စစ်ကိုင်းတိုင်း၊ ယင်းမာပင်ခရိုင်၊ ပုလဲမြို့နယ်အထွေထွေအုပ်ချုပ်ရေးမှူးရုံး၌ တပ်စွဲထားသော စစ်အုပ်စုအား လက်နက်ကြီးဖြင့် ပစ်ခတ်တိုက်ခိုက်ခဲ့ကြောင်း ဒေါင်းနက် – နယ်စည်းမခြားပြောက်ကျား တပ်ဖွဲ့က သတင်းထုတ်ပြန်သည်။
ယနေ့ (နိုဝင်ဘာလ ၂၂ ရက်) နံနက် ၁၀ နာရီကျော်က ပုလဲမြို့ပေါ် ထွေအုပ်ရုံး၌ တပ်စွဲထားသော စစ်ကောင်စီတပ်နှင့် ရဲများအား ဒေသတွင်း PDFများပူးပေါင်းပြီး လက်နက်ကြီးများဖြင့် ထွေအုပ်ရုံးအတွင်းသို့ ပစ်ခက်တိုက်ခိုက်ခဲ့ရာ လက်နက်ကြီးနှစ်လုံးထိမှန်သွားကြောင်း ဒေါင်းနက် – နယ်စည်းမခြား ပြောက်ကျားတပ်ဖွဲ့ ယာယီ သတင်းနှင့်ပြန်ကြားရေးတာဝန်ခံ ရဲဘော် ESCAPEက အသိပေးသည်။
ထို့အပြင် ရှေ့ထွက်မိုင်းများပါဆွဲ၍ ထပ်မံတိုက်ခိုက်ခဲ့ရာ အပြန်အလှန်ပစ်ခတ်မှု ရှိခဲ့ကြောင်း၊ တိုက်ပွဲကြာချိန် ၁၀မိနစ်ခန့်သာရှိသော်လည်း စစ်အုပ်စုဘက်က အကျအဆုံးရှိနိုင်ကြောင်း ရဲဘော် ESCAPEက ဆိုသည်။
အဆိုပါ စစ်ဆင်ရေးကို ရဲဘော်ချစ်ငယ် ဦးဆောင်သော ယင်းမာပင်ရိုင် တပ်ရင်း -၁၀ (ဒေါင်းနက် -နယ်စည်းမခြားပြောက်ကျားတပ်ဖွဲ့)နှင့် တပ်ရင်း -၈(ပုလဲဂျိုကာအဖွဲ့)တို့ ပူးပေါင်းတိုက်ခိုက်ခဲ့ကြောင်း အသိပေးထားသည်။
Public Service Announcement
ဒေါင်းနက် – နယ်စည်းမခြား ပြောက်ကျားတပ်ဖွဲ့ နှင့် ပုလဲဂျိုကာအဖွဲ့တို့ထံ ဆက်သွယ်မေးမြန်းထားပြီး ပြန်လည်ဖြေကြားခြင်း မရှိသေးပေ။
ထို့အပြင် စစ်အုပ်စု၏ ထိခိုက်မှုအခြေအနေအား ထပ်မံအတည်ပြုနိုင်ခြင်း မရှိသေးပေ။
ပုလဲမြို့ပေါ်ရဲစခန်းနှင့် ထွေအုပ်ရုံးတို့ရှိ စစ်အုပ်စုအား ဒေသတွင်းPDFများက မကြာခဏတိုက်ခိုက်လေ့ရှိသည်။
