အိန္ဒိယနိုင်ငံ အနောက်ပိုင်းမှာ ကြိုးတံတား ပြတ်ကျမှုကြောင့် လူပေါင်း ၁၃၀ ထက်မနည်း သေဆုံးခဲ့ကြောင်း သိရှိရပါတယ်။
ဝန်ကြီးချုပ် နာယန်ဒရာ မိုဒီရဲ့ ဇာတိ ပြည်နယ်လည်းဖြစ်တဲ့ ဂူဂျာရတ်မှာ လူတွေ စည်ကားနေတုန်း အောက်တိုဘာ ၃၀ က ကြိုးတံတား ပြတ်ကျခဲ့တာ ဖြစ်ပါတယ်။ ဒေပဝါလီ ပွဲတော်ကာလ ဖြစ်တာကြောင့် ကြိုးတံတားပေါ် လည်ပတ်သူတွေ စည်ကားနေတဲ့ အချိန်မှာ အခုလို မတော်တဆ ဖြစ်ရပ်ဆိုးကြီး ပေါ်ပေါက်ခဲ့တာပါ။
မော်ဘီးမြို့မှာ တည်ရှိတဲ့ ကြိုးတံတား ပြတ်သွားချိန် တံတားပေါ်မှာ ရှိနေသူတွေ ရာနဲ့ချီပြီး ရေထဲ ပြုတ်ကျကုန်ပါတယ်။ အဲဒီနောက် လူပေါင်း ၈၀ ကျော်လောက်ကို ကယ်ဆယ်နိုင်ခဲ့ပေမယ့် ညအမှောင် ကြီးစိုးသွားချိန်မှာ ကယ်ဆယ်ရေး ဆက်လက် ဆောင်ရွက်ဖို့ အခက်တွေ့ခဲ့ကြောင်း တာဝန်ရှိသူတွေက ပြောပါတယ်။
အောက်တိုဘာ ၃၁ ရက် မနက်ပိုင်းထိ အခြေအနေတွေအရ ရုပ်အလောင်း ၁၃၀ လောက် ရှာတွေ့ထားပြီဖြစ်ပြီး နောက်ထပ် ပျောက်ဆုံးနေသူ တော်တော်များများ ရှိသေးတယ်လို့ ဆိုပါတယ်။ သေဆုံးသူ အများစုဟာ ကလေးတွေ၊ အမျိုးသမီးတွေနဲ့ အဖွားအိုတွေ ဖြစ်တယ်လို့လည်း သိရပါတယ်။
Public Service Announcement
အဲဒီကြိုးတံတားကို ကိုလိုနီခေတ် ၁၉ ရာစုကာလမှာ တည်ဆောက်ထားခဲ့တာပါ။ ကြံ့ခိုင်မှု အားနည်းလာတဲ့အတွက် အကြီးစား ပြင်ဆင်မှုတွေ ပြုလုပ်ပြီး ကြိုးတံတားကို ပြန်ဖွင့်လှစ်ထားတာ တစ်ပတ်လောက်ပဲ ရှိသေးတယ်လို့ ဒေသခံတွေက ပြောပါတယ်။ ဒါပေမဲ့ လူတွေ အမြောက်အမြား တက်လိုက်တဲ့ အခါမှာတော့ တံတားက တောင့်မခံနိုင်ဘဲ ပြတ်ကျခဲ့တာလို့ ယူဆရပါတယ်။
ဂူဂျာရတ်ပြည်နယ် ဝန်ကြီးချုပ် ဘူပန်ဒရာ ပက်တဲလ်က အခင်းဖြစ်ရာ နေရာကို ကိုယ်တိုင်သွားရောက်ပြီး သေဆုံးသူတွေရဲ့ မိသားစုတွေကို အားပေး တွေ့ဆုံခဲ့ပါတယ်။ ပက်တဲလ်က သေဆုံးသူ တစ်ဦးစီအတွက် ပြည်နယ် အစိုးရက နစ်နာကြေး ရူပီး ၄ သိန်း ထောက်ပံ့သွားမယ်လို့ ကတိပြုပါတယ်။ နိုင်ငံ ဝန်ကြီးချုပ် မိုဒီကလည်း ဗဟိုအစိုးရ အနေနဲ့ သေဆုံးသူတွေရဲ့ မိသားစုတွေကို ရူပီး ၂ သိန်းစီ သီးခြား နစ်နာကြေး ပေးမယ်လို့ ကြေညာခဲ့ပါတယ်။
ရဲတွေက တံတားပြတ်ကျတဲ့ အကြောင်းရင်းနဲ့ ပတ်သက်လို့ စုံစမ်းစစ်ဆေးမှုတွေ ထိထိရောက်ရောက် ဆောင်ရွက်မယ်လို့ အာမခံထားပါတယ်။ မျက်မြင်တချို့ရဲ့ အဆိုအရ ဖြစ်ရပ်ဆိုးကြီး မကြုံခင်က ကြိုးတံတားရဲ့ အလယ်ပိုင်းလောက်မှာ လူတော်တော်များများက ခုန်ပေါက်တာ၊ တံတားကို အလွန်အကျွံ ယိမ်းယိုင် လှုပ်ခါအောင် လုပ်နေတာတွေ တွေ့ခဲ့ကြောင်းလည်း သိရပါတယ်။
