မြောက်ကိုရီးယားကို ရုရှားက ရေငုပ်သင်္ဘော နည်းပညာတွေ ထောက်ပံ့ပေးနေတယ်လို့ ယုံကြည်ရ

တိုက်ခိုက်ရေး ရေငုပ်သင်္ဘော နည်းပညာ တိုးတက်ရေးအတွက် ရုရှားဆီကနေ မြောက်ကိုရီးယားက အကူအညီတွေ ရရှိနေတယ်လို့ ယုံကြည်ရကြောင်း တောင်ကိုရီးယား ကာကွယ်ရေး ဝန်ကြီးက ပြောပါတယ်။

မြောက်ကိုရီးယားဟာ တိုက်ချင်းပစ် ဒုံးကျည်တွေ ပစ်လွှတ်နိုင်တဲ့ အဆင့်မြင့် ရေငုပ်သင်္ဘောတွေ တည်ဆောက်နိုင်ရေးမှာ ရုရှားဆီကနေ နည်းပညာ အကူအညီ ထဲထဲဝင်ဝင် ရရှိနေတယ်လို့ ယူဆရကြောင်း အန်းဂျူဘဲ့က ပြောပါတယ်။ သူက မြောက်ပိုင်း အိမ်နီးချင်း ကွန်မြူနစ် နိုင်ငံဟာ နျူကလီးယား စွမ်းအင်သုံး ရေငုပ်သင်္ဘောတွေ ပိုင်ဆိုင်နိုင်ရေး အတွက်လည်း ကြိုးပမ်းနေတယ်လို့ ယုံကြည်ရကြောင်း မှတ်ချက်ပေးသွားပါတယ်။

မြောက်ကိုရီးယား စစ်တပ်ဟာ တိုက်ချင်းပစ် ဒုံးကျည်တွေ ပစ်လွှတ်နိုင်တဲ့ ရေငုပ်သင်္ဘောတွေ ကိုယ်တိုင် တည်ဆောက် ထုတ်လုပ်နိုင်ဖို့ ကြိုးစားမယ်လို့ ကြေညာထားပါတယ်။ အရင်ကလည်း မြောက်ကိုရီးယားဟာ ရေငုပ်သင်္ဘော အခြေစိုက် တိုက်ချင်းပစ် ဒုံးကျည်တွေ စမ်းသပ် ပစ်ခတ်ခဲ့ဖူးပေမယ့် အောင်မြင်မှု ရှိမရှိ ဆိုတာကိုတော့ အတိအကျ အတည်မပြုနိုင်ပါဘူး။

မြောက်ကိုရီးယားဟာ ရေငုပ်သင်္ဘော အခြေစိုက် တိုက်ချင်းပစ် ဒုံးကျည်တွေ၊ နျူကလီးယား စွမ်းအင်သုံး ရေငုပ်သင်္ဘောတွေ ထုတ်လုပ်ရေးအတွက် ဆက်စပ် နည်းပညာ တော်တော်များများကို ရုရှားဆီက လက်ခံရရှိနေတယ်ဆိုဟာ ကောလာဟလ အဆင့်ထက် အများကြီး ပိုတယ်လို့ ယုံကြည်ရကြောင်း တောင်ကိုရီးယား လွှတ်တော်ဆီ အောက်တိုဘာ ၁၃ ရက်နေ့မှာ အစီရင်ခံချိန်မှာ အန်းက ပြောကြားသွားပါတယ်။

Public Service Announcement

ရုရှားနဲ့ မြောက်ကိုရီးယားတို့ဟာ ပြီးခဲ့တဲ့ ၂ နှစ်တာအတွင်း စစ်ရေးဆိုင်ရာ ပူးပေါင်း ဆောင်ရွက်မှုတွေကို သိသိသာသာ မြှင့်တင်လာခဲ့ပါတယ်။ မြောက်ကိုရီးယားဟာ ယူကရိန်းနဲ့ စစ်ပွဲမှာ ရုရှားကို ကူညီပေးဖို့အတွက်လည်း စစ်သည် ၁၀၀၀၀ ကျော်ကို စေလွှတ်ပေးထားခဲ့ပါတယ်။

အပြန်အလှန် အနေနဲ့ ရုရှားကလည်း မြောက်ကိုရီးယားအတွက် စစ်ဘက်နည်းပညာနဲ့ စီးပွားရေး အကူအညီတွေ ထောက်ပံ့ပေးနေခဲ့တယ်လို့ တောင်ကိုရီးယား ထောက်လှမ်းရေးက သုံးသပ် ပြောကြားထားပါတယ်။

ကိုးကား: Reuters