ဇူလိုင်-၁၉၊၂၀၂၅။ဇော်ရမ်း/People’s Spring
မြိတ်ခရိုင်အတွင်းစစ်ကောင်စီတပ်ဖွဲ့များ နှင့် စစ်တပ်ထောက်တိုင်များကိုတိုက်ခိုက်မှုအရှိန်မြှင့်မည်ဖြစ်၍ စစ်တပ်စခန်းများ၊ စစ်တပ်ဂိတ်အနီးနေထိုင်သောပြည်သူများစစ်ရေးအသိ၊စစ်ရေးသတိဖြင့် နေထိုင်သွားလာကြရန်မြိတ်ခရိုင်အမှတ် (၁) တပ်ရင်းက သတိပေးချက်ထုတ်ပြန်သည်။
မဟာမိတ်ပူးပေါင်းတပ်ဖွဲ့များနှင့်အတူ တိုက်ခိုက်မှုအရှိန်မြှင့်မည့်သတင်းကို ဇူလိုင်လ ၁၉ရက် နံနက်တွင်ထုတ်ပြန်ခြင်းဖြစ်သည်။
စစ်ကောင်စီတပ်ဖွဲ့များနှင့် ၎င်းတို့၏ လက်ဝေခံ ထောက်တိုင်များကို အရှိန်အဟုန်မြင့် တိုက်ခိုက်သွားမည်ဟု ထုတ်ပြန်ပြီး စစ်ကောင်စီတပ်စခန်းများအနီး နေထိုင်ကြသည့်ပြည်သူများအနေဖြင့် စစ်ရေးအသိစစ်ရေးသတိဖြင့် နေထိုင်သွားလာကြရန် နှင့် စစ်ကောင်စီတပ်ဖွဲ့ စခန်းချရာနေရာများနှင့် တတ်နိုင်သမျှရှောင်ကြဉ်ကြရန်မေတ္တာရပ်ခံထားသည်။
Public Service Announcement
“တော်လှန်ရေးအဖွဲ့တွေကမြေပြင်မှာလည်း သတိပေးထားပါတယ်။နှစ်ရက်သုံးရက်ရှ်ိပြီးသူတို့ ပြောထားတာ။မဖြစ်မနေသွားလာနေရတာတွေကိုသတိထားသွားလာကြဖို့မိသားစုကိုပြောထားပါတယ်”ဟု ကျွန်းစုမြို့နယ်မှဒေသခံတစ်ဦးကပြောသည်။
မြိတ်၊ ကျွန်းစု၊ ပုလော၊ တနင်္သာရီမြို့နယ်တို့ပါဝင်ပြီး ပုလောမြို့နယ်တွင် ပုလော၊ ပလောက်နှင့် ပလမြို့တို့ပါဝင်သည်။ တနင်္သာရီမြို့နယ်တွင်တနင်္သာရီနှင့်မောတောင်မြို့တို့ ပါဝင်သည်။
စစ်ဆင်ရေးလုပ်ဆောင်ချိန်များအတွင်းစစ်ကောင်စီတပ်ဖွဲ့ များနှင့် အနီးအနားတွင် ရောက်ရှိနေပါက ထိတ်လန့်တုန်လှုပ်ခြင်းမရှိဘဲကျည်ကွယ်မျက်ကွယ်နေရာများတွင် အကာအကွယ်ယူ၍ တတ်နိုင်သမျှ လုံလုံခြုံခြုံနေထိုင်ကြရန်၊ နေအိမ်များတွင်လည်း ဗုံးခိုကျင်းများ စနစ်တကျ တူးထားရန်နှင့် အရေးကြီးစာရွက်စာတမ်းများ၊တန်ဖိုးရှိပစ္စည်းများကို သေသေချာချာ ထုပ်ပိုးထားကြရန် မြိတ်ခရိုင်အမှတ်(၁)တပ်ရင်းက အကြံပြုထားသည်။
မြိတ်ခရိုင်အတွင်းယခုရက်ပိုင်းစစ်ရေး တင်းမာနေပြီး ပြီးခဲ့သည့်ဇွန်လ၂၇ရက်နေ့ကပုလောမြို့နယ်၊ ကျောက္ကာကျေးရွာမှ စစ်ကောင်စီစခန်းကို မြိတ်ခရိုင်အမှတ် (၁) တပ်ရင်း၊ ကရင်အမျိုးသားကာကွယ်ရေးတပ်(KNDO) တပ်ရင်း (၇) မဟာမိတ်တပ်ပေါင်းစုက စီးနင်းတိုက်ခိုက်သိမ်းယူခဲ့သည်။
စစ်ကောင်စီကရှေ့တန်းသို့ပို့ဆောင်လိုက်သည့် ပြည်သူ့စစ်မှုထမ်းဆင်းများလည်း လက်နက်ချအလင်းဝင်မှုများရှိနေသည်။ဇွန်လ (၁၈) ရက်နေ့က ပလောက်မြို့၊ အမှတ် (၁၂) တပ်မတော်တန်းမြင့်လေ့ကျင့်ရေးကျောင်း(တိုင်းဗဟို ၁၂) မှ အဓမ္မစုဆောင်းခြင်းခံရသူ လူငယ် (၄) ဦးသည် မြိတ်ခရိုင်အမှတ် (၁) တပ်ရင်းထံသို့ ခိုလှုံလာခဲ့သည်။ဇွန်လ ၂၁ရက်နေ့ကလည်း ပုလောမြို့အခြေစိုက် ခလရ(၁၇)မှအဓမ္မစစ်သားစုဆောင်းခံရသူနှစ်ဦးသည် မြိတ်ခရိုင်အမှတ် (၁) တပ်ရင်းထံသို့ လက်နက်ခဲယမ်းအချို့နှင့်အတူ အလင်းဝင်လာခဲ့သည်။
