ထိုင်းနိုင်ငံ၊ ဘန်ကောက်မြို့က စျေးဝယ်စင်တာမှာ လူနှစ်ဦး သေဆုံးတဲ့ ပစ်ခတ်မှု ကျူးလွန်ခဲ့သူ ဆယ်ကျော်သက် လူငယ်ကို ရာဇဝတ်ကြောင်းအရ စွဲချက် တင်လိုက်ကြောင်း သိရပါတယ်။
အသက်မပြည့်သေးတဲ့အတွက် စွဲချက်တင် ခံရသူကို ရဲတပ်ဖွဲ့က နာမည် မထုတ်ပြန်သေးဘဲ သူ့လက်ချက်ကြောင့် ရွှေ့ပြောင်းလုပ်သား မြန်မာအမျိုးသမီး တစ်ဦး၊ တရုတ်နိုင်ငံသူ အမျိုးသမီး တစ်ဦးတို့ သေဆုံးခဲ့ပြီး နောက်ထပ် ၅ ဦး ဒဏ်ရာရခဲ့ပါတယ်။ ဘန်ကောက်ရဲ့ အထင်ကရ စျေးဝယ်စင်တာကြီး တစ်ခုဖြစ်တဲ့ ဆိုင်ယမ် ပါရာဂွန်မှာ ဖြစ်ပွားခဲ့တဲ့ ပစ်ခတ်မှုဟာ လွန်ခဲ့တဲ့ ၃ နှစ်အတွင်း သေနတ်ကိုင် အကြမ်းဖက်မှုတွေ တိုးပွားလာလို့ ထိုင်းပြည်သူတွေကြား ထိတ်လန့်နေမှုကို နောက်ထပ် ဒီဂရီတစ်ဆင့် တိုးသွားစေခဲ့ပါတယ်။
လူငယ်ဟာ လူသတ်မှု၊ တရားမဝင် လက်နက် ကိုင်ဆောင်မှု၊ တရားမဝင် လက်နက်ကို လူအများကြား ယူဆောင်သွားမှုတွေ အပါအဝင် စွဲချက် ၅ ခုနဲ့ ရင်ဆိုင်ရမှာ ဖြစ်တယ်လို့ ဘန်ကောက် ရဲတပ်ဖွဲ့က ပြောပါတယ်။
ကနဦး စစ်ဆေးချက်တွေအရ လူငယ်ရဲ့ စိတ်အခြေအနေဟာ မူမှန်မဟုတ်တဲ့ ဆိုးဆိုးရွားရွား ဖိစီးမှုတွေ ရှိနေတယ်လို့ ယုံကြည်ရကြောင်း သတင်းတွေက ဖော်ပြပါတယ်။ သူဟာ ဗလာကျည် သေနတ် တစ်လက်ကို ကျည်အစစ် ထည့်ပစ်လို့ရအောင် ပြန်လည် ပြုပြင်ပြီး အခု တိုက်ခိုက်မှုကို ကျူးလွန်ခဲ့တယ်လို့ ဆိုပါတယ်။
Public Service Announcement
စျေးဝယ်စင်တာထဲမှာ ကြုံရာလူကို လိုက်လံ ပစ်ခတ်ခဲ့တဲ့နောက် သူဟာ ရဲတွေဆီမှာ အေးအေးဆေးဆေး လက်နက်ချ အဖမ်းခံခဲ့ပါတယ်။
ထိုင်းဝန်ကြီးချုပ် ဆရက်သာ သာဗီဆင်က အခုပစ်ခတ်မှုအပြီး ထိုင်းနိုင်ငံမှာ လက်နက်ကိုင်ဆောင်ခွင့် ထိန်းချုပ်ရေး မူဝါဒတွေနဲ့ ပတ်သက်လို့ တကျော့ပြန် မေးခွန်းထုတ်မှုတွေ မြင့်တက်လာတာကို အသိအမှတ် ပြုခဲ့ပြီး အစိုးရ အနေနဲ့ ကြိုတင်တားဆီး ကာကွယ်ရေးဆိုင်ရာ အစီအမံတွေကို အကောင်အထည် ဖော်သွားဖို့ စိတ်ပိုင်းဖြတ်ထားကြောင်း ပြောကြားခဲ့ပါတယ်။
အခုအခါ စျေးဝယ်စင်တာကို ပုံမှန် ပြန်လည် ဖွင့်လှစ်ထားပြီဖြစ်ပြီး အခင်းဖြစ်ရာ နေရာတဝိုက်မှာ အမှတ်တရ ပန်းစည်းတွေ လာချထားတာကို တွေ့ရပါတယ်။ LV စတိုးဆိုင်မှာ သေနတ်သမား လူငယ်ကို ဖမ်းဆီးဖို့အတွက် ရဲတွေက ခွဲဖျက်ပြီး ဝင်ရောက်ခဲ့ရာ မှန်ချပ်ကြီးကိုလည်း အလုပ်သမားတွေက ပြန်လည် လဲလှယ် တပ်ဆင်ခဲ့ကြပါတယ်။
ထိုင်းနိုင်ငံမှာ လူစုလူဝေးကို ပစ်မှတ်ထားတဲ့ ပစ်ခတ်မှုတွေက ယေဘုယျအားဖြင့် ရှားပါးတယ်လို့ ဆိုနိုင်ပေမယ့် သေနတ်ကြောင့် ပေါ်ပေါက်တဲ့ မှုခင်းတွေကတော့ အတော်လေး ထူပြောပါတယ်။ အစိုးရက လက်နက် ကိုင်ဆောင်ခွင့် စည်းမျဉ်းတွေကို တင်းကျပ်ထားပေမယ့် သေနတ်တွေကို ပြည်ပကနေ အလွယ်တကူ မှောင်ခိုတင်သွင်း ဝယ်ယူနေနိုင်ဆဲ ဖြစ်ပါတယ်။
အခုမှုခင်းမှာလည်း လူငယ်ဟာ ဗလာကျည် ထည့်ပစ်ရတဲ့ သေနတ်ကို ဝယ်ယူပြီး ကိုယ်တိုင် ပြန်လည် မွမ်းမံ ပြင်ဆင်ခဲ့တာ ဖြစ်ပါတယ်။ ထိုင်းရဲတပ်ဖွဲ့ အကြီးအကဲ တော်ဆက် ဆွတ်ခ်ဗီမောလ်က အဲဒီလူငယ်ဟာ အရင်ကရော အကြမ်းပတမ်း ကိစ္စတွေ ကျူးလွန်ဖူးတဲ့ အထောက်အထားမျိုး ရှိသလား ဆိုတာကို စုံစမ်းနေဆဲလို့ ပြောပါတယ်။
လူငယ်ဟာ သူ့နားထဲမှာ တစ်ယောက်ယောက်က လူတွေကို သေနတ်နဲ့ လိုက်ပစ်သတ်ဖို့ ညွှန်ကြားသံတွေ ကြားနေခဲ့ရကြောင်း ရဲတွေဆီမှာ ထွက်ဆိုခဲ့ပါတယ်။ အမှုနဲ့ ပတ်သက်လို့ နောက်ဆက်တွဲ စစ်ဆေးမှုတွေကို ထိုင်းရဲတပ်ဖွဲ့က အပူတပြင်း ဆက်လက် လုပ်ဆောင်နေဆဲ ဖြစ်ပါတယ်။
