ကြက်ဥနဲ့ အပေါက်ခံရတဲ့ ပြင်သစ် သမ္မတ

ပြင်သစ် သမ္မတ အီမန်နျူရယ်လ် မာခရွန်ဟာ ကြက်ဥနဲ့ ပစ်ပေါက် တိုက်ခိုက်မှု တစ်ခု ကြုံခဲ့ကြောင်း သိရပါတယ်။

စက်တင်ဘာ ၂၇ ရက်က လိုင်ယွန်မြို့က အစားအသောက် ပြပွဲတစ်ခုကို မာခရွန် သွားရောက်ချိန်မှာ လူတစ်ယောက်က သူ့ကို ကြက်ဥနဲ့ ပစ်ပေါက်ခဲ့တာပါ။ ကြက်ဥက သမ္မတရဲ့ ပခုံးကို ထိမှန်ပြီး ကြမ်းပြင်ပေါ် ကျရောက် ကွဲကျေသွားတယ်လို့ မျက်မြင် ဂျာနယ်လစ် တစ်ယောက်က ပြောပါတယ်။

ရုတ်တရက် ကြုံလာတဲ့ အခြေအနေကြောင့် မာခရွန်ရဲ့ သက်တော်စောင့်တွေ လှုပ်လှုပ်ရှားရှား ဖြစ်သွားပြီး သမ္မတကို ကာကွယ်ဖို့ ကြိုးစားခဲ့ပါတယ်။ နောက်ပိုင်းမှာ လူတစ်ဦးကို ထိန်းသိမ်းထားလိုက်ကြောင်း အာဏာပိုင်တွေက အတည်ပြုပါတယ်။

မာခရွန်ကို ကြက်ဥနဲ့ ပစ်ပေါက်သူဟာ လူငယ်တစ်ဦးဖြစ်ပြီး သူ့ရဲ့ ရည်ရွယ်ချက် အစစ်အမှန်ကိုတော့ မသိရသေးပါဘူး။ မျက်မြင်တွေက အဲဒီလူငယ်ဟာ သမ္မတကို ကြက်ဥနဲ့ လှမ်းပေါက်ချိန်မှာ တစ်ခုခု အော်ဟစ် ကြိမ်းဝါးတာမျိုး မရှိဘဲ နှုတ်ဆိတ်နေတယ်လို့ ဆိုပါတယ်။

Public Service Announcement

သမ္မတ နန်းတော် တာဝန်ရှိသူတွေကတော့ ဒီကိစ္စကို ပြဿနာ ကြီးကြီးမားမားလို့ မယူဆကြောင်း၊ ပြပွဲ တလျှောက်လုံး သမ္မတကို ပြည်သူ အများစုက နွေးနွေးထွေးထွေး ကြိုဆို နှုတ်ဆက်ခဲ့ကြောင်း ထုတ်ပြန်ပါတယ်။ မာခရွန်ဟာ သမ္မတလောင်း ဘဝ ၂၀၁၇ တုန်းကလည်း ကြက်ဥနဲ့ အပေါက်ခံရပြီး အဲဒီတုန်းက သူ့ခေါင်း တည့်တည့်ကို ထိမှန်ခဲ့ကြောင်း သိရပါတယ်။