အိန္ဒိယ နိုင်ငံက ထုတ်လုပ်တဲ့ ကိုဗစ်ကာကွယ်ဆေး Covaxinကို ကမ္ဘာ့ကျန်းမာရေး အဖွဲ့ကြီး (WHO)က အရေးပေါ် အသုံးပြုခွင့် အသိအမှတ် ပြုပေးလိုက်ပြီ ဖြစ်ပါတယ်။
Bharat Biotechက ထုတ်လုပ်တဲ့ ပြည်တွင်းဖြစ် ကာကွယ်ဆေးကို အိန္ဒိယမှာတော့ အတော်လေး ကျယ်ကျယ်ပြန့်ပြန့် သုံးစွဲနေနှင့်ပြီးသားပါ။ အခုအခါ WHOရဲ့ အသိအမှတ်ပြုမှု ရသွားပြီ ဖြစ်တာကြောင့် တခြားနိုင်ငံတွေဆီ တင်ပို့ဖို့လည်း အဆင်ပြေသွားပါပြီ။
WHOက Covaxinဟာ ဆင်းရဲနွမ်းပါးတဲ့ နိုင်ငံငယ်တွေဆီ ကာကွယ်ဆေး ဖြန့်ဝေ တင်ပို့ရေး မျှော်မှန်းချက်ကို ပိုမို တွန်းအားပေးနိုင်လိမ့်မယ်လို့ ပြောကြားခဲ့ပါတယ်။ Covaxinကို အသက် ၁၈ နှစ်အထက် အရွယ်တွေမှာ သီတင်းလေးပတ်ခြားပြီး နှစ်ကြိမ် ထိုးနှံဖို့ WHOက ထောက်ခံထားပါတယ်။
ဒီဆေးကို အိန္ဒိယမှာ ဇန်နဝါရီလ ကတည်းက သုံးစွဲနေခဲ့ပါတယ်။ ဒီအတောအတွင်း ကျယ်ကျယ်ပြန့်ပြန့် သုတေသနပြု လေ့လာမှုတွေ ဆက်လက် လုပ်ဆောင်ခဲ့ပြီးမှ WHOရဲ့ အသိအမှတ်ပြုမှုအတွက် လျှောက်ထား တောင်းဆိုခဲ့တာ ဖြစ်ပါတယ်။
Public Service Announcement
Bharat Biotech အနေနဲ့ WHOရဲ့ လမ်းညွှန်မှုတွေနဲ့အညီ ဆေးဝါးတွေ ပြည်ပ တင်ပို့ခွင့် ရတော့မှာ ဖြစ်သလို အိန္ဒိယမှာ ဒီဆေး ထိုးထားသူတွေ အနေနဲ့လည်း WHO အသိအမှတ်ပြု တခြား ကာကွယ်ဆေးတွေ နည်းတူ ပြည်ပ ခရီးသွားလာတာမျိုးတွေမှာ အဆင်ပြေလာတော့မှာပါ။
အခုဆိုရင် WHOက အသိအမှတ် ပြုထားတဲ့ ကိုဗစ် ကာကွယ်ဆေး ၇ မျိုးထိ ရှိလာပါပြီ။ အမေရိကန်က ထုတ်လုပ်တဲ့ ဆေး ၃ မျိုး၊ တရုတ်က ဆေး ၂ မျိုးနဲ့ ဗြိတိန်က ထုတ်လုပ်တဲ့ ဆေး ၁ မျိုးကိုလည်း WHOက အရေးပေါ် သုံးစွဲခွင့် ပေးထားပြီး ဖြစ်ပါတယ်။
