ဖမ်းဆီးထောင်ချထားတဲ့သူတွေ ကို မိသားစုနဲ့ပေးတွေ့ ဖို့ အာဏာသိမ်းစစ်ကောင်စီ ဒုခေါင်းဆောင်ကို အပြည်ပြည်ဆိုင်ရာ ကြက်ခြေနီအဖွဲ့ (ICRC) ကနေပြည်တော်မှာသွားတွေ့ပြီး တောင်းဆိုလိုက်ပါတယ်။
ပြီးခဲ့တဲ့ ဗုဒ္ဓဟူးနေ့က နေပြည်တော်မှာ စစ်ကောင်စီ ဒုခေါင်းဆောင်နဲ့ ICRC ရဲ့ ညွှန်ကြားရေးမှူး တို့ တွေ့ဆုံတာလို့သိရပါတယ်။
အဲဒီတွေ့ဆုံမှုမှာ နေရပ်စွန့်ခွာသူတွေ ကို အကူအညီပေးဖို့ နဲ့ အကျဉ်းကျနေသူတွေ မိသားစုနဲ့ ထောင်ဝင်စာတွေ့ခွင့်ရဖို့ ဆွေးနွေးတယ်လို့စစ်ကောင်စီက ဆိုထားပါတယ်။
ဒါပေမယ့် အဲဒီကိစ္စရပ်တွေကို ခွင့်ပြု ဖို့ ရှိ မရှိ စစ်ကောင်စီက သတင်းထုတ်ပြန်ချက်မှာ တိတိကျကျ ဖော်ပြတာမတွေ့ရပါဘူး။
Public Service Announcement
ရန်ကုန်မြို့က ICRC ရုံးကလည်း စစ်ကောင်စီနဲ့တွေ့ဆုံမှုနဲ့ပတ်သက်ပြီး ထုတ်ပြန်တာမရှိသေးပါဘူး။
မြန်မာနိုင်ငံမှာကိုဗစ် စတင်ဖြစ်ချိန်ကစတင်ပြီး အကျဉ်းထောင်တွေထဲမှာ မိသားစုနဲ့ တွေ့ဆုံခွင့်ရတဲ့ ထောင်ဝင်စာကို ပိတ်ထားခဲ့တာပါ။ စစ်တပ်အာဏာသိမ်းပြီး ၂ နှစ်ကျော်လာချိန်အထိလည်း ဆက်ပိတ်ထားတာပါ။
ဒါကြောင့် မိသားစုဝင်တွေဟာ ၁၅ ရက်တစ်ကြိမ် အစားအသောက် ၊ဆေးဝါးပို့ရတဲ့ ထောင်ဝင်စာ ပါဆယ်ပဲ ပို့နေကြရတာဖြစ်ပါတယ်။
ဒါအပြင် အင်းစိန်ထောင် ထောင်ဝင်စာ ပါဆယ်ပို့ရာနေရာမှာ ပြီးခဲ့တဲ့ နှစ်ကုန်ပိုင်းက ပေါက်ကွဲမှုဖြစ်ပြီးနောက်ပိုင်း ထောင်ဝင်စာ ပါဆယ်ပို့တာကိုပါ စစ်ကောင်စီက တင်းကြပ်ထားပါတယ်။
