ ဦး သေဆုံးပြီး ၃၁ ဦးထက်မနည်း ဒဏ်ရာတွေ ရခဲ့တယ်လို့ ဇီလန်စကီးက ဆိုပါတယ်။ ရုရှားဖက်ကတော့ ဒီကိစ္စအပေါ် ဘာမှတ်ချက်ပေး တုံ့ပြန်မှုမှ မရှိသေးပါဘူး။
Public Service Announcement
အရင်ကတည်းက ရုရှားဟာ အရပ်ဖက် အခြေခံ အဆောက်အအုံတွေကို တိုက်ခိုက်တာမျိုးတွေ လုပ်ခဲ့ဖူးပေမယ့် သူတို့ မကျူးလွန်ပါဘူးလို့ မျက်နှာပြောင်တိုက် ငြင်းဆန်လေ့ ရှိပါတယ်။ ဧပြီလတုန်းကလည်း ခရာမာတော့စ်ခ် မြို့မှာရှိတဲ့ ဘူတာတစ်ခုကို ရုရှားဒုံးကျည် ထိမှန်လို့ လူ ၅၀ ကျော် သေဆုံးခဲ့ဖူးကြောင်း သိရပါတယ်။
