တရုတ်နဲ့ ရေပိုင်နက် အငြင်းပွားမှုတွေ ရှိနေတဲ့ အခြေအနေမှာ ဖိလစ်ပိုင် ရေတပ်ဟာ တောင်ကိုရီးယားကနေ စစ်သင်္ဘော အသစ်နှစ်စီး မှာယူလိုက်ကြောင်း သိရပါတယ်။
ဖိလစ်ပိုင် ကာကွယ်ရေး ဝန်ကြီး ဒယ်လ်ဖင် လော်ရန်ဇာနာက Hyundai အကြီးစား စက်မှု လုပ်ငန်းစုကြီးရဲ့ အကူအညီကို ရယူပြီး ရေတပ်ကို ခေတ်မီအောင် မွမ်းမံ တည်ဆောက်ဖို့ စီစဉ်နေကြောင်း ဒီဇင်ဘာ ၂၈ ရက်က ပြောကြားခဲ့ပါတယ်။ ဖိလစ်ပိုင်ဟာ ဒေသတွင်း အင်အားကြီး တရုတ်နိုင်ငံနဲ့ တောင်တရုတ်ပင်လယ် ရေပိုင်နက်ကိစ္စ အငြင်းပွားမှု ပြဿနာတွေ ကြုံတွေ့နေရပါတယ်။
ပြီးခဲ့တဲ့ ဆယ်စုနှစ်တွေအတွင်း ဖိလစ်ပိုင် ရေတပ်ရဲ့ ဖွဲ့စည်းပုံဟာ အကျပိုင်းဖက်ကို ဦးတည်ခဲ့ပါတယ်။ ရေတပ်မှာ ဒုတိယ ကမ္ဘာစစ်လက်ကျန် အမေရိကန်လုပ် ရေယာဉ်တွေကိုတောင် အသုံးပြုနေခဲ့ရပါတယ်။ ဒါပေမဲ့ အရင် သမ္မတ ဘီနစ်ဂ်နို အကွီနို လက်ထက်၊ ၂၀၁၀ ကစလို့ ရေတပ်ကို စနစ်တကျ ပြန်လည် အဆင့်မြှင့် ဖွဲ့စည်းဖို့ စတင် လုပ်ဆောင်လာခဲ့ပါတယ်။
အခု တောင်ကိုရီးယားကနေ မှာယူမယ့် ရေယာဉ်နှစ်စီးရဲ့ ကျသင့်တန်ဖိုးက ပီဆိုငွေ ၂၈ ဘီလီယံ၊ တစ်နည်းအားဖြင့် အမေရိကန်ဒေါ်လာ ၅၅၆ သန်း ဝန်းကျင်လောက် ရှိမယ်လို့ ဆိုပါတယ်။ Hyundaiဟာ လွန်ခဲ့တဲ့ ၅ နှစ်လောက်ကလည်း ဖိလစ်ပိုင် ရေတပ်အတွက် အကြီးစား ဖရီးဂိတ် စစ်သင်္ဘောနှစ်စီး တည်ဆောက်ပေးဖို့ ကန်ထရိုက်စာချုပ် ရရှိခဲ့ဖူးပါတယ်။
Public Service Announcement
ဖိလစ်ပိုင် ရေတပ်ဟာ သေးငယ်ကျစ်လစ်ပြီး မြန်နှုန်းမြင့် ရွေ့လျားနိုင်တဲ့ နည်းပညာမြင့် စစ်ရေယာဉ်တွေကို ပိုမို အသုံးပြုဖို့ ရည်ရွယ်လာပါတယ်။ တောင်ကိုရီးယားကနေ မှာယူမယ့် စစ်သင်္ဘောတွေဟာ ရေပြင်၊ ရေအောက်နဲ့ ဝေဟင်က ပစ်မှတ်တွေကို ကိုင်တွယ် တုံ့ပြန်နိုင်စွမ်း ရှိလိမ့်မယ်လို့ လော်ရန်ဇာနာက ဆိုပါတယ်။
ပြီးခဲ့တဲ့ နှစ်ပိုင်းတွေအတွင်း ဖိလစ်ပိုင် ရေတပ်ဟာ အမေရိကန် ကမ်းခြေစောင့်တပ်ရဲ့ ရေယာဉ်ဟောင်း နှစ်စီးနဲ့ ဩစတြေးလျ ရေတပ်ရဲ့ ကမ်းတက်ရေယာဉ်ဟောင်း ၃ စီးကိုလည်း လက်ခံ ရရှိထားပါတယ်။ ဒါ့အပြင် ဂျပန်ကလည်း ဖိလစ်ပိုင် ကမ်းခြေစောင့်တပ်အတွက် ရေယာဉ်တွေ ထောက်ပံ့ပေးထားပါတယ်။ ဒီအခြေအနေ အားလုံးက တောင်တရုတ်ပင်လယ် ရေပိုင်နက်ကို လက်ဝါးကြီးအုပ်ဖို့ ကြံစည်လာတဲ့ တရုတ်ရဲ့ ခြေလှမ်းတွေကို တုံ့ပြန် တွန်းလှန်ဖို့ ဖြစ်ပါတယ်။
