အသက်ပေးဆပ်စွန့် လွှတ်တိုက်ပွဲဝင်ခဲ့သည့် ကရင်နီသူရဲကောင်းများအား ဦးညွှတ်ဂုဏ်ပြုကြောင်း NUG ကာကွယ်ရေးသဝဏ်လွှာပို့
အသက်ပေးဆပ်စွန့် လွှတ်တိုက်ပွဲဝင်ခဲ့သည့် ကရင်နီသူရဲကောင်းများအား ဦးညွှတ်ဂုဏ်ပြုကြောင်း NUG ကာကွယ်ရေးသဝဏ်လွှာပို့စစ်အုပ်စုမှ တိုင်းပြည်အာဏာကို ထပ်မံသိမ်းယူပြီးနောက် တစ်နိုင်ငံလုံးအတိုင်းအတာဖြင့် ပေါ်ပေါက်လာသည့် အာဏာရှင်စနစ်မှန်သမျှ တိုက်ဖျက်ရေးနှင့် ဖက်ဒရယ်ဒီမိုကရေစီ ပြည်ထောင်စု တည်ဆောက်နိုင်ရေး တိုက်ပွဲကြီးတွင် တော်လှန်သော ပြည်သူတစ်ရပ်လုံးဖက်မှ ရပ်တည်ပြီး ခုခံတော်လှန် တိုက်ပွဲ ဆက်လက်ဆင်နွှဲမည်ဟု ကရင်နီအမျိုးသားတိုးတက်ရေးပါတီ(KNPP)က ကြေညာချက် ထုတ်ပြန်သည်။
ယနေ့ (မေလ ၂ရက်)တွင် ကျရောက်သည့် KNPP တည်ထောင်ခြင်း (၆၆)နှစ်ပြည့်အထိမ်းအမှတ် ကြေညာချက် ထုတ်ပြန်ရာ၌ ယခုကဲ့သို့ ဖော်ပြထားခြင်းဖြစ်သည်။
ကရင်နီအမျိုးသားတိုးတက်ရေးပါတီ၏ နိုင်ငံရေး ရည်မှန်းချက်ဖြစ်သော ကရင်နီအမျိုးသားထုတစ်ရပ်လုံး ဖိနှိပ်မှုမှ လွတ်မြောက်ပြီး တရားမျှတရေးနှင့် ကိုယ်ပိုင်ပြဌာန်းခွင့် အပြည့်အ၀ ရှိသော ဖက်ဒရယ်ပြည်ထောင်စု နိုင်ငံတည်ဆောက်နိုင်သည်အထိ ခုခံတော်လှန်ရေးတိုက်ပွဲကို ဆက်လက်ဆင်နွှဲသွားမည်ဖြစ်ကြောင်း KNPPက ထုတ်ပြန်ခဲ့သည်။
KNPP တည်ထောင်ခြင်း (၆၆)နှစ်ပြည့်အထိမ်းအမှတ်သို့ အမျိုးသားညီညွတ်ရေးအစိုးရကာကွယ်ရေးဝန်ကြီးဌာနက သဝဏ်လွှာပေးပို့ခဲ့ရာ (၆၆) နှစ်တာကာလအတွင်း ကရင်နီအမျိုးသားတိုးတက်ရေးပါတီ၏ ဦးဆောင်မှုအောက်တွင် ကရင်နီအမျိုးသားတရပ်လုံးသည် တော်လှန်ရေးလှိုင်းတံပိုးများကို ကြံ့ကြံ့ခံလျက် အာဏာရှင်အား မဆုတ်မနစ် ခုခံတွန်းလှန်ခဲ့ကြကြောင်း၊ ၂၀၂၁ ခုနှစ် ဖေဖော်ဝါရီတွင် အကြမ်းဖက်စစ်တပ်မှ မတရား အာဏာသိမ်းယူပြီးနောက်ပိုင်းတွင် ကရင်နီအမျိုးသားခုခံတော်လှန်ရေးသည် နိုင်ငံရေး၊ စစ်ရေး အရှိန်အဟုန်မြင့်မားစွာဖြင့် ဆက်လက် ချီတက်လျက်ရှိကြောင်း ဖော်ပြသည်။
Public Service Announcement
လက်ရှိအချိန်တွင် အကြမ်းဖက်စစ်တပ်သည် ကရင်နီပြည်အား အဆမတန်သာလွန် အင်အားဖြင့် အလုံးအရင်း ထိုးစစ်ဆင်လျက်ရှိပြီး ကရင်နီအမျိုးသားတိုးတက်ရေးပါတီ (KNPP) နှင့် ကရင်နီအမျိုးသားတရပ်လုံးသည် သတ္တိဂုဏ်ရောင် ပြောင်စွာ ရွပ်ရွပ်ချွံချွံ ခုခံတွန်းလှန်လျက် ရှိကြောင်း၊ ကရင်နီအမျိုးသားခုခံတော်လှန်ရေးတလျှောက် အသက်၊အိုးအိမ်၊စည်းစိမ်များစွာ စွန့်လွှတ် ပေးဆပ်ပြီး တိုက်ပွဲဝင်ခဲ့သော ကရင်နီအမျိုးသား အာဇာနည်သူရဲကောင်းများ အားလုံးကိုလည်း မမေ့မလျော့ ဦးညွှတ်ဂုဏ်အပ်ပြုကြောင်း ကာကွယ်ရေးဝန်ကြီးဌာနက သဝဏ်လွှာပေးပို့သည်။
နှစ်ကာလများစွာ ပြည်သူအားဖိနှိပ်ဗိုလ်ကျလာသည့် ဘုံရန်သူအကြမ်းဖက်စစ်တပ်နှင့် စစ်အာဏာရှင်စနစ်အား အပြီးတိုင်ဖယ်ရှားပြီး ကိုယ်ပိုင်အုပ်ချုပ်ခွင့်၊ ကိုယ်ပိုင်ပြဌာန်းခွင့်၊ တန်းတူရေးနှင့် တရားမျှတမှု များကို အာမခံသည့် ဖက်ဒရယ်ဒီမိုကရေစီပြည်ထောင်စုသစ်ကို တည်ထောင်နိုင်ရန် အတူတကွ လက်တွဲ ရုန်းကန်ကြိုးစားကြမည်ဟု တော်လှန်ရေးသန္နိဌာန်ပြုကြောင်းလည်း သဝဏ်လွှာ၌ ဖော်ပြသည်။
