တစ်ချိန်တုန်းက ယူကရိန်း လွှဲပြောင်းပေးထားခဲ့တဲ့ နျူကလီးယား လက်နက်တွေကို ပြန်လည် ပေးအပ်သွားမှာ မဟုတ်ကြောင်း အမေရိကန် အစိုးရက အတည်ပြု ပြောကြားခဲ့ပါတယ်။
ပြီးခဲ့တဲ့လက New York Times သတင်းစာဟာ အမည်မဖော်တဲ့ အမေရိကန် ထိပ်တန်း စစ်ဘက် အရာရှိ တချို့ကို ကိုးကားပြီး သမ္မတ ဂျိုးဘိုင်ဒန်ဟာ သူ့ရဲ့ ရာထူးသက်တမ်း မကုန်ဆုံးခင်မှာ ယူကရိန်းကို နျူကလီးယား လက်နက်တွေ ပြန်လည် ပေးအပ်သွားဖွယ် ရှိနေကြောင်း ဖော်ပြခဲ့ပါတယ်။
ဒါပေမဲ့ အိမ်ဖြူတော်ရဲ့ လုံခြုံရေး အကြံပေး အရာရှိ ဂျိတ်ခ်ဆူလီဗန်ကတော့ ဒီဇင်ဘာ ၁ ရက်နေ့တုန်းက ABC သတင်းဌာနနဲ့ အင်တာဗျူးမှာ New York Timesရဲ့ အဲဒီ ဖော်ပြချက်ကို ယတိပြတ် ငြင်းဆိုသွားခဲ့ပါတယ်။
အမေရိကန်ဟာ ယူကရိန်းက ကိုယ့်ကိုယ်ကိုယ် ကြံ့ကြံ့ခံ ရပ်တည် ကာကွယ်နိုင်စေဖို့နဲ့ ရုရှားကို အန်တု တိုက်ခိုက်နိုင်ဖို့အတွက် နည်းလမ်းမျိုးစုံ စဉ်းစားထားကြောင်း၊ ဒါပေမဲ့ အဲဒီထဲမှာ နျူကလီးယား လက်နက် စွမ်းရည်တော့ ပါဝင်မှာ မဟုတ်ကြောင်း သူက ပြောပါတယ်။
Public Service Announcement
New York Times သတင်းစာရဲ့ ဆောင်းပါး ထွက်ပေါ်ခဲ့တဲ့နောက် ပြီးခဲ့တဲ့ သီတင်းပတ်မှာ ရုရှားက တကယ်သာ ယူကရိန်းလက်ထဲ အမေရိကန်က နျူကလီးယား လက်နက်တွေ လွှဲပေးမယ်ဆိုရင် အင်မတန် ရူးမိုက်တဲ့ လုပ်ရပ်မျိုး ဖြစ်လိမ့်မယ်လို့ သတိပေးခဲ့ပါတယ်။ တစ်ဖက်မှာတော့ ရုရှား သမ္မတ ဗလာဒီမာ ပူတင်ဟာ ယူကရိန်းကို နျူကလီးယား လက်နက်တွေ အသုံးပြု တိုက်ခိုက်နိုင်တယ် ဆိုတာမျိုး စစ်ပွဲကာလတလျှောက် မကြာခဏ ခြိမ်းခြောက်ခဲ့ဖူးပါတယ်။
၁၉၉၁ ခုနှစ်တုန်းက ဆိုဗီယက် ပြည်ထောင်စု ပြိုကွဲမှုနဲ့အတူ ခွဲထွက်လာတဲ့ ယူကရိန်းဟာ နျူကလီးယား လက်နက်တွေကို ဆက်ခံခွင့် ရခဲ့ပြီး အဲဒီတုန်းက ကမ္ဘာပေါ်မှာ နျူကလီးယားလက်နက် ပိုင်ဆိုင်မှု တတိယ အများဆုံး နိုင်ငံ ဖြစ်ခဲ့ပါတယ်။ ၁၉၉၄ မှာတော့ ယူကရိန်းဟာ အဲဒီ လက်နက်တွေကို စွန့်လွှတ်ဖို့ သဘောတူပြီး အမေရိကန်၊ ရုရှားနဲ့ ဗြိတိန်တို့ဆီ လွှဲပြောင်းပေးခဲ့သလို အဲဒီသုံးနိုင်ငံက ယူကရိန်းရဲ့ လုံခြုံရေးအတွက် အာမခံခဲ့ပါတယ်။ ၂၀၂၂ ခုနှစ်မှာတော့ အဲဒီ အာမခံထားတဲ့ သုံးနိုင်ငံထဲက ရုရှားဟာ ယူကရိန်းကို ကျူးကျော်စစ် ဆင်နွှဲခဲ့တာ ဖြစ်ပါတယ်။
ကိုးကား: ABC
