အသုံးစရိတ် ပြဿနာကြောင့် အစိုးရ ယန္တရား ရပ်တန့်သွားမယ့် အခြေအနေကို အမေရိကန် လွှတ်တော်က အချိန်ကပ်ပြီး ညှိနှိုင်း ကျော်လွှားနိုင်ခဲ့ပါတယ်။
လွှတ်တော် နှစ်ရပ်က ကိုယ်စားလှယ်တွေ သဘောတူထားတဲ့ ယာယီ အသုံးစရိတ် ချိန်ညှိမှု ဥပဒေ တစ်ရပ်ကို သမ္မတ ဂျိုးဘိုင်ဒန်က စက်တင်ဘာ ၃၀ မှာ လက်မှတ် ရေးထိုးခဲ့တာကြောင့် ဒီဇင်ဘာ လဆန်းထိ အစိုးရအတွက် အသုံးစရိတ် ဖူလုံနေဦးမှာ ဖြစ်ပါတယ်။ ဒီအတောအတွင်း နောက်ထပ် အသုံးစရိတ်သစ် အစီအမံတွေအတွက် လွှတ်တော်ထဲက ဒီမိုကရက်တွေနဲ့ ရီပတ်လလစ်ကန် အင်အားစုတွေ ဆက်လက် ဆွေးနွေးနေမှာပါ။
ဘိုင်ဒန်ဟာ အသုံးစရိတ် မူဝါဒ ညှိနှိုင်းရေး နောက်ဆုံး သတ်မှတ်ကာလ မတိုင်ခင် နာရီပိုင်း အလိုမှာ အခု ဥပဒေကို လက်မှတ် ထိုးနိုင်ခဲ့တာပါ။ တကယ်လို့သာ အသုံးစရိတ်ကိစ္စ လွှတ်တော်ထဲမှာ ညှိနှိုင်းတာ အဆင်မပြေခဲ့ရင် အစိုးရ လက်အောက်က ပြတိုက်တွေ၊ အမျိုးသား ဥယျာဉ်တွေနဲ့ တခြား အရေးမကြီးတဲ့ လုပ်ငန်းတွေ တော်တော်များများကို ယာယီ ပိတ်ထားရမှာ ဖြစ်ပါတယ်။ သမ္မတဟောင်း ဒေါ်နယ်လ်ထရမ့်၊ ဘာရက် အိုဘားမားတို့ လက်ထက်ကလည်း ဒီလို အခြေအနေတွေ ကြုံခဲ့ဖူးပါတယ်။
ဘိုင်ဒန် လက်မှတ်ရေးထိုးလိုက်တဲ့ ယာယီ အသုံးစရိတ် သတ်မှတ်ချက် အသစ်မှာ ဟာရီကိန်း မုန်တိုင်းဒဏ်ခံ ဒေသတွေအတွက် ကယ်ဆယ် ထောက်ပံ့ရေး ရန်ပုံငွေတွေ၊ အာဖဂန် နစ္စတန်က ပြောင်းရွှေ့လာတဲ့ ဒုက္ခသည်တွေအတွက် ပြန်လည် နေရာချထားရေး ရန်ပုံငွေတွေလည်း ပါဝင်နေပါတယ်။
Public Service Announcement
လတ်တလော ပြဿနာ ပြေလည်သွားပေမယ့် နောက်ထပ် ညှိနှိုင်းစရာ၊ လုပ်ဆောင်စရာတွေ အများကြီး ကျန်နေသေးတယ်လို့ ဘိုင်ဒန်က ဆိုပါတယ်။ လောလောဆယ်တော့ လွှတ်တော်ရဲ့ သဘောတူညီမှုအရ အစိုးရ အေဂျင်စီတွေ ပိတ်စရာ မလိုတော့ပါဘူး။ တကယ်လို့ ဒီသဘောတူညီမှုသာ မရခဲ့ရင် ကျန်းမာရေးနဲ့ လူမှုဖူလုံရေး ဝန်ကြီးဌာနက ဝန်ထမ်း ၄၃ ရာခိုင်နှုူန်းကို လစာမဲ့ ခွင့်ပေးထားဖို့ ကြိုတင် စီစဉ်ထားရပါတယ်။
ဘဏ္ဍာရေး ဝန်ကြီး ဂျဲနက် ယယ်လန်က အမေရိကန်ဟာ အောက်တိုဘာ ၁၈ ရက်ကျရင် ကြွေးမြီ ကန့်သတ်ချက် စံအမှတ်ထိ ရောက်ရှိလိမ့်မယ်လို့ ပြောပါတယ်။ ဒီအတွက် အစိုးရဟာ သီးခြား အစီအမံတွေနဲ့ ကြွေးမြီပြန်လည် လျှော့ချဖို့ ဖြေရှင်းရမှာ ဖြစ်ပါတယ်။
