နိုက်ဂျီးရီးယား နိုင်ငံမှာ သက်တမ်းလွန် ကိုဗစ်ကာကွယ်ဆေး အလုံးပေါင်း တစ်သန်းကျော်ကို ဖျက်ဆီးပစ်ခဲ့ကြောင်း သိရပါတယ်။
ဗြိတိန်နိုင်ငံ၊ အောက်စ်ဖို့ဒ် တက္ကသိုလ်နဲ့ AstraZeneca ကုမ္ပဏီတို့ ပူးပေါင်း ထုတ်လုပ်ခဲ့တဲ့ အဲဒီ ကာကွယ်ဆေးတွေကို သတ်မှတ် ကာလ မတိုင်ခင်မှာ ပြည်သူတွေကို ဖြန့်ဝေ ထိုးနှံပေးဖို့ အထမမြောက်ခဲ့ဘူးလို့ နိုက်ဂျီးရီးယား အာဏာပိုင်တွေက ဝန်ခံပါတယ်။
နိုက်ဂျီးရီးယား အမျိုးသား ကျန်းမာရေး စောင့်ရှောက်မှုဌာန အကြီးအကဲ ဖိုင်ဆဲလ် ရှော်ရစ်ဘ်က ဆေးတွေ သက်တမ်း လွန်ကုန်တဲ့အခါ ဖျက်ဆီးပစ်ဖို့က လွဲပြီးတော့ တခြား ရွေးချယ်စရာ မရှိတော့ဘူးလို့ ပြောပါတယ်။ နိုက်ဂျီးရီးယားဟာ အာဖရိကတိုက်မှာ လူဦးရေ အထူထပ်ဆုံး နိုင်ငံဖြစ်ပြီး ကာကွယ်ဆေး လိုအပ်ချက် မြင့်မားနေပါတယ်။ အဓိက ပြဿနာက လှူဒါန်းလိုက်တဲ့ ကာကွယ်ဆေးတွေဟာ နိုက်ဂျီးရီးယားကို ရောက်လာချိန် ကတည်းက သက်တမ်း သိပ်မကျန်တော့တာ ဖြစ်တယ်လို့ သူက အကြောင်းပြပါတယ်။
နိုက်ဂျီးရီးယားမှာ လူဦးရေ ၂၀၆ သန်းလောက် ရှိတဲ့အနက် ၂ ရာခိုင်နှုန်းလောက်သာ ကာကွယ်ဆေး ၂ ကြိမ် အပြည့် ထိုးနှံရပါသေးတယ်။ အစိုးရက လာမယ့် ဖေဖော်ဝါရီလမှာ လူဦးရေ ၂၅ ရာခိုင်နှုန်းထိ ကာကွယ်ဆေး ထိုးပေးနိုင်ဖို့ ရည်ရွယ်ထားပေမယ့် အထမြောက်ဖို့ အလားအလာ နည်းပါတယ်။
Public Service Announcement
လတ်တလောမှာတော့ ကူးစက်နှုန်းမြန် ကိုရိုနာဗိုင်းရပ်စ် မျိုးစိတ်သစ် Omicronကလည်း နိုက်ဂျီးရီးယားကို ရောက်ရှိနေပြီး လျင်လျင်မြန်မြန် ပျံ့နှံ့နေပါတယ်။ လက်ရှိ ပြည်တွင်းမှာ နေ့အလိုက် ကူးစက်နှုန်းဟာ လွန်ခဲ့တဲ့ သီတင်း ၂ ပတ်နဲ့ ယှဉ်ရင် ၅ ဆလောက်ထိ မြင့်တက်လာနေကြောင်းလည်း သိရပါတယ်။
