ဒူဘိုင်း လေကြောင်းပြပွဲမှာ အိန္ဒိယ တိုက်လေယာဉ် ပျက်ကျခဲ့တဲ့ ဖြစ်စဉ်အတွက် စုံစမ်းစစ်ဆေးမှုတွေ စတင်နေပြီလို့ သိရပါတယ်။
နိုဝင်ဘာ ၂၁ ရက်နေ့က အာရပ်စော်ဘွားများ ပြည်ထောင်စု (ယူအေအီး) နိုင်ငံရဲ့ ဒူဘိုင်းမြို့က လေကြောင်းပြပွဲမှာ ပါဝင် ပျံသန်းရင်း အိန္ဒိယ ပြည်တွင်းဖြစ် တိုက်လေယာဉ် HAL Tejas တစ်စီး ပျက်ကျခဲ့တာပါ။ အဲဒီဖြစ်စဉ်မှာ လေယာဉ်မှူး သေဆုံးခဲ့ပါတယ်။
လေယာဉ်ပျက်ကျတဲ့ နေရာမှာ ပြင်းထန်တဲ့ ပေါက်ကွဲမှုဖြစ်ပြီး မည်းနက်တဲ့ မီးခိုးလုံးတွေ ထိုးတက်လာတာကို အဝေးကနေ မြင်ခဲ့ရပါတယ်။ လေကြောင်းပြပွဲကို ရောက်ရှိနေတဲ့ ဧည့်ပရိသတ်တွေဟာ အဲဒီ ထိတ်လန့်စရာ မြင်ကွင်းကြောင့် အကြီးအကျယ် တုန်လှုပ်ခဲ့ကြပါတယ်။
အိန္ဒိယ လေတပ်က Tejas တိုက်လေယာဉ် ပျက်ကျမှုအတွင်း လေယာဉ်မှူး သေဆုံးခဲ့တယ် ဆိုတာကို အတည်ပြုခဲ့ပါတယ်။ သေဆုံးသူရဲ့ မိသားစုနဲ့ထပ်တူ ကြေကွဲဝမ်းနည်းကြောင်း လေတပ်က ထုတ်ပြန်ပြီး လေယာဉ် ပျက်ကျရတဲ့ အကြောင်းရင်းကို ယူအေအီးရဲ့ စုံစမ်းစစ်ဆေးရေး အရာရှိတွေနဲ့အတူ ဆန်းစစ် ရှာဖွေနေတယ်လို့ လေတပ်က ကြေညာခဲ့ပါတယ်။
Public Service Announcement
လေယာဉ် မပျက်ကျခင် ရက်ပိုင်းတုန်းက ဒူဘိုင်းကို ရောက်နေတဲ့ Tejas တိုက်လေယာဉ် ၃ စီးထဲက ၁ စီးမှာ ဆီယိုနေတယ်ဆိုတဲ့ ဓာတ်ပုံတွေ ထွက်ပေါ်ခဲ့ပါသေးတယ်။ ဒါပေမဲ့ လေတပ်ကတော့ ပျက်ကျခဲ့တာက ဆီယိုခဲ့တဲ့ လေယာဉ် မဟုတ်ဘူးလို့ ပြောပါတယ်။
လေယာဉ်ပျက်ကျရတဲ့ အကြောင်းရင်းကို အတိအကျ မသိရသေးပေမယ့် လေယာဉ်မှူးဟာ အနိမ့်ပိုင်းမှာ လေယာဉ်ကို ရုတ်တရက် လမ်းကြောင်းပြောင်း ပျံသန်းတဲ့အချိန် ရုတ်တရက် အင်ဂျင်ရပ်တဲ့ stallဖြစ်စဉ်နဲ့ ကြုံသွားခဲ့တာဆိုတဲ့ ယူဆမှုတွေ ရှိနေပါတယ်။
လေယာဉ်ပျက်ကျမှုအပြီး တစ်နာရီခွဲလောက် အကြာမှာတော့ လေကြောင်းပြပွဲကို ပုံမှန်အတိုင်း ဆက်ပြီး ကျင်းပခဲ့ပါတယ်။
Tejasဟာ အိန္ဒိယရဲ့ ပြည်တွင်းဖြစ် တိုက်လေယာဉ်ဖြစ်ပြီး Hindustan Aeronautics Limited (HAL)က တာဝန်ယူ ထုတ်လုပ်ပါတယ်။ အဲဒီ အင်ဂျင်တစ်လုံးတပ် အပေါ့စား တိုက်လေယာဉ်တွေကို အိန္ဒိယ ကာကွယ်ရေး ဝန်ကြီးဌာနက နောက်ထပ် ၉၇ စီး မှာယူထားပြီး ၂၀၂၇ စလို့ တစ်သုတ်ချင်းစီ လက်ခံရရှိမှာပါ။ အိန္ဒိယဟာ ၂၀၂၁ တုန်းကလည်း Tejas တိုက်လေယာဉ် ၈၁ စီးကို မှာယူထားပေမယ့် လက်တွေ့ တင်ပို့မှု အပိုင်းမှာ နှောင့်နှေးမှုတွေ ကြုံနေဆဲပါ။ အကြောင်းရင်းကတော့ လေယာဉ်ရဲ့ အင်ဂျင်တွေကို အမေရိကန်ကနေ မှာယူတင်သွင်းရပေမယ့် ပစ္စည်းပြတ်လပ်မှုတွေ ဖြစ်ပေါ်နေတာကြောင့်လို့ သိရပါတယ်။
ကိုးကား: Sky
