ယူကရိန်း အရှေ့ပိုင်း စစ်မြေပြင်မှာ ရုရှားတပ်တွေ အတုံးအရုံး ထိခိုက်သေကြေနေကြတယ်လို့ ယူကရိန်း သမ္မတ ဗိုလိုဒီမာ ဇီလန်စကီးက ပြောကြားခဲ့ပါတယ်။
ရုရှား စစ်တပ်ဟာ ပြီးခဲ့တဲ့ ရက်ပိုင်းတွေအတွင်း ယူကရိန်းနိုင်ငံ အနှံ့က အရပ်ဖက် အခြေခံ အဆောက်အအုံတွေကို ပစ်မှတ်ထား တိုက်ခိုက်မှုတွေ သိသိသာသာ အရှိန်မြှင့်တင်လာခဲ့ပါတယ်။ ရုရှားရဲ့ ဒုံးကျည်တွေနဲ့ ဒရုန်းတွေ ထိမှန်မှုကြောင့် ကိယက်ဗ်မြို့တော် အပါအဝင် ယူကရိန်း နိုင်ငံအနှံ့မှာ လျှပ်စစ်မီးနဲ့ သောက်ရေ ပြတ်တောက်မှုတွေ ကြုံတွေ့နေပါတယ်။
ဇီလန်စကီးကတော့ ရုရှားက အခုလိုမျိုး အရပ်ဖက် အခြေခံ အဆောက်အအုံတွေကို ပစ်မှတ်ထား တိုက်ခိုက်မှုတွေ အရှိန်မြှင့်လာတာဟာ ယူကရိန်း အရှေ့ပိုင်း စစ်မြေပြင်က ရှုံးနိမ့်မှုတွေကြောင့်လို့ ဆိုပါတယ်။ လေ့လာသူတွေက ယူကရိန်း-ရုရှား စစ်ပွဲဟာ အအေးဓာတ် လွန်ကဲပြင်းထန်တဲ့ ဆောင်းရာသီ ကာလမှာ ရှေ့မတိုးသာ၊ နောက်မဆုတ်သာ အခြေအနေမျိုး ဖြစ်နေမယ်လို့ ခန့်မှန်းထားပါတယ်။
ဇီလန်စကီးကတော့ ယူကရိန်း တပ်တွေဟာ ဒွန်းဘက်စ်ဒေသမှာ စစ်ဆင်ရေး အရှိန်ကို ဆက်လက် မြှင့်တင်နေပြီး ရုရှားက အကြီးအကျယ် အထိနာနေကြောင်း၊ ဒီစစ်ဆင်ရေးတွေကို ဆောင်းတွင်းမှာပါ ရှေ့ဆက်နိုင်ဖို့ ရည်မှန်းထားကြောင်း ပြောပါတယ်။
Public Service Announcement
အမေရိကန် အမျိုးသား လုံခြုံရေး အကြံပေး အရာရှိ ဂျိတ်ခ် ဆူလီဗန်ကတော့ စစ်ပွဲရဲ့ အနာဂတ်က ဘယ်လိုဖြစ်လာပါစေ၊ အမေရိကန်ဟာ ယူကရိန်းကို မယိမ်းမယိုင် ဆက်လက် ထောက်ခံ အားပေးနေမယ်လို့ ကြေညာထားပါတယ်။
အမေရိကန်ဟာ ရုရှားကျူးကျော်စစ် စတင်ချိန်ကတည်းက ယူကရိန်းအတွက် ဒေါ်လာ ၁၈.၂ ဘီလီယံဖိုး စစ်လက်နက်တွေနဲ့ တခြားအထောက်အပံ့တွေ ပေးပို့ ကူညီထားပြီး ဖြစ်ပါတယ်။
