ရေတပ် သင်္ဘောတွေအချင်းချင်း တိုက်မိလုနီးပါး အခြေအနေထိ ကြုံခဲ့ပြီးတဲ့နောက် အမေရိကန် အနေနဲ့ ရန်စတဲ့ အပြုအမူတွေကို ရှောင်ကြဉ်သင့်နေပြီလို့ တရုတ် ကာကွယ်ရေး ဝန်ကြီးက ပြောကြားသွားခဲ့ပါတယ်။
ဇွန်လ ၄ ရက်က စင်ကာပူ နိုင်ငံမှာ ကျင်းပတဲ့ ရှန်ဂရီလာ ကာကွယ်ရေး ညီလာခံမှာ တရုတ် ကာကွယ်ရေးဝန်ကြီး လီရှန်ဖူက အမေရိကန်အပေါ် အတော်လေး အားပါပြင်းထန်တဲ့ ဝေဖန်မှုတွေ ပါဝင်တဲ့ မိန့်ခွန်းမျိုး ပြောသွားခဲ့တာပါ။ လီက အမေရိကန်နဲ့ မဟာမိတ် NATO အင်အားစုတွေဟာ ကိုယ်ကျိုးတစ်ခုတည်းကို ရှေ့ရှုပြီး အာရှ-ပစိဖိတ် ဒေသမှာ ဩဇာ လွှမ်းမိုး ထူထောင်ဖို့ ကြိုးစားနေကြောင်း၊ ဒီအခြေအနေက ဒေသတစ်ခုလုံးရဲ့ တည်ငြိမ်မှုကို ထိခိုက်လာစေနိုင်ကြောင်း ဝေဖန်ခဲ့ပါတယ်။
ရှန်ဂရီလာ ညီလာခံမှာပဲ ဇွန်လ ၃ ရက်တုန်းက အမေရိကန် နိုင်ငံခြားရေးဝန်ကြီး လွိုက်ဒ် အော်စတင်ကလည်း တရုတ်သာ ထိုင်ဝမ်ကျွန်းကို စစ်အင်အားသုံး တိုက်ခိုက် သိမ်းပိုက်ခဲ့မယ်ဆိုရင် အကြီးအကျယ် ဆိုးကျိုးသက်ရောက်မှုတွေ ဖြစ်လာနိုင်သလို ကမ္ဘာ့စီးပွားရေး ကဏ္ဍကလည်း မတွေးရဲလောက်စရာ ထိခိုက်ဆုံးရှုံးမှုတွေ ဖြစ်သွားနိုင်တယ်လို့ သတိပေးခဲ့ပါတယ်။
အစောပိုင်းတုန်းက အမေရိကန်ရဲ့ အင်ဒို-ပစိဖိတ် စစ်ရေးကွပ်ကဲမှု ဌာနချုပ်က ထိုင်ဝမ် ရေလက်ကြားမှာ အမေရိကန်နဲ့ ကနေဒါ ရေတပ်တွေ ပူးပေါင်း စစ်ရေးလေ့ကျင့်နေတဲ့အချိန် တရုတ် ဖျက်သင်္ဘော တစ်စီးက အမေရိကန်ရဲ့ USS Chung-Hoon စစ်သင်္ဘောကို အတင်းဝင်နှောင့်ယှက်ခဲ့တာကြောင့် ရေယာဉ်နှစ်စီး တိုက်မိလုနီးပါး ဖြစ်ခဲ့ကြောင်း ကြေညာခဲ့ပါတယ်။
Public Service Announcement
USS Chung-Hoonဟာ အမြန်နှုန်းကို လျှော့ချပြီး သင်္ဘောချင်း မတိုက်မိအောင် ရှောင်ရှားခဲ့ရတယ်လို့ အမေရိကန်က ဆိုပါတယ်။ ကနေဒါ ရေတပ်ကလည်း အဲဒီဖြစ်စဉ်ကို မှတ်တမ်းတင်ထားခဲ့ပြီး တရုတ် သင်္ဘောဟာ ပရော်ဖက်ရှင်နယ် မပီသတဲ့ လုပ်ရပ်မျိုးကို ပြုမူခဲ့တယ်လို့ စွပ်စွဲသွားပါတယ်။
အခုသီတင်းပတ်ကုန်မှာ ရေတပ်ချင်း ငြိခဲ့တဲ့ ကိစ္စဟာ အန္တရာယ် များလွန်းပြီး မတော်တဆသာ သင်္ဘောတွေ တိုက်မိခဲ့ရင် ထိခိုက်မှုတွေ အရမ်းကြီးမားသွားနိုင်တယ်လို့ အမေရိကန် ကာကွယ်ရေးဝန်ကြီး အော်စတင်ကလည်း ဝေဖန်ခဲ့ပါတယ်။
တရုတ်နဲ့ အမေရိကန် ကာကွယ်ရေးဝန်ကြီးတွေဟာ ရှန်ဂရီလာ အစည်းအဝေးမှာ သီးခြားတွေ့ဆုံ ဆွေးနွေးမှုတွေ လုပ်ဆောင်ဖို့ ညှိနှိုင်းပေမယ့် မအောင်မြင်ခဲ့တာကလည်း နှစ်နိုင်ငံကြား စစ်ရေး မူဝါဒဆိုင်ရာ တင်းမာမှုတွေ ပိုမို မြင့်တက်လာနေတယ် ဆိုတာကို မြင်သာစေခဲ့ပါတယ်။
