အစ္စရေးဖက်ကို ချိန်ရွယ်ပြီး ယီမင်အခြေစိုက် ဟိုသီ သူပုန်တွေက ပစ်လွှတ်လိုက်တဲ့ ဖောက်ခွဲရေး ဒရုန်းတွေကို အမေရိကန် ရေတပ်က ကြားဖြတ် ပစ်ချခဲ့ရပါတယ်။
ပင်လယ်နီထဲမှာ ဖြန့်ကျက်ထားတဲ့ Arleigh Burkeအဆင့် ဖျက်သင်္ဘော တစ်စီးက နိုဝင်ဘာ ၂၃ ရက် မနက်အစောပိုင်းမှာ အစ္စရေးဆီ ဦးတည်နေတဲ့ ဒရုန်း အတော်များများကို ပစ်ချခဲ့တာလို့ အမေရိကန် ရေတပ်က ထုတ်ပြန်ပါတယ်။
USS Thomas Hudner ဖျက်သင်္ဘောဟာ ယီမင်နိုင်ငံထဲမှာ ဟိုသီတွေ ထိန်းချုပ်ထားတဲ့ နယ်မြေတွေကနေ ပျံတက်လာတဲ့ ဒရုန်းတွေကို ဟန့်တားခဲ့တာလို့ အမေရိကန်ရဲ့ ဗဟိုစစ်ရေး ကွပ်ကဲမှုဌာန (CENTCOM)ကလည်း လူမှုကွန်ရက် မီဒီယာ Xမှာ ရေးသား ဖော်ပြထားခဲ့ပါတယ်။
လောလောဆယ် ဂါဇာကမ်းမြှောင် ဒေသမှာ အစ္စရေးနဲ့ စစ်ခင်းနေတဲ့ ဟားမားစ်တွေရော၊ ယီမင်မှာ မြို့တော် ဆာနားကိုပါ သိမ်းပိုက်ထားနိုင်တဲ့ ဟိုသီတွေပါ အီရန် အစိုးရရဲ့ ကျောထောက်နောက်ခံ ပြုမှုကို ရရှိထားတဲ့ လက်နက်ကိုင် အင်အားစုတွေ ဖြစ်ကြပါတယ်။
Public Service Announcement
ဂါဇာမှာ စစ်ပွဲ စတင်ချိန် ကတည်းက ဟိုသီတွေဟာ အစ္စရေးဖက်ကို ဒုံးကျည်တွေ၊ ဒရုန်းတွေနဲ့ အလျဉ်းသင့်သလို ပစ်ခတ်နေခဲ့ပြီး ပင်လယ်နီထဲမှာ ကင်းလှည့်နေတဲ့ အမေရိကန် စစ်ရေယာဉ်တွေကလည်း အကြိမ်တိုင်း ကြားဖြတ် ပစ်ချခဲ့ပါတယ်။
အမေရိကန်ဟာ ဂါဇာစစ်ပွဲကို အရှေ့အလယ်ပိုင်း ဒေသတစ်ခုလုံး အတိုင်းအတာထိ ကျယ်ပြန့်မလာအောင် ထိန်းညှိဖို့အတွက် စစ်ပွဲ စလာကတည်းက ဒေသတွင်းမှာ စစ်အင်အား အလုံးအရင်း ဖြန့်ကျက်ထားပါတယ်။ အမေရိကန် အစိုးရက အီရန် အပါအဝင် နိုင်ငံတချို့ကို ပဋိပက္ခတွေထဲ ထဲထဲဝင်ဝင် စွက်ဖက်မလာအောင် ကြိုတင် ဟန့်တားတဲ့ အနေနဲ့ အခုလိုမျိုး တပ်တွေ ဖြန့်ထားခဲ့တာလည်း ဖြစ်ပါတယ်။
ဟိုသီတွေဟာ ပြီးခဲ့တဲ့ ရက်ပိုင်းတုန်းကလည်း ပင်လယ်နီ ရေပြင်မှာ အစ္စရေးနဲ့ ဆက်စပ်တယ်ဆိုတဲ့ ကုန်တင် သင်္ဘောတစ်စီးကို စီးနင်းခဲ့ပြီး လောလောဆယ်မှာ သင်္ဘောရော၊ အမှုထမ်း ၂၅ ဦးကိုပါ ထိန်းသိမ်းထားကြောင်း သိရပါတယ်။
