အမေရိကန် နိုင်ငံရဲ့ ကန်တက်ကီ ပြည်နယ်မှာ ကုန်တင်လေယာဉ်တစ်စီး ပျက်ကျလို့ အနည်းဆုံး လူ ၃ ဦး သေဆုံးခဲ့ကြောင်း သိရပါတယ်။
နိုဝင်ဘာ ၄ ရက်နေ့တုန်းက လူးဝစ္စဗီးလ် မြို့မှာရှိတဲ့ မူဟာမက်အလီ နိုင်ငံတကာ လေဆိပ်နားမှာ လေယာဉ် ပျက်ကျခဲ့တာ ဖြစ်ပါတယ်။ လေယာဉ် ပျက်ကျမှုကြောင့် မြေပြင်မှာရှိတဲ့ စီးပွားရေး လုပ်ငန်းဆိုင်ရာ အဆောက်အအုံ တချို့လည်း မီးစွဲလောင်ခဲ့တယ်လို့ မျက်မြင်တွေက ပြောပါတယ်။
ကန်တက်ကီ ပြည်နယ် အုပ်ချုပ်ရေးမှူး အန်ဒီ ဘီရှာက ဒီဖြစ်ရပ်ဟာ တကယ့်ကပ်ဘေးတစ်ခုလို့ ပြောကြားခဲ့ပြီး ဒေသခံတွေ အနေနဲ့ ဘေးကင်းလုံခြုံရေးအတွက် အာဏာပိုင်တွေ ညွှန်ကြားတဲ့အတိုင်း တိတိကျကျ လိုက်နာကြဖို့ တိုက်တွန်းထားပါတယ်။
လောလောဆယ်တော့ အသေအပျောက် ၃ ဦးရှိတယ်လို့ နားလည်ထားကြောင်း၊ ဒါပေမဲ့ အဲဒီထက် အများကြီး တိုးလာမယ်လို့လည်း သူယူဆကြောင်း ဘီရှာက ဆိုပါတယ်။ ဒဏ်ရာရသူကလည်း ၁၁ ဦးထက်မနည်း ရှိနိုင်ပါတယ်။
Public Service Announcement
သူက မြေပြင်မှာ ရှိနေတဲ့ အလုပ်သမား ၂ ဦးလည်း ပျောက်ဆုံးနေပြီး အဆောက်အအုံကြီး ၂ ခုလည်း ထိခိုက်သက်ရောက်မှုတွေ ခံခဲ့ရတယ်လို့ ပြောပါတယ်။ လေယာဉ်ဝန်ထမ်း ၃ ဦးစလုံးကတော့ သေဆုံးသွားပြီလို့ ယုံကြည်ရပါတယ်။
ပြည်နယ် အုပ်ချုပ်ရေး အာဏာပိုင် အရာရှိ နောက်တစ်ဦးကတော့ ပျက်ကျတဲ့ လေယာဉ်ဟာ လောင်စာဆီ ဂါလံ ၃၈၀၀၀ လောက် တင်ဆောင်လာခဲ့တယ်လို့ သတင်းထောက်တွေဆီ အသိပေးခဲ့ပါတယ်။
အမေရိကန် ဖက်ဒရယ် လေကြောင်း အာဏာပိုင်အဖွဲ့ (FAA)ရဲ့ ကြေညာချက်အရ လေယာဉ်ဟာ ဟာဝိုင်ယီပြည်နယ်ရဲ့ ဟိုနိုလူလူမြို့ဆီ ဦးတည် ပျံတက်သွားပြီး မကြာခင်မှာ ပျက်ကျခဲ့တာလို့ သိရပါတယ်။ လေယာဉ်ဟာ ကုန်တင်ဖို့ အဓိက အသုံးပြုလေ့ ရှိကြတဲ့ McDonell Douglas MD-11 အမျိုးအစား ဖြစ်ပါတယ်။
လေယာဉ် ပျက်ကျမှု အပြီးမှာတော့ လေဆိပ်ရဲ့ အဝင်အထွက် ခရီးစဉ် အားလုံးကို ယာယီ ဆိုင်းငံ့ထားပြီး လေယာဉ်ကွင်းကိုလည်း ပိတ်ထားခဲ့ရပါတယ်။
လေယာဉ် ဘာကြောင့် ပျက်ကျရသလဲ ဆိုတာကိုတော့ တိတိကျကျ မသိရသေးပါဘူး။ အမေရိကန်ရဲ့ အကြီးမားဆုံး ကုန်ပစ္စည်း သယ်ယူပို့ဆောင်ရေး ဝန်ဆောင်မှု လုပ်ငန်းတစ်ခုဖြစ်တဲ့ United Parcel Service (UPS)က အဲဒီ လေယာဉ်ကို ပိုင်ဆိုင်တာ ဖြစ်ပါတယ်။ ကန်တက်ကီ ပြည်နယ်ဟာ UPSရဲ့ အကြီးမားဆုံး ကုန်စည် ထုပ်ပိုး သယ်ယူရေး ဌာနကြီး တည်ရှိတဲ့ ပြည်နယ်လို့လည်း သိရပါတယ်။
ကိုးကား: Sky
